​ထိုင်းတပ်မတော်က ဦးဆောင်ကျင်းပတဲ့ ၄၅ ကြိမ်မြောက် Cobra Gold 2026 ပူးတွဲစစ်ရေးလေ့ကျင့်မှု ဖွင့်ပွဲအခမ်းအနားကို ဖေဖော်ဝါရီ ၂၄ ရက်၊မနက်ပိုင်းမှာ ရယောင်းခရိုင်ရှိ အူတာပေါင်းလေဆိပ်မှာကျင်းပခဲ့တယ်လို့ ထိုင်းဘုရင့်တပ်မတော်ကထုတ်ပြန်ထားပါတယ်။ အဲဒီအခမ်းအနားကို ထိုင်းတပ်မတော်ကာကွယ်ရေးဦးစီးချုပ် ဗိုလ်ချုပ်ကြီး အုကရစ် ဘွန်တာနွန်နဲ့ အမေရိကန်သံအမတ်ကြီးတို့က ပူးတွဲသဘာပတိအဖြစ် တက်ရောက်ဖွင့်လှစ်ပေးခဲ့တာပါ။ ​အခုနှစ်မှာတော့ နိုင်ငံပေါင်း ၃၀ က စစ်သည်အင်အား ၈,၀၀၀ ကျော် ပါဝင်မှာဖြစ်ပြီး အကြီးစားလေ့ကျင့်မှုတွေလုပ်မယ့် (Heavy Year) လည်း ဖြစ်ပါတယ်။ အင်ဒို-ပစိဖိတ်ဒေသအတွင်းက မိတ်ဖက်နိုင်ငံတွေကြား စစ်ရေးအရ အသင့်ဖြစ်နေဖို့နဲ့ ဒေသတွင်း တည်ငြိမ်လုံခြုံရေးအတွက် စုပေါင်းအားနဲ့ ပူးပေါင်းဆောင်ရွက်ဖို့ ရည်ရွယ်တာပါ။ အဲဒီထဲ ​ကြည်း၊ရေ၊ လေ စစ်ဆင်ရေးတွေတင်မကဘဲ အာကာသစစ်ဆင်ရေးနဲ့ ဆိုက်ဘာ (Cyber) ကဏ္ဍတွေကိုပါ အပြည့်အဝ ထည့်သွင်းလေ့ကျင့်သွားမှာ ဖြစ်တယ်လို့ဆိုပါတယ်။ အဲဒီအပြင် ဝေဟင်ဓာတ်ပုံခွဲခြမ်းစိတ်ဖြာတာနဲ့ အချက်ပြထောက်လှမ်းရေးလို နည်းပညာမြင့်စနစ်တွေကိုပါ တိုးမြှင့်လေ့ကျင့်သွားမယ်လို့လည်းဆိုပါတယ်။ ​သဘာဝဘေးအန္တရာယ် ကယ်ဆယ်ရေး (HADR) လေ့ကျင့်ခန်းမှာလည်း ထိုင်းမင်းသမီးရဲ့ အချစ်တော်ခွေးလေး “Mi-6” ပါဝင်တဲ့ K9 ကယ်ဆယ်ရေးအဖွဲ့တွေက ရှာဖွေကယ်ဆယ်ရေးလုပ်ငန်းတွေကို သရုပ်ပြခဲ့ကြပါတယ်။ အဲ​ဒီစစ်ရေးလေ့ကျင့်မှုဟာ ဖေဖော်ဝါရီလ ၂၃ ရက်ကနေမတ်လ ၆ ရက်နေ့အထိ ကြာမြင့်မှာဖြစ်ပြီး စင်ကာပူ၊အင်ဒိုနီးရှား၊ တောင်ကိုရီးယား၊ ဂျပန်နဲ့ မလေးရှားနိုင်ငံတွေက သံအမတ်ကြီးတွေလည်း တက်ရောက်ခဲ့ကြပါတယ်။ အဲဒါဟာ အာရှတိုက်ရဲ့ အကြီးဆုံးနဲ့ သမိုင်းအရှည်ကြာဆုံး စစ်ရေးလေ့ကျင့်မှုကြီးတခုလည်းဖြစ်တယ်လို့ဆိုပါတယ်။ 

​လာမယ့် ဧပြီလဆန်းပိုင်းမှာ သမ္မတအသစ် ရွေးချယ်ပြီး အစိုးရသစ်ဖွဲ့စည်းကာ နိုင်ငံတော်တာဝန်တွေကို ပြန်လည်လွှဲပြောင်းပေးသွားမယ်လို့ စစ်ကော်မရှင်ဒုတိယခေါင်းဆောင် စိုးဝင်းက ပြောဆိုလိုက်ပါတယ်။ နောင်ဝိုး၊ကျိုင်းခမ်းနဲ့ မိုင်းပျဉ်းဘက်က တပ်နယ်တွေကို ဖေဖော်ဝါရီလ ၂၄ ရက်နေ့ကသွားရောက်စစ်ဆေးစဉ်မှာ အခုလို ထည့်သွင်းပြောကြားခဲ့တာပါ။ ​ရွေးကောက်ပွဲကျင်းပပြီးစီးသွားပြီဖြစ်လို့ မကြာခင်မှာ လွှတ်တော်ခေါ်ယူနိုင်ဖို့အတွက် ပြည်နယ်နဲ့ တိုင်းဒေသကြီးအလိုက် ကြိုတင်ပြင်ဆင်မှုတွေ လုပ်နေတယ်လို့ ဆိုပါတယ်။ အစီအစဉ်အရ မတ်လ ၁၆ ရက်မှာ ပြည်သူ့လွှတ်တော် အစည်းအဝေးနဲ့ မတ်လ ၁၈ ရက်မှာ အမျိုးသားလွှတ်တော် အစည်းအဝေးတွေကို ကျင်းပဖို့ ပြင်ဆင်နေတာပါ။ ​ဒီလွှတ်တော်အစည်းအဝေးတွေ ကျင်းပပြီးတာနဲ့ ဧပြီလဆန်းမှာ သမ္မတရွေးချယ်တာနဲ့ အစိုးရသစ်ဖွဲ့စည်းတာတွေကို အပြီးသတ်လုပ်ဆောင်ပြီး တာဝန်လွှဲပြောင်းပေးသွားမယ်လို့ စိုးဝင်းက ဆိုပါတယ်။ ဒါပေမယ့် ဘယ်လိုအစိုးရမျိုးကို တာဝန်လွှဲပေးမလဲဆိုတာကိုတော့ အသေးစိတ် ပြောဆိုတာမျိုး မရှိပါဘူး။ ​ဒါ့အပြင် အစိုးရနဲ့ နိုင်ငံရေးအပြောင်းအလဲတွေ ဘယ်လိုပဲရှိနေပါစေ တပ်မတော်အနေနဲ့ကတော့ နိုင်ငံတော်လုံခြုံရေးနဲ့ ကာကွယ်ရေးတာဝန်တွေကို ဆက်ပြီးထမ်းဆောင်သွားရမှာဖြစ်တယ်လို့လည်း သူက ပြောခဲ့ပါတယ်။ အဲဒါကြောင့် စွမ်းရည်ရှိတဲ့ တပ်မတော်ဖြစ်အောင် ဆောင်ရွက်ကြဖို့ကိုလည်း တိုက်တွန်းထားပါသေးတယ်။ ​စစ်ကော်မရှင်ဘက်က အစိုးရသစ်ဖွဲ့ပြီး တာဝန်လွှဲမယ်လို့ ပြောနေပေမယ့် တဖက်မှာတော့ တိုင်းပြည်အနှံ့မှာစစ်မီးတွေတောက်လောင်နေဆဲဖြစ်သလို အရပ်သားတွေအပေါ် လေကြောင်းတိုက်ခိုက်တာတွေလည်း ဆက်တိုက်ရှိနေတာကြောင့် သူတို့ရဲ့ နိုင်ငံရေးခြေလှမ်းတွေအပေါ် ဝေဖန်မှုတွေကတော့ ရှိနေဆဲဖြစ်ပါတယ်။

အာရက္ခတပ်တော်(AA)ထိန်းချုပ်ထားတဲ့ ​ပုဏ္ဏားကျွန်းမြို့နယ် ယိုးငူရွာက ဈေးဆိုင်တန်းကို စစ်ကော်မရှင်တပ်ရွယ်ရည်ချက်ရှိရှိလေကြောင်းတိုက်ခိုက်ခဲ့တာကြောင့် ကလေးငယ်တွေအပါအဝင် အပြစ်မဲ့ပြည်သူ ၁၇ ဦး သေဆုံးခဲ့ရတဲ့အပေါ် လူသားချင်းစာနာထောက်ထားရေးနဲဖွံ့ဖြိုးရေးဆိုင်ရာ ပူးပေါင်းဆောင်ရွက်ရေးရုံး (HDCO) ကကန့်ကွက်ရှုတ်ချလိုက်ပါတယ်။  အဲဒီ စစ်ကော်မရှင်တပ်ရဲ့လူမဆန်တဲ့ တိုက်ခိုက်ခဲ့လီု့ ပြည်သူ ၁၄ ဦးလည်း ဒဏ်ရာပြင်းပြင်းထန်ထန်ရသွားခဲ့ရပြီးအားလုံးဟာ သွေးအိုင်ထဲမှာ ရက်စက်စွာ ပေးဆပ်ခဲ့ရတာဖြစ်တယ်လို့ဆိုပါတယ်။ ​စစ်ရေးနဲ့ လုံးဝသက်ဆိုင်တာမရှိတဲ့ ကျေးရွာဈေးတန်းကို နေ့ခင်းကြောင်တောင် လေကြောင်းတိုက်ခိုက်တာဟာ နိုင်ငံတကာ စစ်ရာဇဝတ်မှုကိုပြောင်ပြောင်တင်းတင်း ကျူးလွန်တာဖြစ်တယ်လို့ HDCO က ဆိုပါတယ်။ ဒါဟာ အရပ်သားတွေကို အကာအကွယ်ပေးရမယ်ဆိုတဲ့ ဂျီနီဗာကွန်ဗင်းရှင်းပါ အခြေခံမူတွေကို စစ်ခေါင်းဆောင်က ဗြောင်ကျကျချိုးဖောက်ပြီး လူသားမျိုးနွယ်အပေါ် ရာဇဝတ်မှု ကျူးလွန်လိုက်တာပဲ ဖြစ်ပါတယ်။ အဲ​ဒီတိုက်ခိုက်မှုကြောင့် ပြည်သူပိုင်နေအိမ်တွေနဲ့ ဈေးဆိုင်တွေလည်း ပျက်စီးဆုံးရှုံးခဲ့ရပြီး ရွာထဲမှာအပိုင်းပိုင်းပြတ်နေတဲ့ ရုပ်အလောင်းတွေနဲ့အတူ ဒေသခံတွေဟာ အလွန်တရာတုန်လှုပ်ခြောက်ခြားနေကြရပါတယ်။ စစ်ခေါင်းဆောင်ဟာ သူ့ရဲ့အာဏာတည်မြဲဖို့အတွက် ဘာမဆိုင်တဲ့ကလေးငယ်တွေကိုပါမချန်ပစ်မှတ်ထားသတ်ဖြတ်နေတာဟာ ကမ္ဘာကသိသင့်တဲ့ အကြမ်းဖက်မှုအစစ်အမှန်ပဲ ဖြစ်ပါတယ်။  HDCO အနေနဲ့ ထိခိုက်သေဆုံးသွားတဲ့ မိသားစုတွေနဲ့အတူ ထပ်တူထပ်မျှ ဝမ်းနည်းကြေကွဲရတယ်လို့ ပြောကြားထားပြီး လိုအပ်တဲ့ ကူညီထောက်ပံ့မှုတွေကို တခြားအာရက္ခဌာနတွေနဲ့ ပူးပေါင်းကာ အမြန်ဆုံး စီမံဆောင်ရွက်ပေးနေပါတယ်လို့ဆိုပါတယ်။ ဒဏ်ရာရထားသူတွေထဲမှာလည်း စိုးရိမ်ရသူတွေ ပါဝင်နေတာကြောင့် သေဆုံးသူအရေအတွက် ထပ်တိုးလာမှာကို အားလုံးက စိုးရိမ်နေကြတယ်လို့ဆိုပါတယ်။ ​နိုင်ငံတကာအသိုက်အဝန်းအနေနဲ့လည်း စစ်ခေါင်းဆောင်ရဲ့အခုလို ရက်စက်ကြမ်းကြုတ်တဲ့ လုပ်ရပ်တွေကို ကြည့်မနေဘဲ ထိရောက်တဲ့ အရေးယူဆောင်ရွက်မှုတွေနဲ့ ချက်ချင်းဟန့်တားပေးဖို့ HDCO ကတောင်းဆိုထားပါတယ်။

​ကျောက်ဖြူမြို့နယ်ရှိ စစ်ဘေးရှောင်တွေခိုလှုံနေတဲ့ ငအုပ်ရွာအနီးက ယာယီစခန်းကို ဖေဖော်ဝါရီလ ၂၄ ရက်၊မနေ့က စစ်ကော်မရှင်တပ် ဆူဆိုဒ်ဒရုန်း ၂ စီးနဲ့ တိုက်ခိုက်ခဲ့ပါတယ်။ အဲဒီလိုတိုက်ခိုက်ခဲ့တာကြောင့် အသက် ၇၈ နှစ်အရွယ်အဖိုးအို ဦးမောင်နုစိန်နဲ့ ဦးမောင်ခင်ထွန်းမှာ ဗုံးစထိမှန်ပြီးပြင်းထန်ဒဏ်ရာပြင်းပြင်းထန်ထန်ရသွားခဲ့ပါတယ်။ ​စစ်ကော်မရှင်တပ်ဟာ နေ့လည် ၁၁ နာရီဝန်းကျင်မှာ ၅ မိနစ်ခြားစီ ဒရုန်းနဲ့ တိုက်ခိုက်ခဲ့တာဖြစ်ပြီး လက်ရှိမှာတော့ စစ်ဘေးရှောင်ပြည်သူတွေဟာကြောက်လန့်တကြားနဲ့ ဘေးလွတ်ရာကို ထွက်ပြေးနေကြရပါတယ်။ အဲဒီအပြင် ပုဏ္ဏားကျွန်း၊ယိုးငူရွာဈေးနဲ့ ကျောင်းကို စစ်ကော်မရှင်တပ်ကလကြောင်းတိုက်ခိုက်လို့ကလေးတွေအပါအဝင် ၁၇ ဦး သေဆုံးခဲ့ရပြီး အများအပြားဒဏ်ရာရသွားခဲ့ပါတယ်။ ​စစ်ကော်မရှင်တပ်ဟာ ကျောက်ဖြူ အပါအဝင်အာရက္ခတပ်တော်ထိန်းချုပ်ထားတဲ့ မြို့တွေကို စစ်သင်္ဘောတွေက လက်နက်ကြီး၊ လေယာဉ်တွေနဲ့ဆက်တိုက်ပစ်ခတ်နေလို့ ပြည်သူတွေအတွက် အန္တရာယ်အမြင့်ဆုံးဖြစ်နေတယ်လို့ အာရက္ခတပ်တော်က ဆိုပါတယ်။  လူနေထူထပ်တဲ့ အရပ်သားပြည်သူတွေနေထိုင်ရာနေရာ၊စာသင်ကျောင်း၊ ဆေးရုံ၊ ဆေးခန်းနဲ့ သာသနိကအဆောက်အအုံတွေကို စစ်ကော်မရှင်တပ်ရည်ရွယ်ချက်ရှိရှိရေကြောင်း၊ လေကြောင်းက တိုက်ခိုက်မှု ပြုလုပ်နေတယ်လို့ ဆိုပါတယ်။ အဲဒါကြောင့် ပင်လယ်ကမ်းနီးမြို့၊ ရွာတွေက မိဘပြည်သူတွေဟာ စစ်ကော် မရှင်တပ်ရေကြောင်း၊လေကြောင်းတို က်ခိုက်မှုအန္တရာယ်ကို အထူးသတိထားကြပြီး စစ်ရေးသတိရှိဖို့အသိပေးထားပါတယ်။

ပုဏ္ဏားကျွန်းမြို့နယ်ကိုစစ်ကော်မရှင်တပ်လေကြောင်းတိုက်ခဲ့လို့ ကလေးငယ်အပါအဝင် ဆယ့်ခုနှစ်ဦးသေဆုံးသွားတယ်လို့ အာရက္ခတပ်တော်(AA)က ဖေဖော်ဝါရီလ ၂၄ ရက်၊မနေ့ကထုတ်ပြန်ပါတယ်။ အဲဒီပုဏ္ဏားကျွန်းမြို့နယ်၊ယိုးငူကျေးရွာကို ဖေဖော်ဝါရီ ၂၄ရက်၊နေ့လည်၂နာရီ ၇မိနစ်အချိန်ခန့်က စစ်ကော်မရှင်တပ်လေကြောင်းတိုက်ခိုက်ခဲ့တာကြောင့် ကလေးငယ်အပါအဝင် ဆယ့်ခုနှစ်ဦးသေဆုံးသွားပြီး ဆယ့်လေးဦးဒဏ်ရာရသွားခဲ့ပါတယ်။ အဲဒီလိုတိုက်ခိုက်ခဲ့တာကြောင့် ယိုးငူကျေးရွာမှာ ဈေးရောင်း၊ဈေးဝယ်နေကြတဲ့ ပြည်သူတွေသေဆုံးဒဏ်ရာရသွားခဲ့ပြီး လူနေအိမ်၊ ဈေးဆိုင်ခန်းအချို့မှာလည်း မီးလောင်ပျက်စီးသွားတယ်လို့ ဆိုပါတယ်။ အဲဒီယိုးငူရွာမှ အရပ်သားပြည်သူ သေဆုံးမှုနဲ့ဒဏ်ရာရရှိမှု အသေးစိတ်ကိုထပ်မံတင်ပြပေးသွားမယ်လို့  အာရက္ခတပ်တော်ဆိုပါတယ်။

Border News Agency  ပုဏ္ဏားကျွန်း၊ ဖေဖော်ဝါရီ ၂၄။ အာရက္ခတပ်တော် (AA) ထိန်းချုပ်ထားတဲ့ပုဏ္ဏားကျွန်းမြို့နယ်၊ ယိုးငူရွာရှိ စျေးနဲ့ စာသင်ကျောင်းအနီးကို ဖေဖော်ဝါရီလ ၂၄ ရက်၊ ဒီနေ့ နေ့လည်၂ နာရီကျော်အချိန်ခန့်က စစ်ကော်မရှင်တပ်လေကြောင်းတိုက်ခိုက်ခဲ့တယ်လို့ သိရပါတယ်။ အဲဒီလို လေ​ကြောင်းတိုက်ခိုက်ခဲ့တာကြောင့် ကလေးငယ်တွေအပါအဝင် အပြစ်မဲ့ပြည်သူ တဆယ်ကျော်သေဆုံးသွားပြီး ဒဏ်ရာရသူတွေအများအပြားရှိနေတယ်လို့ သိရပါတယ်။ အဲဒီယိုးငူကျေးရွာရှိ ဈေးအနီးနဲ့ စာသင်ကျောင်းအနီးကို စစ်ကော်မရှင်တပ်ဟာ ပေါင် ၅၀၀ ဗုံးတွေနဲ့ ရည်ရွယ်ချက်ရှိရှိတိုက်ခိုက်ခဲ့တာကြောင့် ကလေးငယ်တွေအပါအဝင် အပြစ်မဲ့ပြည်သူတဆယ်ကျော် သေဆုံးပြီးထိခိုက်ဒဏ်ရာရတာတွေလည်းရှိတယ်လို့ ဒေသခံတွေကဆိုကြပါတယ်။  အဲဒီဒဏ်ရာရသူတွေထဲမှာ ဒဏ်ရာပြင်းထန်သူတွေပါဝင်တာကြောင့် သေဆုံးသူထပ်တိုးလာနိုင်တယ်လို့ သိရပါတယ်။ စစ်ကော်မရှင်တပ်ဟာ အာရက္ခတပ်တော်ထိန်းချုပ်ထားတဲ့ မြို့တွေကို စစ်သင်္ဘောတွေက လက်နက်ကြီး၊ လေယာဉ်တွေနဲ့ဆက်တိုက်ပစ်ခတ်နေလို့ ပြည်သူတွေအတွက် အန္တရာယ်အမြင့်ဆုံးဖြစ်နေတယ်လို့ အာရက္ခတပ်တော်က ဆိုပါတယ်။  လူနေထူထပ်တဲ့ အရပ်သားပြည်သူတွေနေထိုင်ရာနေရာ၊ စာသင်ကျောင်း၊ ဆေးရုံ၊ ဆေးခန်းနဲ့ သာသနိကအဆောက်အအုံတွေကို စစ်ကော်မရှင်တပ်ရည်ရွယ်ချက်ရှိရှိ ရေကြောင်း၊ လေကြောင်းကတိုက်ခိုက်မှု ပြုလုပ်နေတယ်လို့  ဆိုပါတယ်။ အဲဒါကြောင့် ပင်လယ်ကမ်းနီးမြို့၊ ရွာတွေကမိဘပြည်သူတွေဟာ စစ်ကော်မရှင်တပ်ရေကြောင်း၊ လေကြောင်းတိုက်ခိုက်မှုအန္တရာယ်ကို အထူးသတိထားကြပြီး စစ်ရေးသတိရှိဖို့အသိပေးထားပါတယ်။

Border News Agency  ပုဏ္ဏားကျွန်း၊ ဖေဖော်ဝါရီ ၂၄။ အာရက္ခတပ်တော် (AA) ထိန်းချုပ်ထားတဲ့ ပုဏ္ဏားကျွန်းမြို့နယ်၊ ယိုးငူရွာရှိစျေးနဲ့ စာသင်ကျောင်းအနီးကို ဖေဖော်ဝါရီလ ၂၄ ရက်၊ ဒီနေ့ နေ့လည် ၂ နာရီကျော်အချိန်ခန့်က စစ်ကော်မရှင်တပ် လေကြောင်းတိုက်ခိုက်ခဲ့တယ်လို့ သိရပါတယ်။ အဲဒီလို လေ​ကြောင်းတိုက်ခိုက်ခဲ့တာကြောင့် ကလေးငယ်တွေအပါအဝင် အပြစ်မဲ့ပြည်သူ ၉ ဦး ပွဲချင်းပြီး သေဆုံးသွားပြီးဆယ်ဦး ဒဏ်ရာရသွားတယ်လို့သိရပါတယ်။ သေဆုံးသွားသူတွေထဲမှာ ကျောင်းနေအရွယ်ကလေးငယ်တွေ အများအပြားပါဝင်နေပြီး ဈေးအတွင်းစျေးဝယ်နေသူတွေပါ ထိခိုက်ခဲ့တာကြောင့် နေရာတခုလုံးပျက်စီးဆုံးရှုံးမှု များပြားခဲ့တယ်လို့ သိရပါတယ်။ ဒါပေမယ့် Border News Agency အနေနဲ့ ထပ်ပြီးအတည်ပြုနိုင်ဖို့ကြိုးစားနေပြီး နောက်ဆက်တွဲအခြေအနေတွေကို ဆက်ပြီးတင်ပြသွားမှာဖြစ်ပါတယ်။

Border News Agency  နေပြည်တော်၊ ဖေဖော်ဝါရီ ၂၄။ စစ်ကော်မရှင်တပ်ရဲ့ လေယာဉ်ဆီထောက်ပံ့ရေးကွင်းဆက်မှာ ပါဝင်ပတ်သက်နေတဲ့ သင်္ဘောတွေနဲ့ ကုမ္ပဏီတွေကို ပစ်မှတ်ထားပြီး ဒဏ်ခတ်ပိတ်ဆို့မှုအသစ်တွေ ချက်ချင်းချမှတ်ပေးဖို့ Justice For Myanmar (JFM) က တောင်းဆိုလိုက်ပါတယ်။ အီးယူ၊ ယူကေ၊ ကနေဒါ၊ အမေရိကန်နဲ့ ဩစတေးလျအစိုးရတွေအနေနဲ့ မြန်မာနိုင်ငံဆီ လေယာဉ်ဆီတင်ပို့မှုတွေကို အသေအချာတားမြစ်ပိတ်ပင်ပေးဖို့ တိုက်တွန်းထားတာပါ။ ​စစ်ကော်မရှင်တပ်ဟာ ၂၀၂၅ ခုနှစ်အတွင်းမှာတင် မြန်မာပြည်သူတွေအပေါ် မကြုံစဖူးများပြားလှတဲ့ လေကြောင်းတိုက်ခိုက်မှုတွေကို လုပ်ဆောင်ခဲ့တယ်လို့ JFM က ဆိုပါတယ်။ ဒီတိုက်ခိုက်မှုတွေကြောင့် စာသင်ကျောင်းတွေ၊ ဆေးရုံတွေနဲ့ လူမှုအသိုင်းအဝိုင်းတွေ ပျက်စီးခဲ့ရသလို၊ ကလေးငယ်တွေအပါအဝင် အပြစ်မဲ့ပြည်သူများစွာ အသက်ဆုံးရှုံးခဲ့ရပြီး လူအများအပြား နေရပ်စွန့်ခွာထွက်ပြေးခဲ့ရတာပါ။ ​စစ်ကော်မရှင်တပ်ရဲ့ ထိန်းချုပ်မှုအောက်မှာရှိတဲ့ ဆိပ်ကမ်းအာဏာပိုင်အဖွဲ့ရဲ့ အချက်အလက်တွေအရ လေယာဉ်ဆီတင်သွင်းမှုဟာ ၂၀၂၄ ကနေ ၂၀၂၅ အတွင်းမှာ မတ်ထရစ်တန် ၆ သောင်းကျော်ကနေ ၁ သိန်းကျော်အထိ (နှစ်ဆနီးပါး) တိုးလာနေတာကို တွေ့ရပါတယ်။ ဒါဟာ နိုင်ငံတကာကတားဆီးနေတဲ့ကြားက စစ်ကော်မရှင်တပ်ဆီ လေယာဉ်ဆီတွေ ပိုမိုရောက်ရှိနေတာကို ပြသနေတာလို့ ဆိုပါတယ်။ ​JFM ပြောရေးဆိုခွင့်ရှိသူ မရတနာမောင်က ဗီယက်နမ်ကနေ အီရန်အထိကျယ်ပြန့်တဲ့ ထောက်ပံ့ရေးကွင်းဆက်တစ်ခုက စစ်ကော်မရှင်တပ်ရဲ့ နိုင်ငံတကာရာဇဝတ်မှုတွေကို လောင်စာဖြည့်ပေးနေတယ်လို့ ဆိုပါတယ်။ အထူးသဖြင့် အာဆီယံအဖွဲ့ဝင် ဗီယက်နမ်နိုင်ငံ ပါဝင်ပတ်သက်နေမှုဟာ မြန်မာ့အကျပ်အတည်းအပေါ် အာဆီယံရဲ့ ပျက်ကွက်မှုကို ထင်ရှားစေတယ်လို့ ဝေဖန်ထားပါတယ်။ အဲဒီထဲ ခုလက်ရှိကနေဒါနိုင်ငံတနိုင်ငံတည်းကသာ လေယာဉ်ဆီတင်ပို့မှု၊ ရောင်းချမှုနဲ့ ရေကြောင်းအာမခံဝန်ဆောင်မှုတွေကို တရားဝင်ပိတ်ပင်ထားတာဖြစ်တယ်လို့ ဆိုပါတယ်။ အဲဒါကြောင့် အခြားအစိုးရတွေအနေနဲ့လည်း ဒီသွေးစွန်းနေတဲ့ ကုန်သွယ်မှုကို အဆုံးသတ်နိုင်ဖို့အတွက် ကနေဒါရဲ့ ဦးဆောင်မှုအတိုင်း လိုက်နာဆောင်ရွက်ဖို့ JFM က တိုက်တွန်းထားပါတယ်။ ​စစ်ကော်မရှင်တပ်ဆီရောက်သွားတဲ့ လေယာဉ်ဆီတင်ပို့မှုတိုင်းဟာ ပြည်သူတွေကို ဝေဟင်ကနေအကြမ်းဖက်ဖို့ အားပေးနေတာဖြစ်လို့ ပါဝင်ပတ်သက်နေတဲ့ သင်္ဘောပိုင်ရှင်တွေနဲ့ ကုမ္ပဏီတွေကို အရေးယူဖို့အလွန်အရေးကြီးနေတယ်လို့ ဆိုပါတယ်။ မြန်မာပြည်သူတွေရဲ့ အသက်အိုးအိမ်စည်းစိမ်ဟာ ဒီလိုပိတ်ဆို့အရေးယူမှုတွေ အဆောတလျင်လုပ်ဆောင်နိုင်မှုအပေါ်မှာ  မှီခိုနေတယ်လို့လည်း ဆိုပါတယ်။