Border News Agency
ဘန်ကောက်၊ မတ် ၂၀။
ထိုင်းနိုင်ငံ၊ ဘန်ကောက်အပါအဝင် ခရိုင်သုံးခုမှာတရားမဝင်အလုပ်လုပ်ကိုင်နေတဲ့ နိုင်ငံခြားသားအလုပ်သမားတွေကို အာဏာပိုင်တွေက မတ်လ ၁၉ ရက်နေ့မှာ ဝင်ရောက်ဖမ်းဆီးခဲ့ပါတယ်။
အဲဒီဖမ်းဆီးမှုအတွင်း မြန်မာနိုင်ငံသား ၅ ဦး၊ကမ္ဘောဒီးယား ၄ ဦးနဲ့ လာအိုနိုင်ငံသား ၁ ဦးတို့ ဖမ်းဆီးခံခဲ့ရတာ ဖြစ်ပါတယ်။
ဘန်ကောက်မြို့၊Bang Rak ခရိုင်ရှိ ဘားတခုမှာ ခွင့်ပြုချက်မရှိဘဲ အလုပ်လုပ်ကိုင်နေတဲ့ အသက် ၂၇ နှစ်အရွယ် မြန်မာအမျိုးသမီး စန်းဟုန်နဲ့ ဆိုင်မန်နေဂျာဖြစ်သူ ထိုင်းအမျိုးသမီးတို့ကို ရဲတပ်ဖွဲ့က ဖမ်းဆီးခဲ့ပါတယ်။
အဲဒီမြန်မာအမျိုးသမီးဟာ သတ်မှတ်ထားတဲ့ အလုပ်အကိုင်အမျိုးအစားပြင်ပမှာ လုပ်ကိုင်နေတာကြောင့် အရေးယူခံရတာပါ။
အဲဒီအပြင်Nonthaburi ပြည်နယ်၊ Bang Yai ခရိုင်မှာလည်း ထိုင်းနိုင်ငံသားအမည်ခံပြီး ကုန်စုံဆိုင်ဖွင့်လှစ်ရောင်းချနေတဲ့ မြန်မာဇနီးမောင်နှံဖြစ်သူ ဦးကိုနဲ့ ဒေါ်သူဇာတို့ကို ဖမ်းဆီးခဲ့ပါတယ်။
သူတို့ဟာ ဒေသခံတွေရဲ့တိုင်ကြားချက်အရ အဖမ်းခံရတာဖြစ်ပြီး တရက်ကို ထိုင်းဘတ် ၃၅၀ ပေးကာ အမည်ခံခိုင်းထားတယ်လို့ ထွက်ဆိုထားပါတယ်။
အဲဒီအပြင် Trat ပြည်နယ်၊ Saen Tung ဈေးမှာလည်း နိုင်ငံခြားသားတွေ လုပ်ကိုင်ခွင့်မရှိတဲ့ ဈေးရောင်းချမှုတွေ လုပ်ဆောင်နေတဲ့ မြန်မာ ၂ ဦးအပါအဝင် ရွှေ့ပြောင်းအလုပ်သမား ၇ ဦးကို ထပ်မံဖမ်းဆီးခဲ့ပါတယ်။
အဲဒီ ဖမ်းဆီးခံရသူအားလုံးကို သက်ဆိုင်ရာရဲစခန်းတွေမှာ အမှုဖွင့်ထားပြီး ဥပဒေအရ ဆက်လက်အရေးယူသွားမှာ ဖြစ်ပါတယ်။
ထိုင်းအာဏာပိုင်တွေဟာ အခုနောက်ပိုင်းမှာ နိုင်ငံခြားသားတွေလုပ်ကိုင်ခွင့်မရှိတဲ့ အလုပ်အကိုင်တွေကို စစ်ဆေးအရေးယူမှုတွေ ပိုမိုတင်းကျပ်လာနေတာပါ။
ဒါကြောင့် ပြည်ပရောက် မြန်မာအလုပ်သမားတွေအနေနဲ့ အလုပ်အကိုင်နဲ့ ဗီဇာစည်းကမ်းချက်တွေကို အထူးဂရုစိုက်ဖို့ လိုအပ်နေတယ်လို့ အလုပ်သမားအရေး ကူညီပေးနေသူတွေက အကြံပြုထားပါတယ်။
