Border News Agency
ယူအေအီး၊ မတ် ၁၅။
ယူအေအီးနိုင်ငံ (UAE)၊ဖူဂျေရာဆိပ်ကမ်းမှာရှိတဲ့ ရေနံသိုလှောင်ကန်တွေကို အီရန်က အသေခံဒရုန်းတွေနဲ့ မတ်လ ၁၄ ရက်နေ့ကတိုက်ခိုက်ခဲ့တာကြောင့် ပြင်းထန်တဲ့ မီးလောင်ကျွမ်းမှုတွေ ဖြစ်ပွားခဲ့တယ်လို့ ဒေသတွင်းမီဒီယာတွေမှာဖော်ပြပါတယ်။
အဲဒီ တိုက်ခိုက်မှုဖြစ်ပွားပြီးနောက်မှာတော့ အနက်ရောင်မီးခိုးလုံးကြီးတွေဟာ ကောင်းကင်ယံအထိ အလိပ်လိုက်ထိုးတက်နေတာကိုအဝေးကနေတောင် မြင်တွေ့နေရတယ်လို့ ပြည်သူတွေကဆိုကြပါတယ်။
ခုလက်ရှိအချိန်အထိတော့ ပျက်စီးဆုံးရှုံးမှုအတိုင်းအတာနဲ့လူထိခိုက်သေဆုံးမှု အခြေအနေကို သက်ဆိုင်ရာက တရားဝင် အတည်ပြုထုတ်ပြန်တာ မရှိသေးပါဘူး။
ဒီတိုက်ခိုက်မှုဟာ ဒေသတွင်းရေနံတင်ပို့မှု အသက်သွေးကြောဖြစ်တဲ့ ဆိပ်ကမ်းတခုကို တိုက်ရိုက်ပစ်မှတ်ထားတာဖြစ်လို့ ကမ္ဘာ့စွမ်းအင်ဈေးကွက်နဲ့ ဒေသတွင်း လုံခြုံရေးအပေါ် ရိုက်ခတ်မှု အကြီးအကျယ်ရှိလာနိုင်တယ်လို့ သုံးသပ်နေကြပါတယ်။
အရှေ့အလယ်ပိုင်းမှာအမေရိကန်၊ အစ္စရေးနဲ့ အီရန်တို့ကြား စစ်ရေးတင်းမာမှုတွေ အရှိန်မြင့်နေချိန်မှာပဲ အခုလို အိမ်နီးချင်းနိုင်ငံဖြစ်တဲ့ ယူအေအီးပါ တိုက်ခိုက်ခံလာရတာ ဖြစ်ပါတယ်။
ယူအေအီး အာဏာပိုင်တွေအနေနဲ့ မီးငြှိမ်းသတ်ဖို့နဲ့ထိခိုက်မှုတွေကို အရေးပေါ်စစ်ဆေးဖို့ ကြိုးပမ်းနေကြပြီး အီရန်ဘက်ကတော့ ဒီတိုက်ခိုက်မှုနဲ့ပတ်သက်လို့ တစုံတရာ တရားဝင် ထုတ်ဖော်ပြောဆိုတာ မရှိသေးပါဘူး။
