Border News Agency
ကျောက်တော်၊ စက်တင်ဘာ ၄။
အာရက္ခတပ်တော်(AA)ထိန်းချုပ်ထားတဲ့ ကျောက်တော်မြို့နယ်က ဖမ်းဆီးခံထားရသူတဆယ့်ခုနှစ်ဦးကို ပြန်လွှတ်ပေးကြဖို့ မိသားစုတွေတောင်းဆိုနေကြပါတယ်။
အဲဒီလူငယ်တွေဟာ မူးယစ်ဆေးဝါးသုံးစွဲတယ်ဆိုပြီး နေအိမ်တွေ၊လမ်းတွေက ရက္ခိုင်အမျိုးသားအဖွဲ့ချုပ်/အာရက္ခတပ်တော်(ULA/AA)က ဖမ်းဆီးခေါ်ဆောင်သွားတာလို့ မိသားစုဝင်တွေက အတ ည်ပြုပြောကြပါတယ်။
အဲဒီအထဲက ကျောင်းသား၊ကျောင်းသူတွေ၊အမျိုးသမီးတွေ၊ဒီလပ်တပ်ဖွဲ့ဝင်တွေကို ပြန်လွှတ်ပေးပေမယ့်လူငယ်တဆယ့်ခုနှစ်ဦးကို ပြန်လွှတ်မပေးသေးဘူးလို့ မိသားစုဝင်တွေကဆိုကြပါတယ်။
“တခြားသူတွေကို ပြန်လွှတ်ပေးသလို ကျန်တဲ့တဆယ့်ခုနှစ်ဦးကိုလည်း ပြန်လွှတ်ပေးဖို့တောင်းဆိုပါတယ်။ အဲဒီအထဲမှာလေးဆယ်ငါးရက်သင်တန်းဆင်းတွေလည်းပါပါတယ်။ မိသားစုဝင်တွေအဆက်အသွယ်မရပါဘူး။ စစ်သင်တန်းကျောင်းမှာတွေ့တယ်လို့တချို့ပြောကြပါတယ်။”လို့ ကျောက်တော်မြို့မှ မိသားစုဝင်တဦးက သတင်းစာရှင်းလင်းပွဲမှာပြောပါတယ်။
အဲဒီကျောက်တော်မြို့နယ်၊ပိုက်သည်ရပ်ကွက်က မောင်အောင်မျိုးလွင်၊ မောင်အောင်မျိုးဆက်၊မောင်ထွန်းဝေ၊ မောင်မောင်ချေ၊ မောင်မောင်ကြီး၊ မောင်ကိုနိုင်ချေ၊ မောင်ငြိမ်းချမ်း၊ မောင်ကျော်စိုးမင်း၊ မောင်ကျော်နိုင်သန်း၊ မောင်မျိုးမြင့်အောင်၊ မောင်စိုးမြတ်ထွန်း၊ မောင်ကျော်နိုင်သန်းနဲ့ ကျောက်တော်မြို့ ၊မြို့သစ်ရပ်ကွက်က မောင်ကျော်စိုးမင်း၊ မောင်မျိုးမြင့်အောင်၊ မောင်စိုးမြတ်ထွန်း၊မောင်ဖြိုးအေးဇော်နဲ့ မောင်ရွှေအေး(ခေါ်)သားဘုသျှေဟာ ULA/AA က ဖမ်းဆီးခေါ်ဆောင်သွားပြီးနောက်မိသားစုဝင်တွေနဲ့အဆက်အသွယ်မရကြဘူးလို့ ဆိုကြပါတယ်။
အဲဒီရက္ခိုင်အမျိုးသားအဖွဲ့ချုပ်/အာရက္ခတပ်တော်(ULA/AA)ကို အသနားခံတိုင်ကြားစာတွေပို့ပေမယ့်လက်မခံကြသလို လက်ရှိရောက်ရှိနေတဲ့နေရာ၊ လက်ရှိအခြေအနေတွေကို စုံစမ်းမေးမြန်းလို့မရကြတာမို့ စက်တင်ဘာလ ၃ ရက်၊ မနေ့က မိသားစုဝင်တွေ သတင်းစာရှင်းလင်းပွဲလုပ်တောင်းဆိုခဲ့ကြပါတယ်။
အဲဒီကျောက်တော်မြို့နယ်ထဲက ဒီလပ်တပ်ဖွဲ့ဝင်ခုနှစ်ဦးအပါအဝင် မူးယစ်ဆေးဝါးသုံးစွဲမှုရောင်းဝယ်ဖောက်ကားမှုတွေနဲ့ အမျိုးသား၊အမျိုးသမီးခုနှစ်ဆယ်ခုနှစ်ဦးကို ဇူလိုင်လက ရက္ခိုင်အမျိုးသားအဖွဲ့ချုပ်/အာရက္ခတပ်တော်(ULA/AA)ဖမ်းဆီးခဲ့ပါတယ်။
အဲဒီအထဲက ကျောင်းသားလူငယ်တဆယ့်ကိုးဦးကို သြဂုတ်လ ၁၁ ရက်နေ့မှာ မိသားစုတွေဆီ တရားဝင်ပြန်အပ်ပေးခဲ့သလို နောက်ထပ်ပြန်လွှတ်ပေးတာတွေလည်းရှိပါတယ်။
“တာဝန်ရှိသူတွေကိုပြောချင်တာက ကျမတို့ကလေးတွေကိုသက်ညှာမှုနဲ့ပြန်လွတ်ပေးစေချင်ပါတယ်။ လူကြီးတွေကိုအသနားခံပြီး ကျမတို့ရဲ့သားသမီးတွေကိုပြန်လွတ်ပေးစေကြောင်းတင်ပြစေချင်ပါတယ်။ လွတ်သွားတဲ့ကလေးတွေလိုမျိုးတန်းတူတန်းမျှ ကျမတို့ရဲ့သားသမီးတွေကို ပြန်လွတ်စေချင်တဲ့ဆန္ဒတခုပါပဲ။” လို့ ကျောက်တော်မြို့မှမိသားစုဝင်တဦးက သတင်းစာရှင်းလင်းပွဲမှာပြောပါတယ်။
အဲဒီလူငယ်တွေကို မူးယစ်ဆေးဝါးသုံးစွဲမှုနဲ့ ဖမ်းဆီးစစ်ဆေးနေတာမို့ တစုံတရာကျူးလွန်ထားတာတွေပေါ်ပေါက်ရင်ဥပဒေအတိုင်းသာအပြစ်ပေးအရေးယူစေချင်းပြီး အတင်းအဓမ္မစစ်မှုထမ်းခိုင်းတာတွေ မလုပ်စေချင်ဘူးလို့ မိသားစုဝင်တွေကဆိုကြပါတယ်။
အဲဒီလူငယ်တွေကို အတင်းအဓမ္မစစ်သင်တန်းတက်ခိုင်းထားတာမို့ စစ်သင်တန်းမှာတွေ့ရတယ်လို့ မြင်တွေ့ကြရသူတွေက မိသားစုဝင်တွေကိုပြောတယ်လို့ ဆိုကြပါတယ်။
အာရက္ခတပ်တော်ထိန်းချုပ်နယ်မြေတွေမှာ အရပ်သားလူငယ်တွေကို ရက္ခိုင်အမျိုးသားအဖွဲ့ချုပ်/အာရက္ခတပ်တော်က အကြောင်းအမျိုးမျိုးပြပြီး အတင်းအဓမ္မဖမ်းဆီးစစ်သင်တန်းတက်ခိုင်းနေတယ်လို့ ပြည်သူတွေပြောဆိုဝေဖန်နေကြပါတယ်။
