Border News Agency  ထိုင်း၊ ဖေဖော်ဝါရီ ၂၀။ ​ထိုင်းနိုင်ငံမှာ လာမယ့်ဖေဖော်ဝါရီလ၂၃ ရက်ကနေ ၂၅ ရက်အတွင်း ပြင်းထန်တဲ့နွေရာသီမုန်တိုင်း (Summer Storm) ကျရောက်နိုင်ပြီး ခရိုင်ပေါင်း ၁၈ ခုမှာ မိုးသက်လေပြင်းတွေ ကျရောက်နိုင်တယ်လို့ မိုးလေဝသနဲ့ ဇလဗေဒဦးစီးဌာန (TMD) က ဖေဖော်ဝါရီလ ၂၀ ရက်၊ ဒီနေ့မှာ သတိပေးချက်ထုတ်ပြန်လိုက်ပါတယ်။ ​ထိုင်းနိုင်ငံဟာ လာမယ့်ဖေဖော်ဝါရီလ ၂၂ ရက်နေ့ကစတင်ပြီး နွေရာသီကို တရားဝင်ကူးပြောင်းတော့မှာပါ။ အခုလို ရာသီကူးပြောင်းချိန်အတွင်း ဖေဖော်ဝါရီလ ၂၃ ရက်ကနေ ၂၅ ရက်အထိ ထိုင်းနိုင်ငံအထက်ပိုင်းမှာ မိုးသက်လေပြင်းကျတာ၊ လျှပ်စီးလက်တာတွေနဲ့အတူ အချို့နေရာတွေမှာ မိုးသီးကြွေတာတွေအထိ ဖြစ်ပေါ်နိုင်တာကြောင့် ပြည်သူတွေကြိုတင်ပြင်ဆင်ထားကြဖို့ အာဏာပိုင်တွေက သတိပေးထားပါတယ်။ ​ဒီနေ့ ဖေဖော်ဝါရီလ၂၀ ရက်မှာဆိုရင် မြောက်ပိုင်း၊ အရှေ့ပိုင်းနဲ့တောင်ပိုင်းရှိ ခရိုင် ၁၈ ခုမှာ မိုးရွာဖို့အလားအလာရှိနေပါတယ်။ မယ်ဟောင်ဆောင်၊ ချင်းမိုင်၊ ချင်းရိုင်၊ လန်ပွန်၊ လန်ပန်းနဲ့ တာ့ခ်ခရိုင်တို့မှာ မိုးရွာဖို့ ၁၀ ရာခိုင်နှုန်းရှိပြီး တောင်ပေါ်ဒေသတွေမှာ အေးမြမှုကိုခံစားရနိုင်ပါတယ်။ ဒါ့အပြင် ချောင်ဘူရီ၊ ရယောင်း၊ ကျန်သဘူရီနဲ့ ထရတ်ခရိုင်တို့မှာလည်း နေ့အပူချိန်ပြင်းတာကြောင့် မိုးရွာဖို့ အလားအလာ ရှိနေတာပါ။ ​တောင်ပိုင်းက ဆူရတ်သနီ၊ နခွန်စီသမာရတ်၊ ပတ်သလုံ၊ ယဲလာ၊ နာရသီဝပ်နဲ့ ပတ္တနီခရိုင်တို့မှာလည်း မိုးရွာဖို့ ၂၀ ရာခိုင်နှုန်းခန့် ရှိနေပါတယ်။ နေ့အပူချိန်ဟာ အမြင့်ဆုံး ၃၆ ဒီဂရီဆဲလ်စီးယပ်စ်အထိရှိနိုင်ပြီး ရာသီဥတုပူပြင်းမှာဖြစ်ပါတယ်။ ထိုင်းပင်လယ်ကွေ့အောက်ပိုင်းမှာ လှိုင်းအမြင့် ၂ မီတာခန့်ရှိနိုင်ပြီး မိုးသက်လေပြင်းကျချိန်မှာ လှိုင်းပိုကြီးနိုင်တာကြောင့် ရေလုပ်သားတွေနဲ့ သင်္ဘောငယ်တွေသတိပြုကြဖို့ ထပ်မံအသိပေးထားပါတယ်။ ​ရာသီဥတု ရုတ်တရက်ပြောင်းလဲတာကြောင့် ပြည်သူတွေအနေနဲ့ ကျန်းမာရေးကိုဂရုစိုက်ကြဖို့နဲ့ လေပြင်းဘေးကနေ ကင်းဝေးစေဖို့ အဆောက်အအုံတွေ၊ ကြော်ငြာဆိုင်းဘုတ်တွေ ခိုင်ခံ့မှု ရှိ၊ မရှိ စစ်ဆေးထားကြဖို့ လိုအပ်တယ်လို့ ထိုင်းမိုးဇလ (TMD) ရဲ့ ထုတ်ပြန်ချက်မှာ ဖော်ပြထားပါတယ်။

Border News Agency ထိုင်း၊ ဖေဖော်ဝါရီ ၂၀။ ​ထိုင်းရှေ့တန်းစခန်းတွေကို နှောင့်ယှက်ဖို့ ကမ္ဘောဒီးယားစစ်တပ်က ၃ ရက်ဆက်တိုက်တောမီးရှို့တိုက်ခိုက်ခဲ့ရာကနေ လေကြောင်းပြောင်းပြီး ကမ္ဘောဒီးယားဘက်ခြမ်းက တပ်စုမှူးနေအိမ်နဲ့ စစ်စခန်းအချို့ မီးလောင်ပျက်စီးသွားတယ်လို့ သိရပါတယ်။ ​ပြီးခဲ့တဲ့ ဖေဖော်ဝါရီလ ၁၇ ရက်နေ့ကတည်းက စတင်ရှို့ခဲ့တဲ့ဒီမီးဟာ လက်ရှိအချိန်အထိ ထိန်းချုပ်လို့မရသေးဘဲ ကမ္ဘောဒီးယားဘက်ခြမ်းက နေအိမ်တွေနဲ့ ဆီဆိုင်တွေအနီးအထိ ကူးစက်နေတာပါ။ အဲဒီမီးရှို့ခဲ့တဲ့ ကမ္ဘောဒီးယားတပ်သားသစ်တွေက "တကယ်ကြီး လောင်နေပြီ၊အန္တရာယ်ရှိပြီ" လို့ ထိတ်လန့်တုန်လှုပ်စွာ အော်ဟစ်နေတဲ့ ဗီဒီယိုတွေလည်း လူမှုကွန်ရက်ပေါ်မှာ ပျံ့နှံ့နေပါတယ်။ ​ဒီတောမီးကြောင့် ပရယ်ဝိဟီယားပြည်နယ်က ကမ္ဘောဒီးယားတပ်စုမှူးနေအိမ်ဟာ လုံးဝပြာကျသွားခဲ့ပြီး စစ်စခန်းတွေအနီးကိုပါ မီးကူးစက်လာတာကြောင့် စစ်သားတွေဟာ ပျာယာခတ်ပြီး မီးငြှိမ်းသတ်နေကြရပါတယ်။ ​အစပိုင်းမှာ ထိုင်းဘက်ကိုနှောင့်ယှက်ဖို့ ကြုံးဝါးခဲ့ပေမယ့် အခုအခါမှာတော့ မီးကို မငြှိမ်းသတ်နိုင်တော့တာကြောင့် မိုးရွာချပေးဖို့ နတ်ဒေဝါတွေကိုပါ ကမ္ဘောဒီးယားစစ်သားတွေက ပြန်လည်ရှိခိုးဆုတောင်းနေရတယ်လို့ ထိုင်းသတင်းတွေအရ သိရပါတယ်။  ဒီဖြစ်စဉ်ဟာ အခုနှစ်အတွင်း ထိုင်းနဲ့ ကမ္ဘောဒီးယား နယ်စပ်တစ်လျှောက်မှာ စစ်ရေးတင်းမာမှုတွေရှိနေစဉ်အတွင်းမှာ ဖြစ်ပွားခဲ့တာပါ။ အခုလို တောမီးရှို့ပြီး နှောင့်ယှက်တိုက်ခိုက်ဖို့ ကြိုးပမ်းမှုတွေကြောင့် နယ်စပ်ဒေသက အရပ်သားပြည်သူတွေမှာလည်း မီးဘေးအန္တရာယ်အပြင် မီးခိုးငွေ့ညစ်ညမ်းမှုဒဏ်တွေကိုပါနှစ်ဖက်စလုံးက ခံစားနေရတယ်လို့ သိရပါတယ်။ ဒါ့အပြင် ဒီတောမီးဟာ နယ်စပ်ဖြတ်ကျော် မီးခိုးမြူပြဿနာကိုပါ ပိုမိုဆိုးရွားစေတာကြောင့် ထိုင်းအာဏာပိုင်တွေဘက်ကလည်း နယ်စပ်တစ်လျှောက် မီးရှို့မှုတွေကိုထိန်းသိမ်းဖို့ ကမ္ဘောဒီးယားဘက်ကို တိုက်တွန်းပြောဆိုမှုတွေ ရှိနေပါတယ်။ လက်ရှိမှာတော့ မီးလောင်ကျွမ်းခဲ့တဲ့ ကမ္ဘောဒီးယား စစ်စခန်းတွေနဲ့ နေအိမ်တွေရဲ့ ပျက်စီးဆုံးရှုံးမှု အသေးစိတ်ကိုတော့ သက်ဆိုင်ရာ တပ်ဖွဲ့တွေဘက်က သတင်းအမှောင်ချထားဆဲ ဖြစ်ပါတယ်။

Border News Agency မကွေး၊ ဖေဖော်ဝါရီ ၂၀။ ​မကွေးတိုင်း၊ ယောဒေသ ဂန့်ဂေါမြို့ ပြည့်ဝအမြောက်တပ် အမတ - ၃၇၁ က တပ်သားတဦးဟာ လက်နက်ခဲယမ်းတွေနဲ့အတူ ဂန့်ဂေါခရိုင်တပ်ရင်းတခုဖြစ်တဲ့ ထီးလင်း YRA ပြည်သူ့တော်လှန်ရေးတပ်ရင်းထံ အလင်းဝင်လာတယ်လို့ ယောအလင်းတန်းက ဖေဖော်ဝါရီလ ၁၉ ရက်၊ မနေ့ကထုတ်ပြန်ပါတယ်။  အဲဒီတပ်သား သန့်ဇင်အောင်ဟာ သူနဲ့အတူ MA-1 သေနတ် တလက်၊ ကျည်ဘောက် ၃ ခုနဲ့ ကျည်ဆန် ၇၀ ကိုပါ ယူဆောင်လာခဲ့တာပါ။ ​တပ်သားသန့်ဇင်အောင်ဟာ အလင်းဝင်ဖို့အတွက်တော်လှန်ရေးအဖွဲ့တွေနဲ့ ကြိုတင်ချိတ်ဆက်ထားတာမျိုးမရှိဘဲ ပြီးခဲ့တဲ့ဖေဖော်ဝါရီလ ၁၂ ရက်နေ့ကတည်းက တပ်ကနေစတင်ထွက်ခွာလာခဲ့တာ ဖြစ်ပါတယ်။ ကြိုတင်ချိတ်ဆက်မှု မရှိတာကြောင့် လမ်းခရီးမှာ ၅ ရက်ကြာ အခက်အခဲတွေကြားက ဖြတ်သန်းခဲ့ရပြီး ဖေဖော်ဝါရီလ ၁၇ ရက်နေ့မနက်ပိုင်းမှာမှ YRA ထီးလင်းအဖွဲ့ရဲ့ တပ်စခန်းတခုကိုရောက်ရှိပြီး အလင်းဝင်နိုင်ခဲ့တာလို့ဆိုပါတယ်။

​အာရက္ခဒေသမှာရှိတဲ့ မွတ်ဆလင်တွေဟာ ဖေဖော်ဝါရီလ ၁၉ ရက်၊ဒီနေ့မနက် အာရုံတက်ချိန်ကစပြီး ရာမဒန်ဥပုဒ်ကာလကို စတင်လိုက်ပြီလို့ ဒေသခံတွေထံကနေ သိရပါတယ်။ ​အဲဒိီရာမဒန်ဥပုဒ်ကာလကို ဖေဖော်ဝါရီလ ၁၉ ရက်ကနေ မတ်လ ၁၆ ရက်နေ့အထိ ရက်ပေါင်း ၃၀ ကြာ ဥပုဒ်ဆောက်တည်ကြမှာ ဖြစ်ပါတယ်။ "ရခိုင်ကမွတ်ဆလင်အများစုဟာ ဘင်္ဂလားဒေ့ရှ်နိုင်ငံဘက်မှာ လမြင်တဲ့အတိုင်း ဒီနေ့ကစပြီး ရာမဒန်ဥပုဒ်ကာလ စတင်ကြတာပါ။တချို့ကတော့မြန်မာနိုင်ငံ အစ္စလာမ်သာသနာရေးအဖွဲ့ရဲ့ ထုတ်ပြန်ချက်အရ မနက်ဖြန်မှ စတင်ကြမှာဖြစ်တယ်။" ဘူးသီးတောင်မြို့ရှိမွတ်ဆလင်လူကြီးတဦးက Border News Agency ကို ပြောပါတယ်။ အဲဒီ ​ဥပုဒ်ဆောက်တည်သူတွေဟာ မနက်အာရုံမှာအစတ္တာရီ စားသောက်ပြီးချိန်ကစလို့ တနေကုန် အစာရေစာ လုံးဝမစားသော က်ကြသလို တံတွေးတောင် မျိုချတာမျိုးမလုပ်ဘဲ တင်းတင်းကျပ်ကျပ် ဥပုဒ်ဆောက်တည်ကြရတာ ဖြစ်ပါတယ်။ ​ဗလီဝတ်ပြုပြီးချိန် ညနေ ၆ နာရီမှာတော့ အစ္စတာရီ ညစာအဖြစ် ဇီလာဘီ၊ ဆော်နာပူ၊ စမူဇာ စတဲ့ မွတ်ဆလင်ရိုးရာ အစားအစာတွေအပြင် ကျောက်ကြော၊အုန်းသီး၊ ဖရဲသီး၊ ဖာလူဒါနဲ့ အအေးမျိုးစုံ၊ သစ်သီးဝလံတွေကို စားသောက်ပြီး ဝါဖြေကြတာလည်း ဖြစ်ပါတယ်။ ​ဒီလိုမျိုး တလပြည့်မြောက်တဲ့နေ့မှာတော့ မွတ်ဆလင်တွေရဲ့ အီးဒ်ပွဲတော်ကို တကမ္ဘာလုံးအတိုင်းအတာနဲ့ ကျင်းပပြုလုပ်သွားကြမှာ ဖြစ်ပါတယ်လို့ မူဆလင်လူမျိုးတွေကဆိုကြပါတယ်။

Border News Agency (BNA) ပုလဲ၊ ဖေဖော်ဝါရီ ၁၉။ ​ဗမာအမျိုးသားတော်လှန်ရေးတပ်မတော် (BNRA) အဖွဲ့ခေါင်းဆောင် ဗိုလ်နဂါးနဲ့အဖွဲ့ဝင်အချို့ဟာ ပြည်သူ့တော်လှန်ရေးနဲ့ တရားဥပဒေစိုးမိုးရေးကို ဆန့်ကျင်တဲ့လုပ်ရပ်တွေ ကျူးလွန်ခဲ့တာကြောင့် စစ်အင်အားအသုံးပြုပြီး မလွှဲမရှောင်သာဖယ်ရှားရှင်းလင်းခဲ့ရတယ်လို့ အမျိုးသားညီညွတ်ရေးအစိုးရ (NUG) ကာကွယ်ရေးဝန်ကြီးဌာနက ဖေဖော်ဝါရီလ ၁၉ ရက် ဒီနေ့မှာထုတ်ပြန်ပါတယ်။ ​အဲဒီ ဗိုလ်နဂါးနဲ့ သူရဲ့တပ်ဖွဲ့ဝင်တွေဟာ ပြည်သူလူထုအပေါ် ဖိနှိပ်တာ၊ သက်ငယ်မုဒိန်းမှု၊ လူသတ်မှုနဲ့ အလောင်းဖျောက်တာတွေအပြင် တရားမဝင်အခွန်ဂိတ်တွေဖွင့်ပြီး အများပြည်သူသွားလာမှုကို အနှောင့်အယှက်ပေးတာတွေ လုပ်ဆောင်ခဲ့တယ်လို့ ဆိုပါတယ်။ ဒါ့အပြင် အုပ်ချုပ်ရေး၊ ပညာရေးနဲ့ ကျန်းမာရေးလို ပြည်သူ့ဝန်ဆောင်မှု လုပ်ငန်းတွေကို နှောင့်ယှက်တာ၊ NUG တပ်ဖွဲ့ဝင်တွေကို ပစ်ခတ်သတ်ဖြတ်တာနဲ့ အကြမ်းဖက်စစ်တပ်ထံ သတင်းပေးပို့တာတွေအတွက် ယုံကြည်ရလောက်တဲ့ အထောက်အထားတွေ ရှိနေတယ်လို့လည်း ဆိုပါတယ်။ ​အခုလို အရေးယူဆောင်ရွက်တာဟာ သာမန်တရားဥပဒေစိုးမိုးရေးယန္တရားနဲ့ ဆောင်ရွက်ဖို့မဖြစ်နိုင်တော့တာကြောင့် တော်လှန်ရေးရဲ့ ဆူးညှောင့်တခုကိုဖယ်ရှားဖို့ စစ်အင်အားသုံးဆောင်ရွက်ခဲ့ရတာလို့ NUG က ရှင်းလင်းထားပါတယ်။ ဒီလုပ်ငန်းစဉ်အတွင်း ပြည်သူလူထု ထိတ်လန့်စိုးရိမ်ခဲ့ရတာအတွက် ဝန်ကြီးဌာနအနေနဲ့ စိတ်မကောင်းဖြစ်ရတယ်လို့လည်း ဆိုပါတယ်။ ​ပြစ်မှုကျူးလွန်ထားတာ မရှိတဲ့ BNRA အဖွဲ့ဝင်တွေအနေနဲ့တော့ မိမိတို့ဆန္ဒရှိပါက ပြည်သူ့ကာကွယ်ရေးတပ်မတော် (PDF) ဒါမှမဟုတ် ပြည်သူ့ကာကွယ်ရေးအဖွဲ့ (ပကဖ) တွေမှာပူးပေါင်းပြီး တော်လှန်ရေးမှာ ဆက်လက်ပါဝင်နိုင်ဖို့ စီစဉ်သွားမယ်လို့ ဆိုပါတယ်။