သတင်း
မောင်တောဒေသနွေစပါးစိုက်ပျိုးမှု အောင်မြင်နေပေမယ့်သွင်းအားစုနဲ့ စက်ကိရိယာအကူအညီတွေလိုအပ်နေ
အာရက္ခတပ်တော်(AA) ထိန်းချုပ်ထားတဲ့မောင်တောဒေသအတွင်း ခုနှစ်နွေစပါးစိုက်ပျိုးမှုတွေဟာ အရင်နှစ်တွေကထက် ပိုမိုဖြစ်ထွန်းအောင်မြင်နေပေမယ့် သွင်းအားစုနဲ့ စက်ကိရိယာအကူအညီတွေ လိုအပ်နေကြတယ်လို့ တောင်သူတွေကဆိုကြပါတယ်။ အာရက္ခဒေသအတွင်း စားနပ်ရိက္ခာဖူလုံရေးအတွက် မောင်တောမြို့နယ်ရှိ ဆည်တွေနဲ့ ရေချိုတောင်ကျချောင်းတွေအနီးရှိ မြေနေရာတွေကိုအဓိကထားကာ ခု ၂၀၂၆ ခုနှစ်အတွင်း အားတက်သရော စိုက်ပျိုးနေကြတာဖြစ်တယ်လို့ဆိုကြပါတယ်။ အဲဒါကြောင့် စိုက်ပျိုးရေးတိုးချဲ့ဖို့အတွက်အကူအညီတွေလိုအပ်နေတယ်လို့ နွေစပါးစိုက်တောင်သူတွေကဆိုကြပါတယ်။ "နွေစပါးတိုးချဲ့ဖို့အတွက်ဆိုရင် အဓိက မြေဆီ၊မြေဩဇာနဲ့ ပိုးသတ်ဆေးတွေ လိုအပ်ပါတယ်။နောက်ထပ် ဧကပြတ်အောင် တိုးချဲ့စိုက်ပျိုးလို့ရပေမယ့် လယ်ထွန်စက်နဲ့ လုပ်အားခစရိတ်တွေ အခက်အခဲရှိနေပါတယ်။ဒါကြောင့် အကူအညီတွေလိုပါတယ်။"လို့ မောင်တောမြို့နယ်ရှိ နွေစပါးစိုက်တောင်သူတဦးက Border News Agency ကိုပြောပါတယ်။ အဲဒီ မောင်တောမြို့နယ်မှာ အာရက္ခပြည်သူ့တော်လှန်ရေးအစိုးရရဲ့ လမ်းညွှန်မှုနဲ့အတူ တိုက်ပွဲတွေကြောင့် ပျက်စီးသွားတဲ့ စိုက်ပျိုးရေးကဏ္ဍပြန်လည်ဦးမော့လာစေဖို့ အတွက်ရွယ်ရည်ပြီးစိုက်ပျိုးနေကြတာလို့ဒေသခံတွေကဆိုကြပါတယ်။ အဲဒါကြောင့် တိုက်ပွဲတွေငြိမ်သက်လာရင် စိုက်ပျိုးရေးတွေပိုမိုတိုးချဲ့လုပ်ကိုင်ချင်တယ်လို့ တောင်သူတွေကဆိုကြပါတယ်။ "တိုင်းပြည်အေးချမ်းလာရင် နွေစပါးတင်မကဘဲ မိုးစပါးပါ ဒီထက်ပိုပြီးတိုးချဲ့လုပ်ကိုင်ချင်ပါတယ်။ အခုလောလောဆယ်တော့ ဒီနွေစပါးစိုက်ခင်းတွေကိုပဲ ရှိတာလေးနဲ့အကောင်းဆုံးဖြစ်အောင် ပြုပြင်လုပ်ကိုင်နေရတာပါ။"လို့ တောင်သူတဦးကဆိုပါတယ်။ အာရက္ခဒေသတွင်း ရိက္ခာဖူလုံရေးအတွက် အရေးပါတဲ့ နွေစပါးစိုက်ပျိုးမှု ပိုမိုအောင်မြင်လာစေဖို့ ခေတ်မီစိုက်ပျိုးရေးနည်းပညာတွေနဲ့စက်ကိရိယာအကူအညီတွေအကူအညီတွေလိုအပ်နေတာလို့ဆိုကြပါတယ်။ အဲဒါကြောင့် မောင်တောဒေသ နွေစပါးပိုပြီးဖြစ်ထွန်းအောင်မြင်ဖို့ သက်ဆိုင်ရာတာဝန်ရှိသူတွေအနေနဲ့ အကူအညီတွေပေးဖို့ တောင်သူတွေကတောင်းဆိုနေကြပါတယ်။
Read more
စစ်ရေးလေ့ကျင့်ဖို့ အမေရိကန်ရဲ့ Apache တိုက်ခိုက်ရေးရဟတ်ယာဉ်နဲ့ စစ်လက်နက်တွေ ထိုင်းကိုရောက်ရှိ
အာရှ - ပစိဖိတ်ဒေသမှာ အကြီးဆုံးဖြစ်တဲ့ Cobra Gold 2026 ပူးတွဲစစ်ရေးလေ့ကျင့်မှုမှာ ပါဝင်ဖို့အတွက် အမေရိကန်တပ်မတော်ရဲ့ ခေတ်မီတိုက်ခိုက်ရေးရဟတ်ယာဉ်တွေနဲ့ စစ်လက်နက်ကိရိယာတွေဟာ ဖေဖော်ဝါရီလ၂၀ ရက်၊ မနေ့က ထိုင်းနိုင်ငံ၊ ဆာတာဟစ်ရေတပ်အခြေစိုက်စခန်းကို ဆိုက်ရောက်လာခဲ့ပါတယ်။ အခုရောက်ရှိလာတဲ့ စစ်လက်နက်ပစ္စည်းတွေထဲမှာ နာမည်ကျော် AH-64E Apache တိုက်ခိုက်ရေးရဟတ်ယာဉ်တွေ၊ M777 အမြောက်ကြီးတွေအပြင် သံချပ်ကာလူနာတင်ယာဉ်တွေနဲ့ ဘီးတပ်သံချပ်ကာယာဉ် အမျိုးမျိုးလည်း ပါဝင်နေတာကို တွေ့ရပါတယ်။ အဲဒီအပြင် စစ်ဘက်သုံး ထောက်ပံ့ရေးယာဉ်တွေနဲ့ ဆက်သွယ်ရေးကိရိယာ အမြောက်အများကိုလည်း ဆာတာဟစ်ဆိပ်ကမ်းမှာ ချမှတ်ခဲ့ပြီးနောက်၊သတ်မှတ်ထားတဲ့ စစ်ရေးလေ့ကျင့်ရေးကွင်းတွေဆီကို ဆက်လက်ပို့ဆောင်သွားမယ်လို့ နယ်စပ်သတင်းရင်းမြစ်တွေဆီက သိရပါတယ်။ ဒီနှစ်ကျင်းပမယ့် Cobra Gold စစ်ရေးလေ့ကျင့်မှုဟာ ထိုင်းနဲ့ အမေရိကန်တပ်ဖွဲ့ဝင်တွေအပြင် တခြားမဟာမိတ်နိုင်ငံပေါင်းစုံက စစ်သည်တော်တွေလည်း ပါဝင်တက်ရောက်ကြမယ့် နိုင်ငံစုံစစ်ရေးလေ့ကျင့်မှုကြီးတခုလည်း ဖြစ်ပါတယ်။ အဲဒီလေ့ကျင့်မှုမှာ စစ်ရေးဆိုင်ရာ ပူးပေါင်းဆောင်ရွက်မှုတွေသာမက လူသားချင်းစာနာထောက်ထားမှုနဲ့ သဘာဝဘေးအန္တရာယ် ကူညီကယ်ဆယ်ရေး လေ့ကျင့်ခန်းတွေကိုပါ ထည့်သွင်းပြုလုပ်သွားဖို့ ရှိနေတယ်လို့ သိရှိရပါတယ်။
Read more
စစ်ဘေးဒဏ်ကနေ ငတ်မွတ်မှုဒဏ်ဆီသို့ ဦးတည်လာနေတဲ့ မောင်တော
အာရက္ခတပ်တော် (AA) သိမ်းပိုက်ထိန်းချုပ်ထားတဲ့ မောင်တောမြို့မှာ မြို့သိမ်းတိုက်ပွဲအပြီး နောက်ဆက်တွဲအဖြစ် အလုပ်အကိုင်နဲ့ ဝင်ငွေတွေလုံးဝပြတ်တောက်သွားတာကြောင့် အခြေခံလူတန်းစားတွေဟာ ငတ်မွတ်ခေါင်းပါးမှုဒဏ်ကို အပြင်းအထန် ရင်ဆိုင်နေကြရပါတယ်။ အဲဒီလို စားဝတ်နေရေး ကျပ်တည်းမှုတွေကြောင့် မြို့ပေါ်မှာရှိတဲ့ ရခိုင်၊ မွတ်ဆလင်နဲ့ ဟိန္ဒူ တချို့ဟာ တောင်းရမ်းစားသောက်ပြီးတော့ပဲ ခက်ခဲစွာ အသက်ဆက်နေကြရတာ ဖြစ်ပါတယ်။ မိသားစုထမင်းတနပ် အဆင်ပြေဖို့အတွက် ကိုယ့်ရဲ့ရင်သွေးငယ်တွေကိုပါ လမ်းဘေးခေါ်ထုတ်ပြီး တောင်းရမ်းခိုင်းနေရတဲ့ မြင်ကွင်းတွေဟာ မြို့ပေါ်မှာ နေ့စဉ်နဲ့အမျှ ပိုပြီးများပြားလာနေတာပါ။ မောင်တောဒေသဟာ စစ်ဘေးဒဏ်ကနေ ငတ်မွတ်မှုဒဏ်ဆီကို ကူးပြောင်းရောက်ရှိနေတာကြောင့် ဒီအခြေခံလူတန်းစားတွေအတွက် စားနပ်ရိက္ခာနဲ့အလုပ်အကိုင် အခွင့်အလမ်းတွေ အရေးပေါ် ဖော်ဆောင်ပေးဖို့ လိုအပ်နေပါတယ်။
Read more
ဗိုလ်နဂါးရဲ့BNRA အဖွဲ့ဝင် ၅ ဦး လက်နက်တွေနဲ့အတူ စစ်ကော်မရှင်ဆီအလင်းဝင်
စစ်ကိုင်းတိုင်း၊ ပုလဲမြို့နယ်အတွင်းမှာ လှုပ်ရှားနေတဲ့ ဗမာနိုင်ငံလုံးဆိုင်ရာ တော်လှန်ရေးတပ်ဦး (BNRA) အဖွဲ့က ဒုတိယအဖွဲ့ခေါင်းဆောင် အပါအဝင် အဖွဲ့ဝင် ၅ ဦးဟာ ဖေဖော်ဝါရီလ ၂၀ ရက် မွန်းလွဲပိုင်းမှာ လက်နက်ခဲယမ်းတွေနဲ့အတူ အလင်းဝင်လာတယ်လို့ စစ်ကော်မရှင်တပ်ကထုတ်ပြန်ပါတယ်။ အဲဒီအလင်းဝင်လာသူတွေထဲမှာ BNRA ရဲ့ ဒုတိယအဖွဲ့ခေါင်းဆောင်တဦး၊တတိယတာဝန်ခံတဦးနဲ့ အဖွဲ့ဝင် ၃ ဦး ပါဝင်ပြီး သူတို့နဲ့အတူ လက်နက်မျိုးစုံ ၅ လက်နဲ့ ဆက်စပ်ပစ္စည်းတွေကိုပါ ယူဆောင်လာခဲ့တယ်လို့ဆိုပါတယ်။ သူတို့ဟာ ပုလဲမြို့နယ်အတွင်းရှိ လုံခြုံရေးတပ်စခန်းတခုထံ လာရောက်ဆက်သွယ်ခဲ့ကြတာဖြစ်ပြီး အဖွဲ့ခေါင်းဆောင်ဖြစ်သူ ဗိုလ်နဂါး (ခ) နိုင်လင်း အလင်းဝင်သွားပြီးနောက်ပိုင်း အခုလို ထပ်မံဝင်ရောက်လာကြတာလည်း ဖြစ်ပါတယ်။ အဲဒီအဖွဲ့ဝင် ၅ ဦးကို နယ်မြေခံတပ်ဌာနချုပ်က တာဝန်ရှိသူတွေက လက်ခံထားပြီး လိုအပ်တဲ့ စိစစ်မှုတွေနဲ့ ထောက်ပံ့မှုတွေကို လုပ်ထုံးလုပ်နည်းတွေအတိုင်း ဆက်လုပ်သွားမယ်လို့ဆိုပါတယ်။
Read more
ထိုင်းစစ်တပ်ကိုနှောင့်ယှက်ဖို့ တောမီးရှို့ရာမှ ကမ္ဘောဒီးယားစခန်းနဲ့တရုတ်ကာစီနိုတန်းလျားပါ မီးလောင်
Border News Agency ကမ္ဘောဒီးယား၊ ဖေဖော်ဝါရီ ၂၀။ ထိုင်း - ကမ္ဘောဒီးယားနယ်စပ်၊ အိုစမတ် (O Smach) ဒေသရှေ့တန်းမျက်နှာစာမှာ ကမ္ဘောဒီးယားစစ်သားတွေက ထိုင်းစစ်တပ်ကိုနှောင့်ယှက်ဖို့ တောမီးတမင်ရှို့ခဲ့ရာကနေ မီးကူးစက်မှုတွေဖြစ်ပြီး သူတို့ရဲ့စောင့်ကြည့်ရေးစခန်းနဲ့ အနီးနားရှိ တရုတ်ကာစီနို အလုပ်သမားတန်းလျားတွေ မီးလောင်ပျက်စီးသွားခဲ့တယ်လို့သိရပါတယ်။ အဲဒီ နယ်စပ်မျဉ်းအနီးရှိ ကမ္ဘောဒီးယားစစ်တပ်ရဲ့ စောင့်ကြည့်ရေးစခန်း (Observation Base) မှာ ဖေဖော်ဝါရီလ ၁၉ ရက်၊ ည ၁၀ နာရီ ၅၀ မိနစ်အချိန်ခန့်က မီးလောင်မှုစတင်ဖြစ်ပွားခဲ့တာ ဖြစ်ပါတယ်။ အဲဒီတောမီးဟာ ကမ္ဘောဒီးယားစစ်တပ်ဘက်ကနေ ရှေ့တန်းမှာရှိနေတဲ့ ထိုင်းစစ်သားတွေကို စိတ်အနှောင့်အယှက်ဖြစ်စေဖို့နဲ့ ခြိမ်းခြောက်ဖို့အတွက် တမင်ရည်ရွယ်ရှို့ခဲ့တာလို့ စစ်ဘက်သတင်းတွေမှာ ဖော်ပြထားပါတယ်။ ဒါပေမယ့် လေကြောင်းအခြေအနေကြောင့် မီးကိုထိန်းချုပ်လို့မရဘဲ ကမ္ဘောဒီးယားစစ်တပ်ရဲ့စောင့်ကြည့်ရေးစခန်းကိုပါ ကူးစက်လောင်ကျွမ်းခဲ့ပြီး စခန်းတခုလုံးပျက်စီးသွားခဲ့တာ ဖြစ်ပါတယ်။ အဲဒီအပြင် မီးဟာဆက်လက်ပြန့်နှံ့သွားခဲ့ရာ အိုစမတ်ဒေသရှိတရုတ်လုပ်ငန်းရှင်တွေရဲ့ ကာစီနိုဆောက်လုပ်ရေးလုပ်ငန်းခွင်က အလုပ်သမားတန်းလျားကိုပါ ကူးစက်လောင်ကျွမ်းခဲ့တယ်လို့ စစ်ဘက်သတင်းက အတည်ပြုထားပါတယ်။ အခုမီးလောင်မှုဟာ ကမ္ဘောဒီးယားစစ်တပ်ဘက်က စတင်ရှို့ခဲ့တာလို့ ခိုင်လုံတဲ့သတင်းတွေကဆိုထားပြီး မီးလောင်မှုကြောင့် လူထိခိုက်ဒဏ်ရာရရှိမှု အခြေအနေကိုတော့ အသေးစိတ်မသိရသေးပါဘူး။ အဲဒီနေရာဟာ ထိုင်းနိုင်ငံ၊ ဆူရင်ခရိုင်၊ ကပ္ပချန်းမြို့နယ်နယ်စပ်နဲ့ မျက်နှာချင်းဆိုင်မှာ ရှိပါတယ်။
Read more
ဖိလစ်ပိုင်မှာ မြေပြိုမှုကြောင့် ကိုယ်ဝန်ဆောင်မိခင်အပါအဝင် ၇ ဦး သေဆုံး
Border News Agency မာတီစီးတီး၊ ဖေဖော်ဝါရီ ၂၀ ဖိလစ်ပိုင်နိုင်ငံ၊ ဒါဗာအိုအိုရီယမ်တယ် (Davao Oriental) ပြည်နယ်၊ မာတီစီးတီး (Mati City) မှာ ဖေဖော်ဝါရီလ၂၀ ရက်၊ ဒီနေ့မနက်ပိုင်းက မိုးသည်းထန်စွာရွာသွန်းပြီး မြေပြိုမှုဖြစ်ပွားခဲ့ရာ နေအိမ်တလုံးမြေပိသွားတာကြောင့် မိသားစုတစုလုံးသေဆုံးသွားခဲ့တယ်လို့ မာတီစီးတီးမီးသတ်စခန်းက ထုတ်ပြန်ထားပါတယ်။ အဲဒီမြေပြိုမှုအတွင်း သေဆုံးသူတွေဟာ အသက် ၄၀ အရွယ် အမျိုးသားတဦး၊ အသက် ၃၈ နှစ်အရွယ် ကိုယ်ဝန်ဆောင်မိခင်နဲ့ အသက် ၁၃ နှစ်နဲ့ ၅ နှစ်အရွယ် သမီးငယ်နှစ်ဦးတို့ဖြစ်ပြီး မိသားစုဝင် စုစုပေါင်း ၄ ဦးစလုံး သေဆုံးသွားခဲ့တာပါ။ အဲဒီမိသားစုဟာ မာတီစီးတီးရှိ Upper Salazar အရပ်မှာ နေထိုင်ကြသူတွေဖြစ်ပြီး မနက်အစောပိုင်း အိပ်ပျော်နေတဲ့အချိန်မှာ နေအိမ်နောက်ဘက်က တောင်စောင်းပြိုကျပြီး မြေပိခံခဲ့ရတာဖြစ်တယ်လို့ သိရပါတယ်။ အဲဒီအပြင် ဒါဗာအိုဒေသ (Davao Region) အတွင်းမှာ အဆက်မပြတ်မိုးရွာသွန်းမှုကြောင့် မြေပြိုမှုတွေဆက်တိုက်ဖြစ်ပွားနေပြီး မာတီစီးတီးက ၄ ဦးသေဆုံးခဲ့ပါတယ်။ အဲဒီအပြင် မွန်ကာယို (Monkayo) မြို့မှာလည်း ဖေဖော်ဝါရီလ ၁၉ ရက် ညပိုင်းကမြေပြိုမှုကြောင့် အမျိုးသား ၃ ဦး သေဆုံးခဲ့ရာ လက်ရှိမှာသေဆုံးသူ စုစုပေါင်း ၇ ဦးအထိ ရှိလာပြီဖြစ်ပါတယ်။ မြေပြိုမှုဖြစ်ပွားပြီးနောက် ကယ်ဆယ်ရေးအဖွဲ့တွေက အခင်းဖြစ်ပွားရာကို ချက်ချင်းသွားရောက်ပြီး ရှာဖွေကယ်ဆယ်ရေးတွေ ဆောင်ရွက်ခဲ့ကြပေမယ့် သေဆုံးသူတွေရဲ့ ရုပ်အလောင်းတွေကိုသာ ပြန်လည်ဆယ်ယူနိုင်ခဲ့တယ်လို့ သိရပါတယ်။ အဲဒီအပြင် လက်ရှိမှာလည်း ဒေသတွင်းမိုးသည်းထန်စွာ ဆက်လက်ရွာသွန်းနေတာကြောင့် တောင်စောင်းအနီး နေထိုင်သူတွေအနေနဲ့ မြေပြိုမှုအန္တရာယ်ကို အထူးသတိပြုကြဖို့ သက်ဆိုင်ရာအာဏာပိုင်တွေက သတိပေးထားပါတယ်။
Read more
ချင်းရိုင်မှာမြန်မာ ၈ ဦးနဲ့အတူ သယ်ဆောင်လာသူတဦးကိုဖမ်းဆီးရမိ
Border News Agency မဲဆောက်၊ ဖေဖော်ဝါရီ ၂၀ ။ ထိုင်း - မြန်မာနယ်စပ်၊ ချင်းရိုင်ခရိုင်၊ မယ်ဆိုင်မြို့နယ်အတွင်းမှာ ဖေဖော်ဝါရီလ ၁၉ ရက်က အထောက်အထားမဲ့ မြန်မာနိုင်ငံသား ၈ ဦးကို ကားအတွင်းပြည့်ကျပ်စွာတင်ဆောင်လာတဲ့ ဘတ်မှူးကိုင်ဆောင်ထားသူ အမျိုးသားတဦးကို ထိုင်းလူဝင်မှုကြီးကြပ်ရေးရဲတပ်ဖွဲ့က ဖမ်းဆီးလိုက်ပါတယ်။ အဲဒီ လဝကရဲတပ်ဖွဲ့ဟာ သတင်းပေးပို့ချက်အရ စောင့်ဆိုင်းစစ်ဆေးနေစဉ်အတွင်း မယ်ဆိုင်မြို့နယ်၊ ဝေယန်ဖန်ခမ်းကျေးရွာအနီးမှာ နီဆန်း (Nissan) အနီရောင်ကားတစီးကို တားဆီးနိုင်ခဲ့ပါတယ်။ အဲဒီနောက် ယာဉ်မောင်းဖြစ်သူ အသက် ၂၅ နှစ်အရွယ်နိုင်ကွန်းနဲ့အတူ ကားထဲမှာပုန်းအောင်းလိုက်ပါလာတဲ့ မြန်မာအမျိုးသား ၆ ဦးနဲ့ အမျိုးသမီး ၂ ဦးတို့ကို စစ်ဆေးတွေ့ရှိခဲ့ရပါတယ်။ အဲဒီ ယာဉ်မောင်းဖြစ်သူက သူ့ရဲ့အလုပ်ရှင်တဦးဟာ ချစ်ကြည်ရေးတံတား ၁ အနီးမှာရှိတဲ့ မြန်မာနိုင်ငံသားတွေကို ချင်းရိုင်မြို့ထဲပို့ဆောင်ပေးဖို့ စေခိုင်းခဲ့တာဖြစ်ကြောင်း ထွက်ဆိုထားပါတယ်။ အဲဒီအပြင် သူကပို့ဆောင်ခအဖြစ် တဦးကို ဘတ် ၅၀ ပဲ ရရှိတယ်လို့ ထွက်ဆိုထားပေမယ့် လဝကရဲ့ စုံစမ်းချက်အရ ပွဲစားခဟာ တဦးကို ဘတ် ၈,၀၀၀ ကနေ ၁၅,၀၀၀ အထိ ပေးဆောင်ခဲ့ရတယ်လို့ သိရပါတယ်။ အဲဒါကြောင့် ယာဉ်မောင်းဖြစ်သူကို တရားမဝင်ကူညီသယ်ဆောင်မှုနဲ့ အရေးယူထားပြီး ဖမ်းဆီးရမိတဲ့ မြန်မာနိုင်ငံသား ၈ ဦးကိုတော့ နေရပ်ပြန်ပို့ဖို့အတွက် စီစဉ်နေတယ်လို့သိရပါတယ်။ အဲဒီလုပ်ငန်းစဉ်နောက်ကွယ်က ကြိုးကိုင်သူ နိုင်တန် ဆိုသူကိုလည်း အာဏာပိုင်တွေက ဆက်လက်ရှာဖွေနေပါတယ်။ ဖေဖော်ဝါရီလအတွင်း ထိုင်း - မြန်မာနယ်စပ်တလျှောက် တရားမဝင်ဝင်ရောက်မှုနဲ့ ဖမ်းဆီးခံရတဲ့မြန်မာနိုင်ငံသားတွေဟာ ရာနဲ့ချီ ရှိနေပြီလို့ သိရပါတယ်။
Read more
ကာလီဖိုးနီးယားမှာ ဆီးနှင်းတောင်ပြိုကျလို့ လူ ၈ ဦးသေဆုံး
Border News Agency ကာလီဖိုးနီးယား၊ ဖေဖော်ဝါရီ ၂၀။ ကာလီဖိုးနီးယားပြည်နယ်ရဲ့ ခေတ်သစ်သမိုင်းတလျှောက်မှာ အဆိုးရွားဆုံးဆီးနှင်းတောင်ပြိုကျမှုကြောင့် လူ ၈ ဦး သေဆုံးပြီး ၉ ဦး ပျောက်ဆုံးနေတယ်လို့ နီဗားဒါးခရိုင် ရဲအရာရှိ Shannan Moon က ဖေဖော်ဝါရီလ ၁၉ ရက်၊ မနေ့ကသတင်းစာရှင်းလင်းပွဲမှာ အတည်ပြုပြောကြားခဲ့ပါတယ်။ မိုးလေဝသပညာရှင်တွေနဲ့ နီဗားဒါးခရိုင်ရဲအရာရှိ Shannan Moon တွေက ဒီနှစ်အတွင်း အပြင်းထန်ဆုံးဆီးနှင်းမုန်တိုင်း ကျရောက်မှာဖြစ်တယ်လို့ ဖေဖော်ဝါရီလ ၁၁ ရက်ကတည်းက ကြိုတင်သတိပေးထားခဲ့တာပါ။ အဲဒီနှင်းမုန်တိုင်းဟာ ကာလီဖိုးနီးယားပြည်နယ်၊ Truckee မြို့မှာ ဖေဖော်ဝါရီလ ၁၇ ရက်နေ့က စတင်ဖြစ်ပွားခဲ့တာ ဖြစ်ပါတယ်။ ဒါပေမယ့် Blackbird Mountain Guides ကုမ္ပဏီက လမ်းပြ ၄ ဦးအပါအဝင် စုစုပေါင်း ၁၅ ဦးကို Donner Pass အထက်ရှိတောင်စောင်းဆီကို ပို့ဆောင်ခဲ့တာကြောင့် ဝေဖန်မှုတွေမြင့်တက်နေပါတယ်။ အဲဒီအပြင် ဖေဖော်ဝါရီလ ၁၈ ရက်နေ့မှာ မထင်မှတ်ဘဲဆီးနှင်းတောင်ပြိုကျမှု (Avalanche) ဖြစ်ပွားလို့ အဖွဲ့ဝင်တွေ ဆီးနှင်းအောက်မှာ ပိတ်မိခဲ့တာပါ။ နှင်းမုန်တိုင်းပြင်းထန်တာကြောင့် ကယ်ဆယ်ရေးသမားတွေဟာ နှင်းလျှောစီးကာ ၆ နာရီကြာခက်ခဲစွာ ခရီးနှင်ခဲ့ရပါတယ်။ အဲဒီနောက် ညနေ ၅ နာရီခွဲမှာတော့ အသက်ရှင်ကျန်ရစ်သူ ၆ ဦးဆီကိုရောက်ရှိခဲ့ပြီး ၂ ဦးကို ဆေးရုံကိုပို့ဆောင်ထားရကာ ပျောက်ဆုံးနေသူ ၉ ဦး ရှိနေသေးတယ်လို့ သိရပါတယ်။ အဲဒီအပြင် သေဆုံးသူ ၈ ဦးရှိခဲ့ပြီး ရုပ်အလောင်းတွေကိုတော့ ရာသီဥတုဆိုးရွားတဲ့အတွက် တောင်ပေါ်ကနေမသယ်ထုတ်နိုင်သေးဘူးလို့ ဆိုပါတယ်။ အဲဒီ ဆိုးရွားတဲ့ဆီးနှင်းတောင်ပြိုကျမှုတခုလည်း ဆွစ်ဇာလန်နိုင်ငံ (Swiss Alps) မှာ ဖြစ်ခဲ့ပါတယ်။ ပြိုကျလာတဲ့ဆီးနှင်းထုကြီးက မောင်းနှင်လာတဲ့ရထားတစင်းကို တိုက်ရိုက်ရိုက်ခတ်ခဲ့တဲ့ ထိတ်လန့်ဖွယ်ဗီဒီယိုဖိုင်တွေလည်း ထွက်ပေါ်နေပါတယ်။ နီဗားဒါးခရိုင် ရဲအရာရှိ Shannan Moon က လမ်းပြကုမ္ပဏီရဲ့ ဆုံးဖြတ်ချက်တွေကို စုံစမ်းစစ်ဆေးနေပါတယ်။ အဲဒီအပြင် Placer ခရိုင်ရဲအရာရှိ Wayne Woo ကလည်း မုန်တိုင်းမပြီးမချင်း တောင်တန်းဒေသဆီကို လာရောက်တာမျိုးမလုပ်ကြဖို့ အလေးအနက်သတိပေးထားပါတယ်။
Read more
စင်ကာပူသင်္ဘောတွေ မီးလောင်လို့ မြန်မာသင်္ဘောသား ၂ ဦးအပါအဝင် ၃ ဦးသေဆုံး
Border News Agency စင်ကာပူ၊ ဖေဖော်ဝါရီ ၂၀။ စင်ကာပူအခြေစိုက်ကုန်တင်သင်္ဘောနဲ့ ခရီးသည်တင်သင်္ဘောတို့ မီးလောင်မှုတွေ ဆက်တိုက်ဖြစ်ပွားခဲ့ရာမှာ တပတ်အတွင်းမြန်မာသင်္ဘောသား ၂ ဦးအပါအဝင် စုစုပေါင်း ၃ ဦး သေဆုံးခဲ့တယ်လို့ စင်ကာပူရေကြောင်းနဲ့ ဆိပ်ကမ်းအာဏာပိုင်အဖွဲ့ (MPA) က ဖေဖော်ဝါရီလ ၂၀ ရက်၊ ဒီနေ့မှာထုတ်ပြန်ပါတယ်။ စင်ကာပူအလံတင် Bulk Carrier အမျိုးအစား Mandy သင်္ဘောဟာ တရုတ်နိုင်ငံ၊ ယန်တိုင်ဆိပ်ကမ်းအနီးမှာ ဖေဖော်ဝါရီလ ၁၇ ရက်၊ ည ၇ နာရီ ၃၅ မိနစ်မှာ အင်ဂျင်ခန်း မီးလောင်မှု ဖြစ်ပွားခဲ့တာပါ။ အဲဒီလို အင်ဂျင်ခန်းပေါက်ကွဲမှုကြောင့် သင်္ဘောပေါ်မှာရှိတဲ့ သင်္ဘောသား ၂၅ ဦးထဲက မြန်မာနိုင်ငံသား ၂ ဦး သေဆုံးခဲ့ရပြီး အခြားမြန်မာသင်္ဘောသားတဦးလည်း ဒဏ်ရာရရှိခဲ့ပါတယ်။ အဲဒီသင်္ဘောကို Pacific Rim Shipmanagement က စီမံခန့်ခွဲနေတာဖြစ်ပြီး လက်ရှိမှာတရုတ်နဲ့ စင်ကာပူအာဏာပိုင်တွေ ပူးပေါင်းစုံစမ်းနေကြပါတယ်။ အဲဒီအပြင် ဖေဖော်ဝါရီလ ၂၀ ရက်၊ မနက် ၄ နာရီမှာလည်း စင်ကာပူကို ဦးတည်လာတဲ့ "World Legacy" ခရီးသည်တင်သင်္ဘောတစင်း မီးလောင်မှုထပ်မံဖြစ်ပွားခဲ့တယ်လို့ MPA က အတည်ပြု ပြောကြားခဲ့ပါတယ်။ အဲဒီသင်္ဘောပေါ်မှာ ခရီးသည်နဲ့သင်္ဘောသား စုစုပေါင်း ၃၈၈ ဦး လိုက်ပါလာတာဖြစ်ပြီး သေဆုံးသွားတဲ့ သင်္ဘောသားတဦးကတော့ အင်ဒိုနီးရှားနိုင်ငံသား ဖြစ်ပါတယ်။ ထိခိုက်ဒဏ်ရာရရှိသွားတဲ့ ခရီးသည် ၄ ဦးကိုတော့ ဆေးရုံကိုပို့ဆောင်ထားရပါတယ်။ အဲဒီမီးလောင်ပေါက်ကွဲမှုဟာ သင်္ဘောရဲ့ ၉ ထပ်မြောက် (Deck 9) မှာရှိတဲ့ အနားယူဆောင် (Lounge area) ကနေ စတင်ခဲ့တာပါ။ မီးကို အချိန်မီထိန်းချုပ်နိုင်ခဲ့ပြီး လက်ရှိမှာတော့ Raffles Reserved ကျောက်ဆူးရပ်နားစခန်းအနီးမှာ ဆိုက်ကပ်ထားတယ်လို့ဆိုပါတယ်။ စင်ကာပူ ရေကြောင်းနဲ့ ဆိပ်ကမ်းအာဏာပိုင်က သေဆုံးသွားတဲ့မြန်မာသင်္ဘောသားမိသားစုတွေနဲ့ ထပ်တူဝမ်းနည်းရကြောင်းနဲ့ လိုအပ်တဲ့အကူအညီတွေ ပေးအပ်သွားမှာဖြစ်တယ်လို့ပြောကြားခဲ့ပါတယ်။ အဲဒီသင်္ဘောနှစ်စင်းစလုံး တည်ငြိမ်မှုရှိနေပြီဖြစ်ပေမဲ့ မီးလောင်ရတဲ့အကြောင်းရင်းကိုတော့ ဆက်လက်စစ်ဆေးနေဆဲပဲ ဖြစ်ပါတယ်လို့သိရပါတယ်။
Read more
လယ်ဒိုမှာအသက်မပြည့်သေးတဲ့ ကလေးတွေကို စစ်ကော်မရှင်တပ်က မူးယစ်ဆေးဝါး ဖြန့်ဖြူးခိုင်းနေ
Border News Agency လယ်ဒို၊ ဖေဖော်ဝါရီ ၂၀။ အာဏာသိမ်းစစ်တပ်ဟာ အသက်မပြည့်သေးတဲ့ ကလေးသူငယ်တွေကိုအသုံးချပြီး လယ်ဒိုမြို့နယ်အတွင်း မူးယစ်ဆေးဝါးဖြန့်ဖြူးနိုင်ဖို့ လုပ်ဆောင်နေတယ်လို့ ကေအဲန်ယူ - ဗဟိုက ဖေဖော်ဝါရီလ ၂၀ ရက်၊ ဒီနေ့ထုတ်ပြန်ပါတယ်။ ကေအဲန်ယူ၊ ခလယ်လွီထူခရိုင်၊ လယ်ဒိုမြို့နယ် စီမံအုပ်ချုပ်မှုနယ်မြေအတွင်းမှာ ဖေဖော်ဝါရီ ၁၆ ရက်နေ့ကမူးယစ်ဆေးဝါး (WY) အပြား ၁၀၀ ခန့် သယ်ဆောင်လာတဲ့ အသက် ၁၆ နှစ်နဲ့ ၁၃ နှစ်အရွယ် ကလေး ၂ ဦးကို ကရင်အမျိုးသားရဲတပ်ဖွဲ့ (KNPF) က ဖမ်းဆီးထိန်းသိမ်းနိုင်ခဲ့တာပါ။ အဲဒီကလေး ၂ ဦးဟာကျောက်တံခါးမြို့ ဈေးပိုင်းမှာနေထိုင်သူတွေဖြစ်ပြီး စစ်ကော်မရှင်တပ်ရဲ့ ခိုင်းစေမှုကြောင့် လယ်ဒိုမြို့နယ်အတွင်း မူးယစ်ဆေးဝါးဖြန့်ဖြူးဖို့ လာရောက်ခဲ့တာဖြစ်တယ်လို့ ဝန်ခံခဲ့ကြပါတယ်။ စစ်ကော်မတရှင်ဟာ တော်လှန်ရေးတပ်ဖွဲ့တွေ အင်အားနည်းလာစေဖို့အတွက် စစ်ရေးနည်းလမ်းတင်မကဘဲ အကျိုးအမြတ်နဲ့ ဆွဲဆောင်တာ၊ တော်လှန်ရေးပုံရိပ်တွေ ညှိုးနွမ်းအောင်သတင်းတု၊ သတင်းမှားတွေထုတ်လွှင့်နေတယ်လို့ဆိုပါတယ်။ အဲဒီအပြင် ဒေသခံလူထုရဲ့ အကျင့်စာရိတ္တပျက်ပြားအောင် နည်းလမ်းမျိုးစုံသုံးပြီး လုပ်ဆောင်လာခဲ့တာဟာ ကရင့်တော်လှန်ရေး အဆက်ဆက်မှာ ရှိခဲ့တယ်လို့လည်းဆိုပါတယ်။
Read more