Border News Agency
ရသေ့တောင်၊ စက်တင်ဘာ ၅။
အာရက္ခတပ်တော်(AA)ထိန်းချုပ်ထားတဲ့ ရသေ့တောင်မြို့နယ်၊အငူမော်ကို အာဏာသိမ်းစစ်တပ် ကမ်းတက်ဖို့ကြိုးစားနေတယ်လို့ ဒေသခံတွေက အတည်ပြုပြောကြပါတယ်။
အဲဒီရသေ့တောင်မြို့နယ်၊အငူမော်ကို အာဏာသိမ်းစစ်တပ်က ကြည်း၊ရေ၊လေပူးပေါင်းပစ်ခတ်လမ်းရှင်းပြီး ကမ်းတက်ခြေကုပ်ယူပြန်သိမ်းဖို့ကြိုးစားနေတာလို့ ဒေသခံတွေကဆိုကြပါတယ်။
အဲဒီရသေ့တောင်မြို့နယ်၊အငူမော်ကို စက်တင်ဘာလ ၄ ရက်နေ့က အာဏာသိမ်းစစ်တပ် ရေတပ်စစ်သင်္ဘောတွေက လက်နက်ကြီးပစ်ခတ်တာမို့ ကျေးရွာအတွင်းကျရောက်တာတွေရှိခဲ့ပြီး ဒေသခံတွေဘေးလွတ်ရာကို ထွက်ပြေးနေကြရတယ်လို့ဆိုကြပါတယ်။
“နေဗီတွေက လက်နက်ကြီးတွေတအားပစ်ပါတယ်။ စစ်တွေကလည်းတအားပစ်ပါတယ်။လက်နက်ကြီးတွေရွာထဲမှာကျပါတယ်။ ရွာသားတွေကတော့ထွက်ပြေးတိမ်းရှောင်သွားကြပါပြီ။စစ်တပ်ကအငူမော်ကို ပြန်ကမ်းတက်ဖို့ကြိုးစားနေတာပါ။ စစ်တပ်ကကမ်းပေါ်ခြေကုပ်ရသွားရင်တော့ မယူကမ်းတကမ်းလုံးမလွယ်ပါဘူး။”လို့ အငူမော်ရွာသားတဦးက Border News Agency ကိုပြောပါတယ်။
အဲဒီရသေ့တောင်မြို့နယ်၊မိုးစဲကမ်းရှိ ကြက်ရိုးဆိပ်ရွာနဲ့ ညောင်ပင်ကြီးရွာကြားကို စက်တင်ဘာလ ၃ ရက်နေ့၊နေ့လယ် ၁ နာ ရီ ၃၅ မိနစ်ခန့်မှစတင်ပြီး အာဏာသိမ်းစစ်တပ်တိုက်လေယာဉ်လေးစီးဟာ မိနစ်သုံးဆယ်အတွင်းအကြိမ်သုံးဆယ်ခန့်ဗုံးကြဲတိုက်ခိုက်ခဲ့တယ်လို့ အာရက္ခတပ်တော်ထုတ်ပြန်ပါတယ်။
အဲဒီရသေ့တောင်မြို့နယ်အပါအဝင် စစ်တွေမြို့နယ်အစပ်နေရာတွေကို စက်တင်ဘာလ ၄ ရက်နေ့ကလည်း အာဏာသိမ်းစစ်တပ်က ကြည်းရေလေပူးပေါင်းပစ်ခတ်တာတွေ အပြင်းအထန်လုပ်နေတယ်လို့ ဒေသခံတွေကဆိုကြပါတယ်။
အဲဒါဟာ အာဏာသိမ်းစစ်တပ်က ကြည်း ရေ လေပူးပေါင်းစစ်ဆင်ရေးလုပ်ပြီး တန်ပြန်ထိုးစစ်ဆင်တိုက်ခိုက်ဖို့ကြိုးစားနေတာလို့ ဒေသခံတွေကဆိုကြပါတယ်။
“စစ်တပ်ကအရင်မပစ်ခဲ့တဲ့နေရာတွေကိုလည်း အပြင်းအထန်ပစ်ခတ်နေပါတယ်။ အသံတွေကမနားတမ်းကြားနေရပါတယ်။ ကမ္ဘာပြိုသလိုပါပဲ။ နေရာစုံကပစ်နေတာပါ။ တိုက်လေယာဥ်တွေနဲ့လည်း လာကြဲပါတယ်။ မြေတွေတောင်တုန်ခါသွားပါတယ်။ စစ်တပ်ကပြန်ထိုးစစ်ဆင်ဖို့တိုက်နေတာထင်ပါတယ်။”လို့ ရသေ့တောင်ဒေသခံတဦးက Border News Agency ကို ပြောပါတယ်။
အဲဒီစစ်တွေမြို့ရှိ အာဏာသိမ်းစစ်တပ်ရဲ့လက်နက်ကြီးအထိုင်စခန်းခုနှစ်နေရာက လက်နက်ကြီးပစ်ခတ်တိုက်ခိုက်ပေးသလို စစ်သင်္ဘောတွေကလည်းလက်နက်ကြီးပစ်ခတ်တိုက်ခိုက်တယ်လို့ အာရက္ခတပ်တော်ထုတ်ပြန်ပါတယ်။
အဲဒီအပြင် အာဏာသိမ်းစစ်တပ်တင့်ကားနှစ်စီးကလည်း လက်နက်ကြီးတွေပစ်ခတ်တိုက်ခိုက်တယ်လို့ အာရက္ခတပ်တော်ထုတ်ပြန်ပါတယ်။
အဲဒီလို အာဏာသိမ်းစစ်တပ်က လေကြောင်းပစ်ကူအပြင်းအထန်ယူပြီး ကြည်းရေလေပူးပေါင်းပစ်ခတ်နေတာဟာတန်ပြန်ထိုးစစ်ဆင်ဖို့ စစ်ဦးချိုးနေတာဖြစ်သလို လေကြောင်းတိုက်ခိုက်မှုတချို့ထိရောက်မှုရှိနေတယ်လို့ စစ်ရေးစောင့်ကြည့်လေ့လာနေကြသူတွေကဆိုကြပါတယ်။
အဲဒီစစ်တွေမြို့ပတ်ပတ်လည်နေရာတွေကို ကြည်းရေလေပူးပေါင်းပစ်ခတ်နေတာတွေဟာ အပြင်းထန်ဆုံးတိုက်ပွဲတွေဖြစ်နေသလိုဖြစ်ပြီး မောင်တောမြို့ပေါ်ထိ ကြားနေကြရတယ်လို့ မောင်တောမြို့ခံတွေက ဆိုကြပါတယ်။
“မောင်တောတောင်ပိုင်း၊အငူမော်ဖက်ကပစ်ခတ်သံတွေကို အပြင်းထန်ဆုံးကြားနေရပါတယ်။ လေယာဥ်လာသံတွေ၊ဗုံးချသံတွေကို အကျယ်ကြီးကြားနေရပါတယ်။ မြေတွေတောင်တုန်ခါသွားပါတယ်။ မနက်အာရုံတက်ချိန်ထိကြားနေရပါတယ်။ တညလုံးတိုက်နေကြသလိုပါ။”လို့ မောင်တောမြို့ခံတဦးက Border News Agency ကို ပြောပါတယ်။
အဲဒီရသေ့တောင်မြို့နယ်၊အငူမော်၊မယူကမ်းအပြင် မိုးစဲကမ်းကိုလည်း ကမ်းတက်ခြေကုပ်ယူပြန်သိမ်းဖို့ကြိုးစားနေတာမို့ ကမ်းအနီးအနားရှိကျေးရွာတွေအရေးပေါ်ပြောင်းနေကြရတယ်လို့ ဒေသခံတွေက ဆိုကြပါတယ်။
အဲဒါကြောင့် ကမ်းခြေ၊ချောင်းကမ်းနံဘေးအပါအဝင် မြို့တွေ၊ရွာတွေမှာ အာဏာသိမ်းစစ်တပ်ပစ်ခတ်တိုက်ခိုက်မှုတွေကို အထူးသတိထားကြဖို့ ရက္ခိုင်အမျိုးသားအဖွဲ့ချုပ် အသိပေးတိုက်တွန်းထားပါတယ်။
အာဏာသိမ်းစစ်တပ်ဟာ ပုဏ္ဏားကျွန်းမြို့နယ်အပါအဝင် ရသေ့တောင်၊သံတွဲ၊ဂွစတဲ့မြို့နယ်တွေကိုလည်း ကမ်းတက်စစ်ဆင်ရေးတွေလုပ်ပြီး တန်ပြန်ထိုးစစ်ဆင်ဖို့ကြိုးစားနေတယ်လို့ မြေပြင်စစ်ရေးသတင်းရင်းမြစ်တွေကဆိုကြပါတယ်။
