Border News Agency

​ကမ္ဘာ့ကျန်းမာရေးအဖွဲ့ (WHO) ရဲ့ မြန်မာနိုင်ငံဆိုင်ရာ ဌာနေကိုယ်စားလှယ် Dr. Thushara Fernando နဲ့ နိုင်ငံခြားရေးဝန်ကြီးဌာနက တာဝန်ရှိသူတွေ နေပြည်တော်မှာတွေ့ဆုံခဲ့တယ်လို့သိရပါတယ်။ အဲဒီလို တွေ့ဆုံရာမှာမြန်မာနိုင်ငံအတွင်း ဆက်လက်ဆောင်ရွက်မယ့် ကျန်းမာရေးဆိုင်ရာလုပ်ငန်းစဉ်တွေနဲ့ ပတ်သက်ပြီးဖေဖော်ဝါရီလ ၁၈ ရက်နေ့မှာ တွေ့ဆုံဆွေးနွေးခဲ့ကြတာပါ။ အဲ​ဒီတွေ့ဆုံမှုအတွင်းမှာတော့ Dr. Thushara Fernando ရဲ့ မြန်မာနိုင်ငံအတွင်း တာဝန်ထမ်းဆောင်ခဲ့တဲ့ ကာလအတွင်း WHO နဲ့ ပူးပေါင်းဆောင်ရွက်ခဲ့မှု အခြေအနေတွေကိုလည်းဆွေးနွေးခဲ့ကြတယ်လို့ဆိုပါတယ်။ အဲဒီအပြင်ရှေ့ဆက်ပြီးဆောင်ရွက်သွားမယ့် ကျန်းမာရေးဆိုင်ရာ လုပ်ငန်းအစီအစဉ်တွေကိုပါ ထည့်သွင်းဆွေးနွေးခဲ့ကြတယ်လို့ ဆိုပါတယ်။ ​WHO ရဲ့ မြန်မာနိုင်ငံဆိုင်ရာ ဌာနေကိုယ်စားလှယ် Dr. Thushara Fernando ဟာ အခုအခါမှာတော့ မြန်မာနိုင်ငံမှာ တာဝန်ထမ်းဆောင်မှု သက်တမ်းပြီးဆုံးပြီဖြစ်တာကြောင့် ပြန်လည်ထွက်ခွာတော့မှာ ဖြစ်ပါတယ်။

​အာရက္ခပြည်၊ စစ်တွေခရိုင်အတွင်းမှာ နီပါးဗိုင်းရပ်စ် (Nipah Virus) ကြိုတင်ကာကွယ်နိုင်ဖို့အတွက် အာရက္ခပြည်သူ့ကျန်းမာရေးဌာနနဲ့ ပူးပေါင်းအဖွဲ့တွေက အသိပညာပေးလုပ်ငန်းတွေကို အရှိန်အဟုန်နဲ့ လုပ်ဆောင်နေကြပါတယ်။ ​ပြီးခဲ့တဲ့ဇန်နဝါရီလ ၁၀ ရက်နေ့ကစပြီး စစ်တွေခရိုင်အတွင်းက လူစည်ကားရာ လမ်းမတွေ၊ဈေးတွေ၊ ကားဂိတ်တွေနဲ့ လမ်းဆုံလမ်းခွတွေမှာ အသိပညာပေးဗီနိုင်းတွေ ချိတ်ဆွဲတာနဲ့ လက်ကမ်းစာစောင် ဖြန့်ဝေတာတွေကို ပူးပေါင်းလုပ်ဆောင်ခဲ့ကြတာပါ။ ​နီပါးဗိုင်းရပ်စ် ကူးစက်ခံရရင် ကနဦးလက္ခဏာတွေအနေနဲ့ ဖျားနာတာ၊ ကြွက်သားနာကျင်တာ၊ ခေါင်းကိုက်တာ၊ အော့အန်တာအပြင် ပြင်းထန်ရင် ဦးနှောက်ယောင်တာနဲ့ တက်တာတွေအထိ ဖြစ်ပွားနိုင်တယ်လို့ သိရပါတယ်။ ​ဒါကြောင့်မို့လို့ ပြည်သူတွေအနေနဲ့ နီပါးဗိုင်းရပ်စ် သံသယဖြစ်ဖွယ် လက္ခဏာတွေ ခံစားရရင် အနီးအနားမှာရှိတဲ့ ပြည်သူ့ကျန်းမာရေးဌာနတွေကို အမြန်ဆုံး ဆက်သွယ်အကြောင်းကြားကြဖို့နဲ့ ညွှန်ကြားချက်တွေကို တိတိကျကျ လိုက်နာကြဖို့လည်း တိုက်တွန်းနှိုးဆော်ထားပါတယ်။ အာရက္ခပြည်သူ့ကျန်းမာရေးဌာနအနေနဲ့ ဒေသခံပြည်သူတွေ ရောဂါဘယကင်းဝေးစေဖို့အတွက် အခုလို အသိပညာပေးတာတွေကို ဆက်တိုက်လုပ်ဆောင်နေတာဖြစ်ပါတယ်။

​ထိုင်းနိုင်ငံ၊ ချောင်ပူရီခရိုင်၊ ဖန်ထောင်မြို့နယ်အတွင်းရှိ ဆေးစပ်စက်ရုံတခုမှာ ဖေဖော်ဝါရီလ ၁၈ ရက်၊နေ့လည်ပိုင်းက အပြင်းအထန် မီးလောင်ကျွမ်းမှု ဖြစ်ပွားခဲ့တယ်လို့ အရှေ့ပိုင်းဒေသ မီးသတ်စေတနာ့ဝန်ထမ်းအသင်းက ထုတ်ပြန်ထားပါတယ်။ ​အဲဒီ ဆေးစပ်စက်ရုံမှာ နေ့လည် ၃ နာရီ ၁၀ မိနစ်လောက်ကစပြီး မီးတင်လောင်ခဲ့တာဖြစ်ကာ မီးသတ်တပ်ဖွဲ့ဝင်တွေ ချက်ချင်းရောက်ရှိ ငြှိမ်းသတ်ခဲ့ပေမယ့်လည်း စက်ရုံအတွင်းမှာရှိတဲ့ ဆေးနဲ့ ဓာတုပစ္စည်းတွေကြောင့် မီးအရှိန်ဟာ ထိန်းမနိုင်သိမ်းမရ ပြင်းထန်ခဲ့ပါတယ်။ အဲဒီနောက် ညနေ ၄ နာရီခွဲအထိ တစ်နာရီခွဲကျော်ကြာတဲ့တိုင် မီးကိုမထိန်းချုပ်နိုင်သေးဘဲ အနက်ရောင် မီးခိုးလုံးကြီးတွေ ကောင်းကင်ယံအထိ တက်နေတာကို တွေ့ရှိခဲ့ရတယ်လို့ ဒေသခံတွေက ပြောပါတယ်။ ​အဲဒါကြောင့် မီးသတ်တပ်ဖွဲ့ဝင်တွေဟာ စေတနာ့ဝန်ထမ်းတွေနဲ့ အင်အားဖြည့်တင်းကာ ဝိုင်းဝန်းငြှိမ်းသတ်ခဲ့ကြလို့ ညနေ ၆ နာရီခွဲမှာတော့ မီးကို အလုံးစုံ ထိန်းချုပ်နိုင်ခဲ့ပါတယ်။ အဲဒီမီးလောင်မှုကြောင့် အသက်ဆုံးရှုံးသူ မရှိပေမယ့် မီးခိုးမွှန်တာနဲ့ ဒဏ်ရာအနည်းငယ် ရရှိခဲ့တဲ့ အလုပ်သမားနှစ်ဦးကိုတော့ ဆေးရုံသို့ ပို့ဆောင်ထားရပါတယ်။ ​မီးဟာ စက်ရုံရဲ့ထုတ်လုပ်မှုလိုင်းကနေ စတင်ခဲ့တာဖြစ်ပြီး ဆေးနဲ့ သီနာဂိုဒေါင်တခုလုံး ပြာကျသွားခဲ့ရာ ပဏာမခန့်မှန်းချက်အရ ဆုံးရှုံးမှုတန်ဖိုးဟာ ဘတ် ၁၀ သန်းကျော် ရှိနိုင်တယ်လို့ သိရပါတယ်။ ဒါ့အပြင် ဆေးစပ်စက်ရုံဖြစ်တဲ့အတွက် မီးခိုးငွေ့တွေမှာ အဆိပ်သင့်ဓာတုပစ္စည်းတွေ ပါဝင်နိုင်တာကြောင့် အနီးအနားရှိ ပြည်သူတွေအနေနဲ့ လေအောက်အရပ်မှာ မနေကြဖို့နဲ့ နှာခေါင်းစည်း (Mask) များ တပ်ဆင်ထားကြဖို့ကိုလည်း အသိပေးထားပါတယ်။ ​ကနဦး စုံစမ်းစစ်ဆေးချက်တွေအရ ဒီမီးလောင်မှုဟာ ဆေးစပ်စက်အတွင်း ဓာတုပစ္စည်းတွေ ပေါက်ကွဲရာကနေတစ်ဆင့် စတင်ခဲ့တာဖြစ်တယ်လို့ သိရပါတယ်။

​၁ဗမာအမျိုးသားတော်လှန်ရေးတပ်မတော် (BNRA) အဖွဲ့ခေါင်းဆောင် ဗိုလ်နဂါး အပါအဝင် အဖွဲ့ဝင်တွေရဲ့ ရာဇဝတ်မှု ကျူးလွန်မှုတွေနဲ့ ပတ်သက်ပြီး အမျိုးသားညီညွတ်ရေးအစိုးရ (NUG)၊ ပြည်ထဲရေးနဲ့ လူဝင်မှုကြီးကြပ်ရေးဝန်ကြီးဌာနက ဖေဖော်ဝါရီလ ၁၈ ရက်နေ့မှာ သတင်းထုတ်ပြန်လိုက်ပါတယ်။ အဲဒီ ဗိုလ်နဂါးနဲ့အဖွဲ့ဟာ မုဒိမ်းကျင့်ဖို့ ကြံစည်မှုနဲ့လူသတ်အလောင်းဖျောက်မှု၊ PDF ရဲဘော်တွေကို ပစ်ခတ်သတ်ဖြတ်မှု၊ ပကဖ ရဲဘော် ၁၀ ဦးကို နှိပ်စက်မှုနဲ့ အမျိုးသမီးငယ် ၂ ဦးကို သက်ငယ်မုဒိမ်းကျင့်မှုအပါအဝင် အမှုပေါင်း ၇ ခုထက်မနည်း ကျူးလွန်ခဲ့တယ်လို့ ဆိုပါတယ်။ ​ဒီလို ရာဇဝတ်မှုတွေကို ပြည်သူ့ရဲတပ်ဖွဲ့က လုပ်ထုံးလုပ်နည်းတွေနဲ့အညီ စုံစမ်းစစ်ဆေးနိုင်ဖို့ ကျူးလွန်သူတွေကို လွှဲပြောင်းပေးဖို့ အကြောင်းကြားခဲ့ပေမဲ့ BNRA ဘက်က လွှဲပြောင်းပေးတာ မရှိခဲ့ဘူးလို့ ဆိုပါတယ်။ ​ဒါကြောင့် ဖေဖော်ဝါရီလ ၁၇ ရက်နေ့မှာ NUG ကာကွယ်ရေးဝန်ကြီးဌာနရဲ့ အကူအညီနဲ့ ဖမ်းဆီးထိန်းသိမ်းဖို့ ဆောင်ရွက်ခဲ့ရာမှာ BNRA အဖွဲ့ဝင်အချို့က ပြန်လည်ခုခံခဲ့လို့ ပစ်ခတ်မှုတွေဖြစ်ပွားခဲ့ပြီး၊ BNRA အဖွဲ့ဝင်အချို့ကို လက်နက်တွေနဲ့အတူ ဖမ်းဆီးထိန်းသိမ်းနိုင်ခဲ့တယ်လို့ဆိုပါတယ်။ ​လက်ရှိမှာတော့ BNRA တပ်ဖွဲ့ဝင် ၁၅၀ ခန့်ဟာ PDF နဲ့ ပကဖ တွေထံကို ချိတ်ဆက်အဖမ်းခံတာ၊ လာရောက်ပူးပေါင်းတာနဲ့ လက်နက်အပ်နှံတာတွေ ပြုလုပ်နေကြပြီလို့လည်း ပြည်ထဲရေးဝန်ကြီးဌာနက အသိပေးထားပါတယ်။ ​အဲဒီဗိုလ်နဂါးနဲ့အဖွဲ့ရဲ့ ကျူးလွန်မှုတွေကို အရေးယူဆောင်ရွက်နေတဲ့ ဖြစ်စဉ်နဲ့ ပတ်သက်ပြီး နောက်ဆက်တွဲထုတ်ပြန်ချက်တွေကိုလည်း လိုအပ်သလို ဆက်လက် ထုတ်ပြန်သွားမယ်လို့ဆိုပါတယ်။ ​အဲဒီဗိုလ်နဂါးနဲ့ မိသားစုဝင်တွေဟာလက်နက်မျိုးစုံ ၆ လက်၊ ဆက်စပ်ပစ္စည်းတွေနဲ့အတူ စစ်ကိုင်းတိုင်းဒေသကြီး၊ပုလဲမြို့နယ်နယ်မြေခံလုံခြုံရေးတပ်စခန်းတခုဆီသို့ ဖေဖော်ဝါရီလ ၁၇ ရက်၊ညနေ၄နာရီ ၅၀ မိနစ်မှာအလင်းဝင်လာတယ်လို့ စစ်ကော်မရှင်တပ်က ထုတ်ပြန်ထားပါတယ်။

ကမ္ဘောဒီးယားနိုင်ငံရဲ့ နယ်စပ်ရှေ့တန်းစစ်မျက်နှာပြင်မှာ ငြိမ်းချမ်းရေးနဲ့ လုံခြုံရေး ပိုမိုခိုင်မာလာစေဖို့အတွက် ကမ္ဘောဒီးယားတော်ဝင်တပ်မတော် (RCAF) က ခံစစ်ဘန်ကာတွေကို အရှိန်အဟုန်နဲ့ အဆင့်မြှင့်တင် တည်ဆောက်နေတယ်လို့ သိရပါတယ်။  ​အဲဒီလိုတည်ဆောက်ရာမှာ ဖနွမ်းပင်မြို့က ပုဂ္ဂလိကစီးပွားရေးလုပ်ငန်းရှင်တွေကလည်း နိုင်ငံတော်လုံခြုံရေးအတွက် ရှေ့တန်းစစ်သည်တွေကို အားပေးကူညီတဲ့အနေနဲ့ လိုအပ်တဲ့ ပစ္စည်းကိရိယာတွေကို ဝိုင်းဝန်းထောက်ပံ့ပေးခဲ့ကြပါတယ်။ ​အဲဒီ ပုဂ္ဂလိကကဏ္ဍကနေ ဘန်ကာတည်ဆောက်ရာမှာ အသုံးပြုဖို့အတွက် မော်တော်ကားတာယာ ၁,၃၀၀ ကျော်နဲ့ ဆာလာအိတ်ခွံ ၂၀,၀၀၀ ကျော်ကို ထောက်ပံ့ပေးခဲ့တာဖြစ်ပါတယ်။ ​အဲဒီ တည်ဆောက်ရေးပစ္စည်းတွေကို ဖေဖော်ဝါရီလ ၁၆ ရက်နေ့ကစပြီး နယ်စပ်ကို သယ်ယူခဲ့တာဖြစ်ကာ ဖေဖော်ဝါရီလ ၁၇ ရက်နေ့မှာတော့ စစ်သည်တွေဟာ ကွန်ကရစ်တိုင်တွေကို ကိုယ်တိုင်ထမ်းပိုးပြီး တောင်ကုန်းပေါ်က ခံစစ်စခန်းတွေကို အင်တိုက်အားတိုက် တည်ဆောက်နေကြပါတယ်။ ​အဲဒီလို ခံစစ်စခန်းတွေ အဆင့်မြှင့်တင်တာဟာ ရှေ့တန်းရောက်စစ်သည်တွေရဲ့ ဘေးကင်းရေးနဲ့ နယ်စပ်ဒေသ တည်ငြိမ်ရေးအတွက် ကြိုတင်ပြင်ဆင်တဲ့ လှုပ်ရှားမှုတခုလည်း ဖြစ်ပါတယ်။ ​ဒီလုပ်ဆောင်ချက်တွေကြောင့် နယ်စပ်တလျှောက်မှာရှိတဲ့ ဒေသခံပြည်သူတွေအတွက် ပိုမိုလုံခြုံတဲ့ ပတ်ဝန်းကျင်တခုကို ဖန်တီးပေးနိုင်မယ်လို့ ကမ္ဘောဒီးယားစစ်ဘက် သတင်းရင်းမြစ်တွေအရ သိရပါတယ်။

ကရင်နီပြည်၊ ဖားဆောင်းမြို့နယ်ရှိ သံလွင်မြစ်ကူးတံတား (ဖားဆောင်းတံတား) ဟာ ဖေဖော်ဝါရီလ၁၇ ရက်၊မနက်အစောပိုင်းမှာ ကျိုးကျပျက်စီးသွားခဲ့ပါတယ်။ ​အဲဒီတံတားဟာ မိုင်းခွဲခံရမှုကြောင့် ကျိုးကျသွားတာဖြစ်ပြီး လက်ရှိမှာတော့ လမ်းပန်းဆက်သွယ်ရေး လုံးဝပြတ်တောက်သွားပြီလို့ သိရပါတယ်။ ​တိုးတက်သောကရင်နီပြည်သူ့အင်အားစု (PKPF) ဘက်ကတော့ စစ်ကော်မရှင်တပ်ရဲ့ လက်နက်ကြီးနဲ့ ဒရုန်းဗုံးဒဏ်တွေကြောင့် အရည်အသွေးမမီတဲ့ ဒီတံတားဟာ ကျိုးကျသွားတာလို့ မီဒီယာတွေကိုဖြေထားတာတွေ့ရပါတယ်။ တဖက်မှာလည်း စစ်ကော်မရှင်ဘက်ကတော့ ဒီတံတားပျက်စီးမှုဟာ တော်လှန်ရေးတပ်ဖွဲ့တွေရဲ့ လက်ချက်ကြောင့် ဖြစ်တယ်လို့ တန်ပြန်ထုတ်ပြန်ထားတာ တွေ့ရပါတယ်။ ​ဖားဆောင်းမြို့နယ်အတွင်းမှာ စစ်ကော်မရှင်တပ်က အင်အားအလုံးအရင်းနဲ့ ထိုးစစ်ဆင်နေတာကြောင့် နှစ်ဖက်တိုက်ပွဲတွေ ပြင်းထန်နေတဲ့အချိန်မှာ အခုလို တံတားကျိုးကျခဲ့တာပါ။ အဲဒီတံတားပျက်စီးသွားတဲ့အတွက် ဒေသခံပြည်သူတွေအနေနဲ့ သွားလာရေး၊ ကုန်စည်စီးဆင်းမှုမှာ အကြီးအကျယ် ခက်ခဲမှာကို အထူးစိုးရိမ်နေကြပါတယ်။

​ထိုင်းနိုင်ငံ၊ ချင်းမိုင်ခရိုင်၊ မယ်အေးမြို့နယ်မှာ ဖေဖော်ဝါရီလ ၁၇ ရက်၊ ညနေပိုင်းက စစ်ဆေးရေးဂိတ်ကိုတိုက်ပြီး မောင်းနှင်ထွက်ပြေးတဲ့ ဆိုင်ကယ်တွေကို လိုက်လံဖမ်းဆီးရာကနေ ဘိန်းစိမ်း ၆၀ ကီလိုကျော်နဲ့ စိတ်ကြွဆေးပြားတချို့ကို သိမ်းဆည်းရမိခဲ့ပါတယ်လို့ ထိုင်းသတင်းတွေအရသိရပါတယ်။ ​အဲဒီဖမ်းဆီးမှုကို ဖာမိူင်းတပ်ရင်း (Pha Muang Force) နဲ့အတူ မူးယစ်ဆေးဝါး တားဆီးနှိမ်နင်းရေး အထူးအဖွဲ့တွေ၊နယ်ခြားစောင့်ရဲတပ်ဖွဲ့နဲ့ မယ်အေးမြို့နယ် အုပ်ချုပ်ရေးအဖွဲ့တို့ ပူးပေါင်းပြီး ဆောင်ရွက်ခဲ့တာ ဖြစ်ပါတယ်။ ​အဲဒီမယ်အေးကျေးရွာအုပ်စု၊ပန်တွန်းဒေယား လမ်းပိုင်းမှာ ညနေ ၅ နာရီကျော်အချိန် Honda Wave အပါအဝင် ဆိုင်ကယ် ၂ စီးဟာ စစ်ဆေးရေးဂိတ်ကို တိုက်ပြီး ထွက်ပြေးဖို့ ကြိုးစားခဲ့တာပါ။ ​အဲဒါကြောင့် အာဏာပိုင်တွေက လိုက်လံဖမ်းဆီးတဲ့အချိန် ဆိုင်ကယ်ပေါ်မှာ ကျောပိုးအိတ်သဏ္ဌာန် ပြုပြင်ထားတဲ့ ဆာလာအိတ် ၄ အိတ်အတွင်းကနေ ဘိန်းစိမ်း ၆၀.၈ ကီလိုဂရမ်နဲ့ စိတ်ကြွဆေးပြား ၁၀ ပြားကို ရှာဖွေတွေ့ရှိခဲ့တာဖြစ်ပါတယ်။ ​အဲဒီ မူးယစ်ဆေးဝါး သယ်ဆောင်လာသူ ၂ ဦးက ဆိုင်ကယ်တွေကို လမ်းဘေးမှာ စွန့်ပစ်ခဲ့ပြီး ဘေးပတ်ဝန်းကျင်က တောတွင်းထဲကို ထွက်ပြေးလွတ်မြောက်သွားခဲ့ကြပါတယ်။ ​လက်ရှိမှာတော့ သက်ဆိုင်ရာက သိမ်းဆည်းရမိတဲ့ မူးယစ်ဆေးဝါးတွေကို မယ်အေးမြို့နယ်ရဲစခန်းကို ပေးအပ်လိုက်ပြီး ထွက်ပြေးသွားတဲ့ တရားခံတွေကို ဖမ်းဝရမ်းထုတ်နိုင်ဖို့အတွက် အမြန်ဆုံး စုံစမ်းစစ်ဆေးနေတယ်လို့ သိရပါတယ်။

​ထိုင်းနိုင်ငံ၊ အုထိုင်းထာနီခရိုင်မှာ အညစ်အကြေးစုပ်ကားအတွင်း ရောနှောဖုံးကွယ်ပြီး သယ်ဆောင်လာတဲ့ စိတ်ကြွဆေးပြား ၈ သန်းကျော်ကို သက်ဆိုင်ရာအာဏာပိုင်တွေက ဖမ်းဆီးရမိခဲ့တယ်လို့ ထိုင်းသတင်းတွေအရသိရပါတယ်။ ​ဒီဖမ်းဆီးမှုကို မူးယစ်ဆေးဝါးတားဆီးနှိမ်နင်းရေးဌာန (NSB) နဲ့ ဒေသခံရဲတပ်ဖွဲ့တို့ ပူးပေါင်းပြီး ဖေဖော်ဝါရီလ ၁၆ ရက်နေ့မှာလုပ်ဆောင်ခဲ့တာဖြစ်ကာ မနေ့က သတင်းစာရှင်းလင်းပွဲပြုလုပ်ပြီး အသေးစိတ်ပြသခဲ့တာပါ။ ​မြောက်ပိုင်းနယ်စပ်ကနေ တောင်ပိုင်းကို အညစ်အကြေးစုပ်ကားနဲ့ မူးယစ်ဆေးသယ်လာမယ်ဆိုတဲ့ သတင်းအရ အလိုအလျောက်လိုင်စင်ဖတ်စနစ် (LPR) နဲ့ စောင့်ကြည့်ကာ ဘန်ရိုင်းမြို့နယ်မှာ တားဆီးစစ်ဆေးခဲ့တာ ဖြစ်ပါတယ်။ ​အဲဒီစစ်ဆေးမှုတွေအရ ကားနောက်ခန်းက အညစ်အကြေးစုပ်ကန်အတွင်း အနံ့အသက်ဆိုးတွေကြား ဝှက်ယူလာတဲ့ စိတ်ကြွဆေးပြား ၈၄ အိတ် (စုစုပေါင်း ၈.၄ သန်းနီးပါး) ကို ရှာဖွေဖော်ထုတ်နိုင်ခဲ့ပါတယ်။ ​အဲဒီ ဖမ်းဆီးရမိသူမှာ အသက် ၃၉ နှစ်အရွယ် နိုင်ဝုသီချိုင်း ဖြစ်ပြီး သူဟာ ဆေးပြားတွေကို ချင်းရိုင်ကနေ ထိုင်းတောင်ပိုင်းကို ပို့ဆောင်ပေးဖို့အတွက် သယ်ဆောင်ခ ဘတ် ၅ သိန်းနဲ့ လက်ခံခဲ့တာလို့ ဆိုပါတယ်။ ​လက်ရှိမှာ အာဏာပိုင်တွေက တရားခံကို မူးယစ်ဆေးဝါး ရောင်းဝယ်ဖောက်ကားမှုနဲ့ အမှုဖွင့်ထားပြီး ကျန်ရှိနေတဲ့ ကွင်းဆက်တရားခံတွေကို ဆက်လက်စုံစမ်းဖော်ထုတ်နေတယ်လို့ သိရပါတယ်။

အမ်းမြို့နယ်၊ ကံ့ကော်ရိပ်ရွာမှာ ဖေဖော်ဝါရီလ ၁၃ ရက်နေ့က စစ်ကျန်လက်နက်ပေါက်ကွဲလို့ လူငယ်တဦးဒဏ်ရာရသွားခဲ့တယ်လို့သိရပါတယ်။ အဲဒီအမ်းမြို့နယ်၊ ကံ့ကော်ရိပ်ရွာမှ အသက် ၁၅ နှစ်အရွယ် မောင်ငြိမ်းချမ်းကျော်မှာ မျက်နှာတခုလုံးဒဏ်ရာရသွားခဲ့တယ်လို့သိရပါတယ်။ သူဟာ ဖေဖော်ဝါရီလ ၁၃ ရက်နိ၊မနက်၁၁ နာရီခွဲအချိန်ခန့်က အဖေဖြစ်သူဦး ကျော်နိုင်နဲ့တတူ ကံ့ကော်ရိပ်ရွာအရှေ့ဖက်က သီဟို၌ခြံမှာ မြက်ရှင်းလင်းရာကနေ စစ်ကျန်လက်နက်ကို ဓားနဲ့ခုတ်မိရာ ပေါက်ကွဲမှုဖြစ်ကာ ဒဏ်ရာပြင်းပြင်းထန်ထန်ရသွားခဲ့တယ်လို့ ရွာသားတွေကဆိုကြပါတယ်။ အဲဒီ မိုင်းပေါက်ကွဲတဲ့နေရာအနီးအနားမှာ စစ်ကော်မရှင်တပ်က စခန်းချနေထိုင်ခဲ့ပြီး မြေမြုပ်မိုင်းထောင်တာ၊လက်နက်စွန့်ပစ်တာတွေပြုလုပ်ခဲ့တယ်လို့ရွာသားတွေကဆိုကြပါတယ်။ အာရက္ခတပ်တော်ထိန်းချုပ်နယ်မြေမှာ ကလေးတွေအပါအဝင် လူကြီးတွေဟာလည်း စစ်ကျန်လက်နက်ပစွည်းတွေကို ထိတွေ့ကိုင်တွယ်ပြီး မကြာခဏသေဆုံး၊ဒဏ်ရာရတာတွေရှိနေကြပါတယ်။ အာရက္ခတပ်တော်ဟာ သူတို့ ထိန်းချုပ်မြို့နယ်တွေမှာ မိုင်းရှင်းလင်းရေးတွေ လုပ်ဆောင်နေပေမယ့် အရပ်သားပြည်သူတွေကတော့ မြေမြုပ်မိုင်းအန္တရာယ်တွေ၊ စစ်ကျန်လက်နက်အန္တရာယ်တွေကိုလည်း မကြာခဏကြုံတွေ့နေကြရသလို သေဆုံးဒဏ်ရာရထိခိုက်တာတွေ မကြာခဏဖြစ်နေကြတယ်လို့ အာရက္ခပြည်သူတွေက ဆိုကြပါတယ်။ အာရက္ခပြည်သူ့တော်လှန်ရေးအစိုးရဟာ မိုင်းအသိပညာပေးမှုတွေ၊ မြေမြုပ်မိုင်းအန္တရာယ်ဟောပြောပွဲတွေကို ပြည်သူလူထုတွေကြားမှာ လုပ်ဆောင်နေပြီး မိုင်းအသိပညာဝေတာတွေ၊ မိုင်းအန္တရာယ်ဆိုင်ရာ သတိပေးတာတွေကို ပုံမှန်လုပ်ဆောင်နေပါတယ်။ ဒါပေမယ့် အာရက္ခပြည်သူတွေဟာ စစ်ကောင်စီတပ်ရဲ့ မိုင်းတွေ၊ စစ်ကျန်လက်နက်အန္တရာယ်တွေကို မကြာခဏကြုံတွေ့နေကြရတာမို့ မိုင်းရှင်းလင်းပေးတာတွေ၊ မိုင်အသိပညာပေးတာတွေကို ပိုမိုဆောင်ရွက်ပေးဖို့ လိုအပ်နေသေးတယ်လို့ အာရက္ခပြည်သူတွေက ဆိုကြပါတယ်။

​ထိုင်းနိုင်ငံ၊ ဆောင်ခလာခရိုင်က စာသင်ကျောင်းအတွင်း သေနတ်ပစ်ခတ်မှုကြောင့် သေဆုံးခဲ့ရတဲ့ကျောင်းအုပ်ဆရာမကြီး နန်းစစီဖတ် (Mrs. Sasipat) ရဲ့တော်ဝင်မီးသင်္ဂြိုဟ်အခမ်းအနားကို ဖေဖော်ဝါရီလ ၁၇ ရက်၊နေ့လည်ကခမ်းခမ်းနားနား ကျင်းပခဲ့ပါတယ်။ ​အဲဒီအခမ်းအနားသို့ ဒုတိယဝန်ကြီးချုပ်နဲ့ ပြည်ထဲရေးဝန်ကြီးဖြစ်သူနိုင်အနုထင် ချန်ဝီရကူလ် ဦးဆောင်တဲ့အစိုးရအဖွဲ့ဝင်ဝန်ကြီးတွေ တက်ရောက်ခဲ့ကြပြီး ဆောင်ခလာခရိုင်၊ဘန်ဂလန်မြို့နယ်ရှိ ဝပ်ယူးထောင်ဘုရားကျောင်းမှာ အခမ်းအနားကို ဦးဆောင်ကျင်းပပေးခဲ့တာပါ။ ​အခမ်းအနားအတွင်းမှာ ဝန်ကြီးချုပ်က သေဆုံးသူကျောင်းအုပ်ဆရာမကြီးရဲ့ မိခင်ဖြစ်သူကို သွားရောက်အားပေးခဲ့ပြီး မိခင်ကြီးရဲ့ ယပေါင်ပေါ် ဦးခေါင်းချကာ အစိုးရကိုယ်စား အကာအကွယ်မပေးနိုင်ခဲ့မှုအတွက် "တောင်းပန်ပါတယ်" လို့ ဆိုကာ ထူးထူးခြားခြား ဂါရဝပြုခဲ့ပါတယ်။ ​အဲဒီအပြင် ကျန်ရစ်သူသားသမီးနှစ်ဦးအတွက်လည်း ပညာသင်ကြားမှု ပြီးဆုံးတာနဲ့ အစိုးရဝန်ထမ်း အရာရှိတွေအဖြစ် တိုက်ရိုက်ခန့်အပ်ဖို့ ပညာရေးဝန်ကြီးဌာနကို ချက်ချင်းညွှန်ကြားခဲ့သလို ပညာသင်စရိတ် အားလုံးကိုလည်းအစိုးရက တာဝန်ယူပေးသွားမှာ ဖြစ်ပါတယ်။ ​အဲဒီဝန်ကြီးချုပ်ရုံးနဲ့ တရားရေးဝန်ကြီးဌာန ရန်ပုံငွေတွေထဲကနေ စုစုပေါင်း ထိုင်းဘတ် ၁.၂ သန်းကိုလည်း ကျန်ရစ်သူမိသားစုအတွက် ထောက်ပံ့ပေးခဲ့တယ်လို့ သိရပါတယ်။ ​ကျောင်းအုပ်ဆရာမကြီး နန်းစစီဖတ်ဟာ ပြီးခဲ့တဲ့ ဖေဖော်ဝါရီလ ၁၁ ရက်နေ့ကစာသင်ကျောင်းအတွင်း စိတ်မနှံ့သူတဦးရဲ့ ဝင်ရောက်ပစ်ခတ်မှုကြောင့် ဒဏ်ရာပြင်းထန်စွာရရှိခဲ့ပြီး ဆေးရုံမှာကုသမှုခံယူနေစဉ် ဖေဖော်ဝါရီလ ၁၂ ရက်နေ့မှာ ကွယ်လွန်သွားခဲ့တာ ဖြစ်ပါတယ်။