Border News Agency
ဘယ်လာရုစ်၊ ဩဂုတ်လ ၂၁။
မြန်မာ-ဘယ်လာရုစ်နှစ်နိုင်ငံပူးပေါင်းဆောင်ရွက်မှုတွေမြှင့်တင်နိုင်ဖို့အတွက် နားလည်မှုစာချွန်လွှာနဲ့ သဘောတူညီချက်ကိုးခုကို ဩဂုတ်လ ၂၁ ရက်၊ ဘယ်လာရုစ်စံတော်ချိန် နေ့လယ်ပိုင်းက ဘယ်လာရုစ်နိုင်ငံ၊ မင့်စ်မြို့ရှိ သမ္မတနန်းတော်မှာ လက်မှတ်ရေးထိုးခဲ့ပါတယ်။
အဲဒီလက်မှတ်ရေးထိုးတာကို နှစ်နိုင်ငံကဏ္ဍအလိုက်တာဝန်ရှိသူတွေက အာဏာသိမ်းစစ်ခေါင်းဆောင်မင်းအောင်လှိုင်နဲ့ ဘယ်လာရုစ်နိုင်ငံသမ္မတမစ္စတာ အလက်ဇန္ဒားလူကာရှန်ကိုတို့ရဲ့ ရှေ့မှာပြုလုပ်ခဲ့တာပါ။
အဲဒီအပြင် အာဏာသိမ်းစစ်ခေါင်းဆောင်မင်းအောင်လှိုင်နဲ့ မစ္စတာအလက်ဇန္ဒားလူကာရှန်ကိုတို့ရဲ့ နှစ်နိုင်ငံပူးတွဲ သတင်းစာရှင်းလင်းပွဲကိုလည်း ပြုလုပ်ခဲ့ပါတယ်။
အဲဒီအခမ်းအနားကို အာဏာသိမ်းစစ်ခေါင်းဆောင်မင်းအောင်လှိုင်နဲ့အတူ ခရီးစဉ်မှာလိုက်ပါလာကြတဲ့ ပြည်ထောင်စုဝန်ကြီးတွေ၊ တနင်္သာရီတိုင်းဒေသကြီးဝန်ကြီးချုပ် ဦးဇော်နိုင်ဦး နဲ့ တာဝန်ရှိသူတွေတက်ရောက်ကြပြီး ဘယ်လာရုစ်အစိုးရအဖွဲ့က အဆင့်မြင့်အရာရှိကြီးတွေ တက်ရောက်ခဲ့ကြပါတယ်။
