Border News Agency
နေပြည်တော်၊ မတ် ၁၈ ။
တတိယအကြိမ်အမျိုးသားလွှတ်တော် ပထမပုံမှန်အစည်းအဝေးကို မတ်လ ၁၈ ရက်၊ဒီနေ့မနက်ပိုင်းမှာ ကျင်းပခဲ့ပြီး အမျိုးသားလွှတ်တော်ဥက္ကဋ္ဌအဖြစ် ဦးအောင်လင်းဒွေးကို ရွေးချယ်တင်မြှောက်လိုက်ပါတယ်။
ဒီနေ့အစည်းအဝေးမှာ သဘာပတိအဖြစ် ဒေါ်ဒွဲဘူက ဆောင်ရွက်ပြီး ဥက္ကဋ္ဌနဲ့ ဒုတိယဥက္ကဋ္ဌ ရွေးချယ်မှုကို လုပ်ဆောင်ခဲ့တာပါ။
အမျိုးသားလွှတ်တော်ဥက္ကဋ္ဌ ဖြစ်လာသူ ဦးအောင်လင်းဒွေးဟာ ပြီးခဲ့တဲ့ အထွေထွေရွေးကောက်ပွဲမှာ ပြည်ခိုင်ဖြိုးပါတီ ကိုယ်စားပြုပြီး မန္တလေးတိုင်းဒေသကြီး၊ အချိုးကျကိုယ်စားပြုစနစ် (PR) မဲဆန္ဒနယ်ကနေ ရွေးကောက်ခံခဲ့ရသူ ဖြစ်ပါတယ်။
သူဟာ အရင်က စစ်တပ်မှာ ဗိုလ်ချုပ်ကြီးအဆင့်အထိ တာဝန်ထမ်းဆောင်ခဲ့သူလည်း ဖြစ်ပါတယ်။
ဒါ့အပြင် ဦးအောင်လင်းဒွေးဟာ နိုင်ငံတော်စီမံအုပ်ချုပ်ရေးကောင်စီမှာ အတွင်းရေးမှူးတာဝန်နဲ့ အမျိုးသားကာကွယ်ရေးနဲ့လုံခြုံရေးကောင်စီမှာ အမှုဆောင်အရာရှိချုပ် တာဝန်တွေကိုလည်း ယူခဲ့ဖူးပါတယ်။
အခုတော့ လွှတ်တော်ဥက္ကဋ္ဌအဖြစ် တာဝန်လွှဲပြောင်းယူပြီး ဥပဒေပြုရေးကဏ္ဍကို ဦးဆောင်ရတော့မှာပါ။
အမျိုးသားလွှတ်တော်ဥက္ကဋ္ဌအဖြစ် တာဝန်ယူရတဲ့အတွက် ဦးအောင်လင်းဒွေးဟာ တတိယအကြိမ် ပြည်ထောင်စုလွှတ်တော်ရဲ့ ပထမ ၂ နှစ်ခွဲကာလအတွက် ပြည်ထောင်စုလွှတ်တော် နာယက တာဝန်ကိုပါ ပူးတွဲထမ်းဆောင်ရမှာ ဖြစ်ပါတယ်။
ဒါဟာ နိုင်ငံရေးအပြောင်းအလဲကာလအတွင်း အရေးပါတဲ့ ရာထူးတခုလည်း ဖြစ်ပါတယ်။
မတ်လ ၁၆ ရက်နေ့ကလည်း ပြည်သူ့လွှတ်တော်ဘက်မှာ ဥက္ကဋ္ဌအဖြစ် ဦးခင်ရီကို ရွေးချယ်ခဲ့ပြီး ဖြစ်ပါတယ်။
အခု အမျိုးသားလွှတ်တော်ဥက္ကဋ္ဌ ရွေးချယ်မှုပါ ပြီးစီးသွားတဲ့အတွက် လွှတ်တော်နှစ်ရပ်လုံးရဲ့ အကြီးအကဲတွေကို အတည်ပြုနိုင်ခဲ့ပြီ ဖြစ်ပါတယ်။
