Border News Agency
မိတ္ထီလာ၊ မတ် ၁၃။
အာဏာသိမ်းစစ်ခေါင်းဆောင်မင်းအောင်လှိုင်ဟာ သူတို့ရဲ့လေကြောင်းစွမ်းအားမြှင့်တင်ဖို့အတွက် လေယာဉ်နဲ့ရဟတ်ယာဉ်သစ်တွေကို မိတ္ထီလာလေတပ်စခန်းမှာမတ်လ ၁၂ ရက်နေ့က အခမ်းအနားပြုလုပ်ပြီး အင်အားဖြည့်တင်းလိုက်ပါတယ်။
ဒီပွဲကိုစစ်ခေါင်းဆောင်မင်းအောင်လှိုင်ကိုယ်တိုင်တက်ရောက်ခဲ့ပြီး စစ်ပွဲအောင်နိုင်ရေးအတွက်လေကြောင်းစွမ်းအားဟာ အဓိကကျတယ်လို့ထည့်သွင်းပြောကြားခဲ့ပါတယ်။
စစ်ခေါင်းဆောင်က လေကြောင်းအင်အားတောင့်တင်းဖို့ လိုအပ်တယ်လို့ပြောဆိုနေပေမယ့် လက်ရှိမြေပြင်မှာတော့ လေကြောင်းအင်အားကိုအသုံးပြုပြီး နိုင်ငံအနှံ့ကမြို့ရွာတွေကို ဗုံးကြဲတိုက်ခိုက်နေတာကြောင့် အရပ်သားပြည်သူအများအပြား နေ့စဉ်ထိခိုက်သေဆုံးနေရပါတယ်။
အဲဒီအာရက္ခတပ်တော်(AA)ထိန်းချုပ်ထားတဲ့ အမ်းမြို့နယ်ရှိ စစ်သုံ့ပန်းစခန်းကို မတ်လ ၈ ရက်နေ့က လေကြောင်းတိုက်ခိုက်လို့ လူပေါင်း ၁၀၀ ကျော် သေဆုံးခဲ့ရသလို မတ်လ ၁၂ ရက်နေ့မှာလည်း ကျောက်တော်မြို့က ကစ္ဆပနဒီတံတားကို လေကြောင်းကနေဗုံးကြဲဖျက်ဆီးခဲ့ပါတယ်။
စစ်ကော်မရှင်တပ်ဟာ မြေပြင်စစ်ပွဲတွေမှာအထိနာပြီး နယ်မြေလက်လွှတ်ရမှုများပြားလာတာကြောင့် လေကြောင်းအင်အားကို အလွန်အကျွံသုံးကာအရပ်သားတွေကို ပစ်မှတ်ထားတိုက်ခိုက်ပြီး လက်စားချေတဲ့နည်းလမ်းကိုသုံးစွဲနေတာလို့ စစ်ရေးလေ့လာသူတွေကထောက်ပြကြပါတယ်။
အခုလိုလေယာဉ်သစ်တွေ ထပ်မံဖြည့်တင်းလိုက်တာဟာ နိုင်ငံအတွင်းလေကြောင်းတိုက်ခိုက်မှုတွေပိုမိုပြင်းထန်လာနိုင်ပြီး ပြည်သူတွေရဲ့အသက်အိုးအိမ်စည်းစိမ်တွေအတွက် ပိုမိုစိုးရိမ်စရာဖြစ်လာနေပါတယ်။
