Border News Agency
ကျိုက်ထို၊ ဒီဇင်ဘာ ၁၇။
ကော်သူးလေအုပ်ချုပ်မှုနယ်မြေ၊ ဒူးသထူခရိုင်၊ကျိုက်ထိုမြို့နယ်မှာ စစ်ကော်မရှင်တပ်လက်နက်ကြီးပစ်ခတ်လို့ အရပ်သားနှစ်ဦးသေဆုံးသွားခဲ့တယ်လို့ ကရင်အမျိုးသားအစည်းအရုံးမှ ဒီဇင်ဘာလ ၁၆ ရက်၊ မနေ့ကထုတ်ပြန်ပါတယ်။
အဲဒီ ကျိုက်ထိုမြို့နယ်၊ ဖိုးဝါးသိမ်ကျေးရွာထဲကို ဒီဇင်ဘာလ ၁၂ ရက်၊ ညနေ ၃ နာရီအချိန်ခန့်က စစ်ကော်မရှင်တပ်ရဲ့ တပ်မ ၄၄ ခြေမြန်တပ်မဌာနချုပ်လက်အောက်ခံစစ်ကြောင်းမှ လက်နက်ကြီးပစ်ခတ်ခဲ့တယ်လို့ဆိုပါတယ်။
အဲဒီလို ပစ်ခတ်ခဲ့တာကြောင့် ဖိုးဝါးသိမ်ကျေးရွာမှ အရပ်သားနှစ်ဦးသေဆုံးခဲ့တယ်လို့ဆိုပါတယ်။
“ည ၁၁ နဲ့ ၁၂ နာရီကြားမှာ တိုက်ပွဲဖြစ်တယ် ၃ နာရီဝန်းကျင်မှာ အကြမ်းဖက်စစ်တပ်ကလက်နက်ကြီးနဲ့ရွာထဲကို ပစ်ထည့်တယ်။ တယောက်ကပွဲချင်းပြီးသေတယ်။ နောက်တယောက်က ရှမ်းစုရောက်မှသေတယ်။ သေဆုံးတဲ့လူတွေကရှမ်းစုက တယောက်၊ ဖိုးဝါးသိမ်ကတစ်ယောက် အမျိုးသားချည်းပဲနှစ်ယောက်လုံး။ တယောက်ကရှမ်းစုကလာလည်တာ။”လို့ ကျိုက်ထိုသတင်းတာဝန်ခံက ပြောပါတယ်။
အဲဒီစစ်ကြောင်းဟာ နောက်ထပ်စစ်ကြောင်းထိုးလာပြီး အရပ်သားတွေကိုလူသားဒိုင်းအဖြစ်အဓမ္မဖမ်းဆီးခေါ်ဆောင်ကာ တချို့ကိုပြန်လွှတ်ပေးခဲ့ပေမယ့် တချို့ကို ဒီနေ့အချိန်ထိ ဖမ်းဆီးထားဆဲဖြစ်တယ်လို့ဆိုပါတယ်။
“ပထမတော့သူတို့ဝါးဖြူကုန်းကိုတက်တယ်။ ပြီးတော့ဖိုးဝါးသိမ်ရွာရောက်တယ် ရွာသားတချို့ပြေးကျန်တဲ့ တချို့ရွာသားတွေကိုဖမ်းပြီး ဘုန်းကြီးကျောင်းဘုရားကုန်းမှာလူသားဒိုင်းလုပ်ပြီး အဲဒီမှာစစ်ကြောင်းတညအိပ်တယ်။ တချို့ကိုဖမ်းသွားပြီးပြန်လွှတ်ပေမယ့်တချို့ကိုပြန်မလွှတ်ဘူး။”လို့ ဒေသခံတဦးကပြောပါတယ်။
စစ်ကော်မရှင်တပ်ဟာ အရပ်သားတွေကိုလူသားဒိုင်းအဖြစ်အသုံးချတာ၊ အတင်းအဓမ္မဖမ်းဆီးတာတွေ လက်နက်ကြီး၊ လေကြောင်းတိုက်ခိုက်တာတွေ ပုံစံမျိုးစုံနဲ့ လူ့အခွင့်အရေးချိုးဖောက်တာတွေ၊ စစ်ရာဇဝတ်မှုတွေ ကျူးလွန်နေတယ်လို့ ပြည်သူတွေကဆိုကြပါတယ်။
