Border News Agency
မူး၊ မေ ၂၅။
ကော်သူးလေအုပ်ချုပ်မှုနယ်မြေ၊ ခလယ်လွီထူခရိုင်၊ မူးမြို့နယ်အတွင်း ဝင်ရောက်တပ်စွဲထားတဲ့ အာဏာသိမ်းစစ်တပ်ရဲ့ နေရာ ၂ ခုကို ကရင်အမျိုးသားလွတ်မြောက်ရေးတပ်မတော် (KNLA) တိုက်ခိုက်ခဲ့တယ်လို့ ကရင်အမျိုးသားအစည်းအရုံးမှ မေလ ၂၅ ရက်၊ ဒီနေ့မှာ ထုတ်ပြန်ပါတယ်။
အဲဒီမူးမြို့နယ်အတွင်းရှိ ရွာကြီးအင်းနဲ့ တောင်စုကျေးရွာကြားမှာ ဝင်ရောက်တပ်စွဲထားတဲ့ အာဏာသိမ်းစစ်တပ် စကခ – ၂၀ လက်အောက်ခံ ခမရ – ၅၈၂ တပ်ရင်းကို KNLA တပ်မဟာ ၃၊ တပ်ရင်း ၈ က မေလ ၂၂ ရက်နေ့မှာ ပထမအကြိမ် ဝင်ရောက်တိုက်ခိုက်ခဲ့တာပါ။
ဒါ့အပြင် မေလ ၂၃ ရက်နေ့မှာလည်း ဘီဗြဲစခန်းဘေးရှိ ထီးလေးထာနေရာမှာ နေရာယူတပ်စွဲထားတဲ့ ခမရ – ၅၈၂ နဲ့ ခမရ – ၅၈၄ ပူးပေါင်းတပ်ဖွဲ့ကို KNLA ဘက်က ထပ်မံဝင်ရောက်တိုက်ခိုက် ချေမှုန်းခဲ့တယ်လို့ဆိုပါတယ်။
အဲဒီတိုက်ခိုက်မှုတွေအတွင်း အာဏာသိမ်းစစ်တပ်ဘက်က တပ်ကြပ်ကြီး ၁ ဦးအပါအဝင် ၆ ဦးထက်မနည်း သေဆုံးခဲ့ပြီး ထိခိုက်ဒဏ်ရာရရှိမှုတွေလည်း ရှိခဲ့တယ်လို့ဆိုပါတယ်။
KNLA တပ်ဖွဲ့တွေဘက်ကတော့ အထိအခိုက်မရှိဘဲ အောင်မြင်စွာ ပြန်လည်ဆုတ်ခွာနိုင်ခဲ့တယ်လို့ ဆိုပါတယ်။
အဲဒီတိုက်ပွဲအပြီးမှာ အာဏာသိမ်းစစ်တပ်ထံကနေ MA-1 ၆ လက်၊ MA-3 ၄ လက်၊ MA-4 ၁ လက်၊ သံခမောက် ၅ လုံး၊ ကျည်ကာ ၄ စုံ၊ MA-1 ကျည်ဘောက် ၁၅ ခု၊ အီနာကာ MAခွဲဗုံး ၅ လုံး၊ MA ကျည်ဆံ ၂၀၇ တောင့်၊ M-79 ဗုံးသီး ၁၈ လုံး၊ ခေါက်ဆိုလာ ၁ ချုပ်၊ စကားပြောစက် ၁ လုံးနဲ့ ဖုန်း ၁ လုံးတို့ကို သိမ်းယူနိုင်ခဲ့တယ်လို့လည်း ဆိုပါတယ်။
