Border News Agency
ထိုင်း၊ ဇူလိုင် ၅။
ထိုင်းနိုင်ငံ၊ မုတ်ဒါဟန်ပြည်နယ်မှာ ဇူလိုင်လ ၂ ရက်နေ့က အသက်ဆယ့်တနှစ်အရွယ် ယောက်ျားလေးတဦးက မိဘတွေရဲ့ပစ်ကပ်ကားကိုခိုးမောင်းပြီး ဘုရားဖူးကြွနေတဲ့သံဃာတော်တွေကို ဝင်တိုက်မိခဲ့ပါတယ်။
အဲဒီလိုဝင်တိုက်မိခဲ့တာကြောင့် သံဃာတော်ဆယ်ပါးပျံလွန်တော်မူခဲ့ရပြီး နောက်ထပ်အများအပြားလည်း ဒဏ်ရာရရှိခဲ့ပါတယ်။
အဲဒီကလေးဟာ ဥပဒေအရ ဦးနှောက်နဲ့အာရုံကြောဖွံ့ဖြိုးမှုဆိုင်ရာ ချို့ယွင်းချက်ရှိတဲ့ မသန်စွမ်းသူအဖြစ် မှတ်ပုံတင်ထားသူဖြစ်နေတာကြောင့် ရဲတပ်ဖွဲ့ကတရားစွဲဆို အရေးယူနိုင်တာမရှိသေးဘဲ လူမှုဝန်ထမ်းရုံးရဲ့ စောင့်ရှောက်မှုအောက်မှာထားရှိထားပါတယ်။
ဒီလိုဝေဒနာရှင်မျိုးဟာ စိတ္တဇရောဂါ သို့မဟုတ် ရူးသွပ်သူမဟုတ်ပေမယ့် သာမန်လူတွေလိုအကောင်းအဆိုးကို မခွဲခြားနိုင်တာ၊ အကျိုးအပြစ်ကိုမစဉ်းစားဘဲ စိတ်အလိုအတိုင်း မိမိကိုယ်ကိုမထိန်းချုပ်နိုင်ဘဲ ရုတ်တရက်လုပ်ဆောင်မိတာစတဲ့ ဦးနှောက်ပိုင်းဆိုင်ရာမသန်စွမ်းမှု ပြဿနာရှိနေသူဖြစ်ပါတယ်။
အခုအခါမှာတော့ ကလေးကိုစနစ်တကျ ရောဂါရှာဖွေဆန်းစစ်ဖို့အတွက် ဆေးရုံကိုပို့ဆောင်ထားပြီး ဆရာဝန်တွေရဲ့ဆေးစစ်ချက်ထွက်လာမှသာ ရှေ့နေတွေနဲ့ အုပ်ထိန်းသူတွေပါဝင်တဲ့ ဌာနစုံပူးပေါင်းအဖွဲ့နဲ့အတူ ဥပဒေလုပ်ထုံးလုပ်နည်းအတိုင်း ဆက်လက်စစ်ဆေးသွားမှာ ဖြစ်ပါတယ်။
