Border News Agency
အမ်း၊ စက်တင်ဘာ ၈။
အမ်းမြို့နယ်မှာ သမီးအရင်းဖြစ်သူကိုခြောက်နှစ်တိတိအတင်းအဓမ္မပြုကျင့်နေခဲ့တာမို့ ဖခင်ကို အာရက္ခပြည်သူ့တော်လှန်ရေးအစိုးရရဲ့တရားဥပဒေစိုးမိုးရေးနဲ့ပြည်သူ့လုံခြုံရေးတပ်ဖွဲ့ (DLEPS)မှ ဖမ်းဆီးထားပါတယ်။
အဲဒီအမ်းမြို့နယ်၊ ရက္ခတိန်တိုက်နယ်၊ ကျွဲကူးဆိပ်ကျေးရွာမှာ အသက် ၁၈ နှစ်အရွယ်အမျိုးသမီးတဦးကို အသက် ၃၈ နှစ်အရွယ်ဖခင်ဦးညီလှက သူ့သမီး အသက် ၁၂ နှစ်အရွယ်မှစတင်ပြီးအတင်းအဓမ္မပြုကျင့်ခဲ့တာဖြစ်ပါတယ်။
သူမဆေးခန်းပြချိန်မှာ ဖခင်ဖြစ်သူနဲ့ရတဲ့နှစ်လအရွယ်ကိုယ်ဝန်ကို လွယ်ထားရတာကြောင့် မိခင်ဖြစ်သူက စက်တင်ဘာလ ၆ ရက်နေ့မှာ ရဲကိုတိုင်ကြားခဲ့လို့ကျူးလွန်သူကို ဖမ်းဆီးစစ်ဆေးနေတာပါ။
ကျောက်တော်မြို့နယ်မှာ အမျိုးသမီးလေးဦးအပေါ် အတင်းအဓမ္မကျူးလွန်ခဲ့တဲ့ အသက် ၂၅ နှစ်အရွယ်အမျိုးသားတဦးကိုအာရက္ခပြည်သူ့တော်လှန်ရေးအစိုးရရဲ့မြောက်ဦးခရိုင်တရားရုံးမှ စက်တင်ဘာလ ၁ ရက်နေ့က အလုပ်နဲ့ထောင်ဒဏ်အနှစ်လေးဆယ်ချမှတ်လိုက်ပါတယ်။
ဒါပေမယ့် အာရက္ခတပ်တော်ထိန်းချုပ်နယ်မြေတွေမှာ သက်ငယ်မုဒိမ်းမှုတွေအပါအဝင်အတင်းအဓမ္မပြုကျင့်မှုတွေ မကြာခဏဖြစ်ပွားနေတယ်လို့ အာရက္ခပြည်သူတွေက ဆိုကြပါတယ်။
အဲဒီအမှုတွေကို ဖမ်းဆီးအရေးယူအပြစ်ပေးတာတွေ နည်းပါးနေတယ်လို့ ပြည်သူလူထုဝေဖန်ပြောဆိုပြီးနောက် အာရက္ခတပ်တော်က ဖမ်းဆီးအရေးယူအပြစ်ပေးတာတွေပြုလုပ်လာနေတယ်လို့ပြည်သူတွေက ဆိုကြပါတယ်။
ဒါပေမယ့် အပြစ်ပေးအရေးမယူနိုင်သေးတဲ့အမှုတွေအများကြီးရှိနေသေးတာမို့ အမြန်ဆုံးဖမ်းဆီးအရေးယူအပြစ်ပေးဖို့ ပြည်သူတွေကတောင်းဆိုနေကြပါတယ်။
