Border News Agency
လယ်ဒို၊ဇန်နဝါရီ ၉။
ကော်သူးလေအုပ်ချုပ်နယ်မြေ၊ဆောထိမြို့၊ လယ်ဒိုမြိုနယ်မှာ စစ်ကော်မရှင်တပ်က ဒရုန်း၊ လက်နက်ကြီးတွေနဲ့ ပစ်ခတ်လို့ အရပ်သားနှစ်ဦးသေဆုံးပြီး နှစ်ဦးဒဏ်ရာရသွားခဲ့တယ်လို့ ကရင်အမျိုးသားအစည်းအရုံးမှ ဇန်နဝါရီလ ၈ ရက်၊ မနေ့ကထုတ်ပြန်ပါတယ်။
အဲဒီ လယ်ဒိုမြို့နယ်၊ ဝိုင်ကျွန်းကျေးရွာကို ဇန်နဝါရီလ၂ ရက်နေ့က စစ်ကော်မရှင်တပ်မှ ဒရုန်းနဲ့ပစ်ခတ်လို့ အသက်လေးဆယ်သုံးနှစ်အရွယ်ဒေါ်ကေသွယ်ထွန်း သေဆုံးခဲ့ပြီးအသက်ခြောက်ဆယ်နှစ်နှစ် အရွယ်ဦးအေးကျော်ဒဏ်ရာရသွားခဲ့ပါတယ်။
အလယ်စုကျေးရွာကိုလည်း ဇန်နဝါရီ ၇ ရက်နေ့က စစ်ကော်မရှင်တပ်ဒရုန်းနဲ့ပစ်ခတ်လို့ အသက်ငါးဆယ်အရွယ်ဒေါ်သိန်းသီ ဒဏ်ရာသွားခဲ့ပါတယ်။
အဲဒီအပြင် ဇရပ်ခင်ကျေးရွာကို စစ်ကော်မရှင်ရဲ ရွှေဝါတပ်ရင်းမှ ၁၂၀ မမ နဲ့ပစ်ခတ်လို့ အသက်သုံးဆယ်ငါးနှစ်အရွယ်ဦးအောင်ကိုလှသေဆုံးခဲ့ပါတယ်လို့ဆိုပါတယ်။
နောက်ပြီး ဦးခင်မောင်မြင့်ရဲ့နေအိမ် တလုံးနဲ့ ဦးခင်ရွှေရဲ့ဈေးဆိုင်တဆိုင်လည်း ပျက်စီးခဲ့သလိုဦးအောင်ကိုလှရဲ့ နေအိမ် တလုံးနဲ့ ဆိုင်ကယ်တစီးပျက်စီးသွားတယ်လို့ ဆိုပါတယ်။
စစ်ကော်မရှင်တပ်ဟာ သူတို့ထိန်းချုပ်နေရာတွေမှာအတုယောင်ရွေးကောက်ပွဲပြုလုပ်နိုင်ဖို့ ငြိမ်းချမ်းနေသလိုပြုမူနေပေမယ့် ကော်သူးလေထိန်းချုပ်မှုနယ်မြေတွေနဲ့တော်လှန်ရေးတပ်ဖွဲ့တွေထိန်းချုပ်ရာနေရာတွေကိုလေကြောင်း၊လက်နက်ကြီးပစ်ခတ်တာတွေ အဆက်မပြက်ပြုလုပ်နေတယ်လို့ဆိုပါတယ်။
