​Border News Agency
တကောင်း၊ မတ် ၁၃။

​တော်လှန်ရေးအင်အားစုတွေဖြစ်တဲ့ PDF ပူးပေါင်းတပ်ဖွဲ့တွေ ယာယီစိုးမိုးထားတဲ့ မန္တလေးတိုင်း၊တကောင်းမြို့ကို စစ်ကော်မရှင်တပ်က ပြန်လည်ထိန်းချုပ်လိုက်ပြီလို့ ထုတ်ပြန်ပါတယ်။

ပြီးခဲ့တဲ့ ၂၀၂၄ ခုနှစ်၊ ဩဂုတ်လကည်းက PDF တွေ စိုးမိုးထားတဲ့ တကောင်းမြို့ကို စစ်ကော်မရှင်တပ်ဘက်က တလကျော်ကြာ စစ်ကြောင်းထိုး တိုက်ခိုက်ခဲ့ပြီးနောက် မတ်လ ၁၂ ရက်နေ့မှာ အလုံးစုံ ပြန်လည်စီးနင်းနိုင်ခဲ့တာလို့ဆိုပါတယ်။

​စစ်ကော်မရှင်တပ်ဟာ သပိတ်ကျင်းမြို့ကနေတကောင်းမြို့အထိ နယ်မြေရှင်းလင်းရေး စစ်ဆင်ရေးတွေကိုဖေဖော်ဝါရီ ၆ ရက်နေ့ကစပြီး လုပ်ဆောင်ခဲ့တာပါ။

အဲဒီကာလအတွင်းမှာ PDF ပူးပေါင်းတပ်တွေနဲ့ ထိတွေ့တိုက်ပွဲပေါင်း ၈၀ ကျော် ဖြစ်ပွားခဲ့ပြီး မြို့ပေါ်နဲ့ ပတ်ဝန်းကျင်ကျေးရွာတွေကို စစ်ကော်မရှင်တပ်ဘက်က တရွာပြီးတရွာ ပြန်လည်ဝင်ရောက်ခဲ့တာလို့ဆိုပါတယ်။

​တိုက်ပွဲကာလအတွင်း နှစ်ဖက်စလုံးမှာ ထိခိုက်ကျဆုံးမှုတွေ ရှိခဲ့သလို စစ်ကော်မရှင်တပ်ဘက်ကလည်း PDF တွေဆီက လက်နက်ခဲယမ်းအချို့ သိမ်းဆည်းရမိခဲ့တယ်လို့ ဆိုပါတယ်။

တကောင်းမြို့ဟာ ရှေးဟောင်းယဉ်ကျေးမှုနယ်မြေဖြစ်တာကြောင့် တိုက်ပွဲတွေအတွင်း ဘာသာရေးအဆောက်အအုံတွေနဲ့လူနေအိမ်အတော်များများ ထိခိုက်ပျက်စီးမှုတွေ ရှိခဲ့တယ်လို့ ဆိုပါတယ်။