Border News Agency
ပလက်ဝ၊ မတ် ၃၀။
ချင်းပြည်၊ ပလက်ဝမြို့နယ်အတွင်းက ကြောင်ချောင်းကျေးရွာကို မတ်လ ၂၉ ရက်၊ညနေပိုင်းမှာ စစ်ကော်မရှင်တပ်လေကြောင်းတိုက်ခိုက်လို့ ကလေးငယ် ၄ ဦးအပါအဝင် အရပ်သား ၇ ဦး သေဆုံးခဲ့တယ်လို့ အာရက္ခတပ်တော် (AA) ကထုတ်ပြန်ပါတယ်။
အဲဒီ ကြောင်ချောင်းကျေးရွာကို ညနေ ၄ နာရီအချိန်ခန့်က စစ်ကော်မရှင်တပ် တိုက်လေယာဥ် ၂ စီး၊ရော့ကတ်တွေနဲ့ပစ်ခတ်တိုက်ခိုက်ခဲ့တယ်လို့ဆိုပါတယ်။
အဲဒီလိုတိုက်ခိုက်ခဲ့တာကြောင့် ကလေးတွေအပါအဝင် ၇ ဦးသေဆုံးခဲ့ပြီး ၄ ဦးဒဏ်ရာရသွားခဲ့သလို လူနေအိမ်တွေလည်း မီးလောင်ပျက်စီးခဲ့တယ်လို့ဆိုပါတယ်။
စစ်ကော်မရှင်တပ်ဟာ တိုက်ပွဲတွေအတွင်း အထိနာတဲ့အခါတိုင်း စစ်ရေးပစ်မှတ်မဟုတ်တဲ့ အရပ်သားတွေနေထိုင်ရာ ရွာတွေကို ရည်ရွယ်ချက်ရှိရှိ လေကြောင်းတိုက်ခိုက်ပြီးစစ်ရာဇဝတ်မှုတွေကို ကျူးလွန်နေတယ်လို့ ဆိုပါတယ်။
စစ်ကော်မရှင်တပ်ရဲ့ တိုက်ခိုက်မှုကြောင့် သေဆုံး၊ ဒဏ်ရာရရှိခဲ့တဲ့ ကြောင်ချောင်းရွာသူရွာသားတွေအတွက် လူသားချင်းစာနာထောက်ထားမှုဆိုင်ရာ ကူညီမှုတွေကို အာရက္ခပြည်သူ့တော်လှန်ရေးအစိုးရက ဆက်လက်ဆောင်ရွက်ပေးနေတယ်လို့ဆိုပါတယ်။
