Border News Agency
ကျိုက်ထို၊ ဒီဇင်ဘာ ၂၈။
ကော်သူးလေအုပ်ချုပ်နယ်မြေ၊ ဒူးသထူခရိုင်၊ ကျိုက်ထိုမြို့နယ်မှာ စစ်ကော်မရှင်တပ် လက်နက်ကြီပစ်ခတ်လို့ သုံးရက်အတွင်း အရပ်သားသုံးဦးသေဆုံးပြီး နှစ်ဦးဒဏ်ရာရသွားတယ်လို့ ကရင်အမျိုးသားအစည်းအရုံးမှ ဒီဇင်ဘာလ ၂၈ ရက်၊ ဒီနေ့ထုတ်ပြန်ပါတယ်။
အဲဒီကျိုက်ထိုမြို့နယ်၊ ခရွဲအုပ်စု၊ အခိုင်ကျေးရွာကို ဒီဇင်ဘာလ ၂၀ ရက်နေ့က စစ်ကော်မရှင်တပ်ရဲ့ အမတ – ၃၁၀ မှ ၁၂၀ မမ လက်နက်ကြီးနှစ်လုံး၊ ၈၁ မမ လက်နက်ကြီးလေးလုံး ပစ်ခတ်ခဲ့တယ်လို့ ဆိုပါတယ်။
အဲဒီလိုပစ်ခတ်တာကြောင့် အခိုင်ရွာမှ ဦးသန်းညွန့်ရဲ့ နေအိမ်တလုံးပျက်စီးခဲ့တယ်လို့ ဆိုပါတယ်။
အဲဒီအပြင် ဒီဇင်ဘာလ ၂၁ ရက်နေ့ကလည်း ချောင်းဝရွာအပြင် သုဿန်အနီးနဲ့ ချောင်းဝရွာ ဘုန်းကြီးကျောင်းအနီးကို စစ်ကော်မရှင်တပ် လေကြောင်းမှပေါင် ၃၀၀ ဗုံးနှစ်လုံး၊ ရော့ကတ်ဗုံးတွေနဲ့ ပစ်ခတ်ခဲ့တယ်လို့ ဆိုပါတယ်။
နောက်ပြီး ဒီဇင်ဘာလ ၂၄ ရက်နေ့ကလည်း အလူးအုပ်စု၊ အလူးရွာကြီးအနီးရှိ ခတ္တာဘုန်းကြီးကျောင်းကို စစ်ကော်မရှင်တပ်ရဲ့ ခမရ – ၃ မှ ၁၂၀ မမ လက်နက်ကြီး နှစ်လုံးပစ်ခတ်ခဲ့တယ်လို့ ဆိုပါတယ်။
အဲဒီလိုပစ်ခတ်ခဲ့တာကြောင့် သံတံတားရွာမှ အမျိုးသမီးတဦး၊ ဘန့်ဘွေးကုန်းရွာမှ အမျိုးသမီးတဦးနဲ့ လေးကေရွာမှ အမျိုးသမီးတဦး၊ စုစုပေါင်းသုံးဦးသေဆုံးခဲ့ပြီး အလူးရွာကြီးမှ အမျိုးသမီးတဦး၊ သံတံတားရွာမှ အမျိုးသားတဦး စုစုပေါင်း နှစ်ဦးဒဏ်ရာရသွားခဲ့တယ်လို့ ဆိုပါတယ်။
စစ်ကော်မရှင်တပ်ဟာ သူတို့ထိန်းချုပ်နေရာတွေမှာ အတုယောင်ရွေးကောက်ပွဲပြုလုပ်နိုင်ဖို့ ငြိမ်းချမ်းနေသလို ပြုမူနေပေမယ့် ကော်သူးလေထိန်းချုပ်မှုနယ်မြေတွေနဲ့ တော်လှန်ရေးတပ်ဖွဲ့တွေ ထိန်းချုပ်ရာနေရာတွေကို လေကြောင်း၊ လက်နက်ကြီးပစ်ခတ်တာတွေ အဆက်မပြက်ပြုလုပ်နေတယ်လို့ ဆိုပါတယ်။
