Border News Agency
မင်းပြား၊ ဇူလိုင် ၂၀။

စစ်ကောင်စီတပ်ထံ အတင်းအဓမ္မ စစ်သားစုဆောင်းခံခဲ့ရပြီးနောက် ထွက်ပြေးခိုလှုံလာသည့် တပ်သားနိုင်ဝင်းစိုး ပြောဆိုချက်ရုပ်သံကို အာရက္ခတပ်တော် (AA) က ဇူလိုင်လ ၂၀ ရက် ဒီနေ့ ထုတ်ပြန်ပါတယ်။

စစ်ကောင်စီတပ်သား နိုင်ဝင်းစိုးဟာ ရန်ကုန်တိုင်း ကော့မှူးမြို့နယ်ကဖြစ်ပြီး ပြီးခဲ့တဲ့ ဇန်နဝါရီလ ၂ ရက်နေ့က ပေါ်တာဆွဲခံရပြီးနောက် စစ်သင်တန်းကျောင်းကို အတင်းအဓမ္မ ပို့ဆောင်ခံခဲ့ရတာပါ။

ဇန်နဝါရီ ၂၀ ရက်နေ့ကနေ မတ်လ ၁၀ ရက်နေ့အထိ စစ်သင်တန်းတက်ရောက်ပြီးနောက် အာရက္ခတပ်တော် (AA) ထိန်းချုပ်ရာ ပုဏ္ဏားကျွန်းမြို့နယ်နဲ့ကပ်လျက်မှာရှိတဲ့ စစ်တွေမြို့နယ် အမြင့်ကျွန်းကျေးရွာမှာ တာဝန်ထမ်းဆောင်ခဲ့ရတယ်လို့ဆိုပါတယ်။

“ရွာတွေကိုဝင်ပြီးတော့ သူတို့ပြောတဲ့အိမ်တွေကိုဖျက်ရတယ်။ ဘုန်းကြီးကျောင်းတိုင်တွေကအစ အကုန်လုပ်ရပါတယ်။ ဒါပေမဲ့ ကျွန်တော်တို့စိတ်ထဲကတော့ မပါပါဘူး။ ကျွန်တော်တို့ကို ဒီလိုမျိုး လုပ်ဖို့ အမိန့်နဲ့ခိုင်းတာပါ။ မလုပ်နိုင်တဲ့အရာတွေကို ဖိပြီးတော့ခိုင်းတယ်။ ဖိအားတွေပေးတယ်။ အစားအသောက်ကျတော့ ကောင်းကောင်းမွန်မွန် မကျွေးပါဘူး။ ဒါ ကျွန်တော်တို့လက်ရှိကြုံခဲ့ရတဲ့ ဖြစ်ရပ်ပါ။ အဲလိုမျိုးဖိနှိပ်တာတွေရှိတဲ့အတွက် ကျွန်တော်တို့မှာ ထွက်ပြေးချင်တဲ့သူတွေ တပုံကြီး ရှိပါတယ်” လို့ ဘက်ပြောင်းခိုလှုံလာတဲ့ တပ်သား နိုင်ဝင်းစိုးက ဗီဒီယိုမှာ ပြောထားပါတယ်။

သူဟာ စစ်ကောင်စီရဲ့ တပ်မ (၅၅) မှာ တာဝန်ထမ်းဆောင်ခဲ့ရတာလို့လည်းဆိုပါတယ်။

အလားတူ အမ်း-ပဒါန်းစစ်မြေပြင်မှာ ဘက်ပြောင်းခိုလှုံလာတဲ့ စစ်ကောင်စီတပ်သားနှစ်ဦးရဲ့ ပြောဆို ချက်ရုပ်သံဗီဒီယိုနှစ်ခုကိုလည်း အာရက္ခတပ်တော်က ပြီးခဲ့တဲ့ ဇူလိုင်လ ၁၅ ရက်နေ့က ထုတ်ပြန်ခဲ့ပါတယ်။

စစ်ကောင်စီထံ အတင်းအဓမ္မစစ်သားစုဆောင်းခံရသူတွေ ဘက်ပြောင်းခိုလှုံကြဖို့နဲ့ အသက်နဲ့ လုံခြုံမှု ကိုပါ အာမခံသွားမဲ့အကြောင်း အာရက္ခတပ်တော်က တိုက်တွန်းထားပါတယ်။

မြန်မာနိုင်ငံမှာ စစ်တပ်ကအာဏာသိမ်းပြီးနောက် တော်လှန်ရေးတပ်ဖွဲ့တွေထံ ပူးပေါင်းလာတဲ့ စစ်ကောင်စီတပ်သားနဲ့ ရဲတပ်ဖွဲ့ဝင် တစ်သောင်းကျော်အထိ ရှိနေတယ်လို့ ပြည်သူ့ရင်ခွင်အဖွဲ့က ပြောဆိုထားပါတယ်။