Border News Agency
ပဲခူး၊ဧပြီ ၁၂။
ပဲခူးတိုင်းနဲ့ မွန်ပြည်နယ်အတွင်းက စစ်ကော်မရှင်တပ်စခန်းနှစ်ခုကို ပြည်သူ့ကာကွယ်ရေးတပ်မတော် (PDF) အထူးတိုင်းစစ်ဌာနနဲ့ မဟာမိတ်ပူးပေါင်းတပ်ဖွဲ့တွေက ဒီရက်ပိုင်းအတွင်းမှာပဲ တိုက်ခိုက်သိမ်းပိုက်နိုင်ခဲ့တယ်လို့ အထူးတိုင်းစစ်ဌာနက ဧပြီလ ၁၂ ရက်၊ ဒီနေ့ထုတ်ပြန်ပါတယ်။
ပဲခူးတိုင်း၊ ရွှေကျင်မြို့နယ်က လက်ယက်စခန်း ပွိုင့် ၁၂၈ ကို ဧပြီလ ၄ ရက်နေ့ကတည်းက စတင်တိုက်ခိုက်ခဲ့တာဖြစ်ပြီး ဧပြီလ ၇ ရက်နေ့ မနက်ပိုင်းမှာတော့ အပြီးသတ်သိမ်းနိုင်ခဲ့တာပါ။
အဲဒီတိုက်ပွဲအတွင်း စစ်ကော်မရှင်တပ်ဘက်ကရှစ်ဦးသေဆုံးခဲ့ပြီး ၃၀ ဦး ဒဏ်ရာရခဲ့သလို လက်နက်ခဲယမ်းတွေနဲ့ ဂျန်မာစက်၊မီးစက် စတဲ့စစ်သုံးပစ္စည်းအမြောက်အမြားကိုလည်း သိမ်းဆည်းရမိခဲ့တယ်လို့ ဆိုပါတယ်။
အဲဒီအပြင် မွန်ပြည်နယ်၊ ဘီးလင်းမြို့နယ်က လေးကေစခန်းကို ဧပြီလ ၇ ရက်နေ့ကနေ ၁၂ ရက်နေ့အထိ ၅ ရက်ကြာတိုက်ခိုက်ခဲ့တာဖြစ်ပြီး ဒီနေ့မနက်ပိုင်းမှာစခန်းကို အပြီးသတ်ရှင်းလင်းနိုင်ခဲ့တယ်လို့ဆိုပါတယ်။
အဲဒီတိုက်ပွဲမှာ စစ်ကော်မရှင်တပ်ရဲ့ ဒုတပ်ရင်းမှူးအောင်သော်အပါအဝင် ၂ ဦးကို အရှင်ဖမ်းမိခဲ့ပြီး ၅ ဦး သေဆုံးခဲ့တယ်လို့ဆိုပါတယ်။
အဲဒီစခန်းကနေလည်း ငါးကြင်းမြီးအပါအဝင် လက်နက်ခဲယမ်းတွေနဲ့ ဆက်သွယ်ရေးစက် အများအပြားသိမ်းဆည်းရမိခဲ့တယ်လို့ဆိုပါတယ်။
အဲဒီစခန်းသိမ်းတိုက်ပွဲတွေကို PDF အထူးတိုင်းစစ်ဌာနနဲ့အတူ KNLA၊ KNDO၊ ABSDF၊ SOF နဲ့ ဒရုန်းတပ်ဖွဲ့တွေအပါအဝင် တော်လှန်ရေးအင်အားစုတွေ စုပေါင်းတိုက်ခိုက်ခဲ့တာဖြစ်တယ်လို့ ဆိုပါတယ်။
