Border News Agency
ဇင်းမယ်၊ စက်တင်ဘာ ၄။
ထိုင်းနိုင်ငံ၊ပတ္တယားမြို့မှာရှိတဲ့ ဘားတခုမှာရန်ဖြစ်ခဲ့တဲ့ အမေရိကန်လေယာဉ်တင်သင်္ဘော USS Abraham Lincoln ပေါ်မှ စစ်သားနှစ်ဦးကို သင်္ဘောပေါ်မှာပဲအကျဥ်းချခံထားရပါတယ်။
အဲဒီအမေရိကန်စစ်သားနှစ်ဦးဟာ ကမ်းခြေသို့ဆင်းခွင့်ရပြီး နာရီပိုင်းအလိုမှာပဲ ပတ္တယား Walking Street အနီးရှိ ဘားတခု အပြင်ဘက်မှာရန်ဖြစ်ခဲ့ကြတာဖြစ်ပါတယ်။
စက်တင်ဘာ ၃ ရက်၊မနက် ၁ နာရီခွဲခန့်မှာ ဒေသခံတဦးရဲ့ သတင်းပေးပို့ချက်အရ ထိုင်းရဲတပ်ဖွဲ့က သွားရောက်စစ်ဆေးခဲ့ပြီး သူတို့ကို အမေရိကန်-ထိုင်း ပူးတွဲစစ်ဆင်ရေးစခန်းမှတဆင့် စစ်သင်္ဘောဆီ ပြန်လည်လွှဲပြောင်းပေးခဲ့ပါတယ်။
အဲဒါကြောင့် သူတို့နှစ်ဦးဟာ ကမ်းခြေသို့ ထပ်မံဆင်းခွင့်ရတော့မှာမဟုတ်ဘဲ ငါးရက်ကြာကမ်းကပ်ချိန်မှာ ကျန်ရှိတဲ့ရက်တွေကိုသင်္ဘောပေါ်မှာပဲ အချုပ်ခံရမှာဖြစ်ပါတယ်။
စစ်သည်ငါးထောင်ခန့်ပါဝင်တဲ့ USS Abraham Lincoln သင်္ဘောဟာ စက်တင်ဘာလ ၂ ရက်နေ့က ထိုင်းနိုင်ငံ လမ်ချဘမ်းဆိပ်ကမ်းသို့ဆိုက်ကပ်ခဲ့တာဖြစ်ပြီး လာမယ့်တနင်္ဂနွေနေ့မှာ ဆန်ဒီယာဂိုသို့ ပြန်လည်ထွက်ခွာမှာဖြစ်ပါတယ်။
