Border News Agency
ကူဝိတ်၊မတ် ၃၀။
ကူဝိတ်နိုင်ငံတကာလေဆိပ်အတွင်းက ဆီသိုလှောင်ကန်တစ်ခုကို မတ်လ ၂၅ ရက်၊မနက်အစောပိုင်းမှာ အီရန်ရဲ့အသေခံဒရုန်းတစီးက ဝင်ရောက်တိုက်ခိုက်ခဲ့တယ်လို့ ဒေသတွင်းမီဒီယာတွေမှာဖော်ပြပါတယ်။
အဲဒီလို တိုက်ခိုက်ခဲ့တာကြောင့် ဆီသိုလှောင်ကန်တွေမှာ မီးအပြင်းအထန်လောင်ကျွမ်းခဲ့ပြီး ကူဝိတ်မီးသတ်တပ်ဖွဲ့နဲ့ စစ်တပ်က ၅၈ နာရီကြာအောင် ငြှိမ်းသတ်ခဲ့ရပြီးမှ မတ်လ ၂၈ ရက်နေ့မှာ အားလုံးကို ထိန်းချုပ်နိုင်ခဲ့တယ်လို့ဆိုပါတယ်။
ကူဝိတ်လေကြောင်းဦးစီးဌာနရဲ့ ထုတ်ပြန်ချက်အရ ဒီတိုက်ခိုက်မှုကြောင့် အခြေခံအဆောက်အအုံအချို့ ပျက်စီးသွားခဲ့ပေမဲ့ ကံကောင်းထောက်မစွာနဲ့ လူထိခိုက်သေဆုံးတာမျိုးတော့ မရှိခဲ့ဘူးလို့ဆိုပါတယ်။
အဲဒီအချိန်အတွင်းမှာပဲ ကူဝိတ်လေကြောင်းကာကွယ်ရေးစနစ်ကနေ အီရန်ဘက်ကလာတဲ့တခြားဒုံးကျည်တွေနဲ့ ဒရုန်းအများအပြားကိုလည်း ကြားဖြတ်ဟန့်တားနိုင်ခဲ့တယ်လို့ ဆိုပါတယ်။
ဒေသတွင်းစစ်ရေးအခြေအနေတွေ တင်းမာနေတာကြောင့် ကူဝိတ်အစိုးရက လုံခြုံရေးကို အမြင့်ဆုံးအဆင့် တိုးမြှင့်ထားတယ်လို့ဆိုပါတယ်။
ဒါ့အပြင် တိုက်ခိုက်ခံရတဲ့နေရာအနီးမှာ အန္တရာယ်ရှိတဲ့အပိုင်းအစတွေ ကျန်နေနိုင်သေးတာကြောင့် ပြည်သူတွေအနေနဲ့ အဲဒီနေရာနားကို မသွားကြဖို့လည်း သတိပေးချက် ထုတ်ပြန်ထားပါတယ်။
