Border News Agency
ပဲခူး၊ စက်တင်ဘာ ၃။
ပဲခူးမြို့နယ်အတွင်း မိုးသည်းထန်စွာရွာသွန်းပြီး ပဲခူးမြစ်ရေမြင့်တက်လာတာကြောင့် မြို့ပေါ်ရှိအခြေခံပညာကျောင်း တဆယ့်လေးကျောင်းအတွင်းကို ရေဝင်ရောက်ခဲ့ပြီး စက်တင်ဘာလ ၂ ရက်နေ့ကစတင်ကာ ခေတ္တပိတ်ထားရပါတယ်။
အဲဒီလိုရေဝင်ရောက်မှုကြောင့် ကျောင်းဝင်းတွေအတွင်း ရေအနက် ၁ပေ မှ ၄ပေ အထိ ရှိနေပြီး ကျောင်းသား၊ကျောင်းသူ သုံးထောင်ရှစ်ရာသုံးဆယ့်ရှစ်ဦးနဲ့ ဆရာ၊ ဆရာမတရာလေးဆယ့်ကိုးဦးတို့ စာသင်ကြားမှု ခေတ္တရပ်နားထားရတာဖြစ်ပါတယ်။
ရေဝင်ရောက်မှုကြောင့် ပိတ်ထားရတဲ့ကျောင်းတွေကတော့ ကျောက်ကြီးစု၊ မုန်တိုင်း၊ မြို့ဦးကင်း၊ အထက်စီးတီး၊ ရွှေလှေ၊ မဇင်း-ခ၊ လက်ပံခုန်၊ အထက်ဇိုင်းဂနိုင်းကြီး၊ ဥဿာ (ခြောက်) အမက (မူလွန်) ကျောင်းတွေဖြစ်ကြပါတယ်။
အဲဒီအပြင် အောက်စီးတီး၊ မဲခုန်၊ ဖောင်တော်ဦးအလက (ခွဲ) ကျောင်းတွေနဲ့ အထက (လေး)၊ အထက (တဆယ်) ကျောင်းတို့လည်းပါဝင်ပါတယ်။
အဲဒီကျောင်းဝင်းတွေအတွင်း ရေတွေပြန်လည်ကျဆင်းသွားရင် ပိတ်ထားခဲ့ရတဲ့စာသင်ရက်တွေအတွက် သင်ကြားရေး မထိခိုက်စေဖို့ တနင်္ဂနွေနေ့တွေမှာ အစားထိုးပြန်လည်သင်ကြားပေးသွားမယ်လို့ သိရပါတယ်။
