Border News Agency
ထိုင်း၊ မတ် ၃၀။
ထိုင်းနိုင်ငံ၊ နောင်ခိုင်ခရိုင်၊ သောင်ခွန်မြို့နယ်ရှိ မဲခေါင်မြစ်ကမ်းဘေးမှာ မတ်လ ၃၀ ရက်၊ဒီနေ့မနက်က စိတ်ကြွဆေးပြား ၂ သန်းကျော်ကို ထိုင်းအထူးတပ်ဖွဲ့ အမှတ် ၂၁၁၀ နဲ့ ရေတပ်လုံခြုံရေးအဖွဲ့တို့ ပူးပေါင်းဖမ်းဆီးရမိခဲ့တယ်လို့ ထိုင်းတော်ဝင်တပ်ဖွဲ့က ထုတ်ပြန်ပါတယ်။
အိမ်နီးချင်းနိုင်ငံဘက်ကနေ မဲခေါင်မြစ်ကိုဖြတ်ပြီး မူးယစ်ဆေးဝါးတွေ ခိုးသွင်းလာမယ်ဆိုတဲ့ သတင်းကြိုရထားတာကြောင့်အာဏာပိုင်တွေက မြစ်ကမ်းဘေးမှာ အဖွဲ့ခွဲပြီး ကြိုတင်စောင့်ဆိုင်းနေခဲ့တယ်လို့ဆိုပါတယ်။
အဲဒီလိုစောင့်နေတုန်းမှာပဲ လာအိုဘက်ကနေ စက်လှေတစီးနဲ့ အမျိုးသား ၃ ဦးဟာ မြစ်ကိုဖြတ်ပြီးရောက်ရှိလာတာကို တွေ့ခဲ့ရတယ်လို့ ဆိုပါတယ်။
သူတို့ဟာ အထုပ်အပိုးတွေကို မြစ်ကမ်းဘေးမှာအမြန်ချထားခဲ့ပြီး လာအိုဘက်ကို စက်လှေနဲ့ ချက်ချင်း ပြန်လည်မောင်းနှင် ထွက်ပြေးသွားကြတယ်လို့ဆိုပါတယ်။
အာဏာပိုင်တွေက အဲဒီနေရာကို ဝင်ရောက်စစ်ဆေးတဲ့အခါမှာတော့ အနက်ရောင် ပလတ်စတအိတ်တွေနဲ့ ထုပ်ထားတဲ့ ဆာလာအိတ် ၅ အိတ်ကို တွေ့ရှိခဲ့တာပါ။
အဲဒီအိတ်တွေထဲမှာတော့ စိတ်ကြွဆေးပြား စုစုပေါင်း ၂ သန်းဝန်းကျင် ခန့်မှန်းခြေ သိမ်းဆည်းရမိခဲ့တယ်လို့ဆိုပါတယ်။
အဲဒီသိမ်းဆည်းရမိတဲ့ မူးယစ်ဆေးဝါးတွေကို သက်ဆိုင်ရာစခန်းကို သယ်ဆောင်သွားပြီး တရားခံတွေကို ဖမ်းဆီးရမိဖို့နဲ့ နောက်ကွယ်က ကွင်းဆက်တွေကို ဖော်ထုတ်နိုင်ဖို့အတွက် အာဏာပိုင်တွေက ဆက်လက်ဆောင်ရွက်နေတယ်လို့ဆိုပါတယ်။
