Border News Agency

Border News Agency မြစ်ကြီးနား၊ ဖေဖော်ဝါရီ ၂၁။ ကချင်ပြည်၊ မြစ်ကြီးနားလေဆိပ်ဟာ ဖေဖော်ဝါရီလ၂၀ ရက်၊ ည ၈ နာရီကျော်ခန့်မှာ FPV Suicide Drone တွေနဲ့ တိုက်ခိုက်ခံရတာကြောင့် မြန်မာအမျိုးသားလေကြောင်းလိုင်း (MNA) က ခရီးသည်တင်လေယာဉ်တစီး ထိမှန်ပျက်စီးခဲ့တယ်လို့ သိရပါတယ်။ အဲဒီ တိုက်ခိုက်ခံရမှုဟာ မြစ်ကြီးနားကနေ မန္တလေးကိုထွက်ခွာဖို့ ခရီးသည်တွေတင်ဆောင်ကာ ပြင်ဆင်နေတဲ့ MNA ပိုင် ATR - 72 - 600 အမျိုးအစားလေယာဉ်ကို ဦးတည်ခဲ့တာပါ။ ဒရုန်းတွေ ပေါက်ကွဲမှုကြောင့် လေယာဉ်ရဲ့ခေါင်းပိုင်း၊ ကိုယ်ထည်နဲ့ နောက်မြီးပိုင်းတို့ ထိမှန်ပျက်စီးခဲ့ပေမယ့် ခရီးသည်တွေနဲ့ လေယာဉ်ဝန်ထမ်းတွေ ထိခိုက်ဒဏ်ရာရတာမျိုးတော့ မရှိခဲ့ဘူးလို့သိရပါတယ်။ အဲဒီတိုက်ခိုက်မှုကို KIA နဲ့ PDF အဖွဲ့တွေက လုပ်ဆောင်ခဲ့တာလို့ စစ်ကော်မရှင်ဘက်က သတင်းထုတ်ပြန်ထားပေမယ့် တော်လှန်ရေးအဖွဲ့တွေဘက်ကတော့ တစုံတရာထုတ်ပြန်ထားတာ မရှိသေးပါဘူး။ အဲဒီတိုက်ခိုက်မှုဖြစ်ပွားခဲ့တဲ့ မြစ်ကြီးနားလေဆိပ်ကို ယာယီပိတ်ထားပြီး စစ်ကော်မရှင်တပ်ဖွဲ့ဝင်တွေက လေဆိပ်အတွင်းနဲ့ ပတ်ဝန်းကျင်ကို စုံစမ်းစစ်ဆေးတာတွေ လုပ်ဆောင်နေတယ်လို့ မြေပြင်သတင်းရင်းမြစ်တွေဆီက သိရပါတယ်။

လယ်ဒိုမှာ အတင်းအဓမ္မစစ်မှုထမ်းခိုင်းရတဲ့ တပ်သား ၁၀ ဦးအလင်းဝင်

Border News Agency လယ်ဒို၊ ဖေဖော်ဝါရီ ၂၁။ ခလယ်လွီထူခရိုင်၊ လယ်ဒိုမြို့နယ်ထဲမှာ စစ်ကော်မရှင်တပ်ဆီအတင်းအဓမ္မ စစ်မှုထမ်းခိုင်းတာခံရတဲ့ ပြည်သူ့စစ်မှုထမ်းတပ်သား ၁၀ ဦးလက်နက်ချအလင်းဝင်လာတယ်လို့ ကေအဲန်ယူ - ဗဟိုက ဖေဖော်ဝါရီလ ၂၁ရက်၊ ဒီနေ့ထုတ်ပြန်ပါတယ်။ အဲဒီ အလင်းဝင်လာသူတွေဟာ စစ်ကော်မရှင်တပ်ရဲ့ စစ်မှုထမ်းအပတ်စဉ် ၁၃၊ ၁၅ နဲ့ ၁၆ က သင်တန်းဆင်းတွေဖြစ်ပြီး တပ်ရင်းအသီးသီးမှာ တာဝန်ကျနေရင်းကနေ ထွက်ပြေးလာကြတာလို့ဆိုပါတယ်။ ပထမအသုတ်အနေနဲ့ ပြီးခဲ့တဲ့ ဖေဖော်ဝါရီလ ၁၇ ရက်နေ့မှာ ခမရ - ၄၃၉ တပ်ရင်းက တပ်သား ၄ ဦးဖြစ်တဲ့ မောင်သက်လွင်စိုး၊ မောင်သက်လွင်ဦး၊ မောင်ချစ်မောင်မောင်နဲ့ မောင်ချစ်ဝေဖြိုးတို့ဟာ ကရင်အမျိုးသားကာကွယ်ရေးတပ်ဖွဲ့ (KNDO) တပ်ရင်း ၃ ဆီကို အရင်ဆုံးရောက်ရှိလာခဲ့တာပါ။ သူတို့ဟာ စစ်သင်တန်းဆင်းပြီးနောက် ရှေ့တန်းတပ်ရင်းတွေမှာ အတင်းအဓမ္မတာဝန်ပေးခိုင်းစေခံရတာကြောင့် အခွင့်သာတဲ့အချိန်မှာ တော်လှန်ရေးအဖွဲ့တွေဆီကို ခိုလှုံလာခဲ့တာလို့ ဆိုပါတယ်။ အဲဒီအပြင် ဖေဖော်ဝါရီလ၂၀ ရက်နေ့မှာတော့ ခမရ - ၅၉၈ တပ်ရင်းကတပ်သား ၆ ဦးဖြစ်တဲ့ မောင်မျိုးဝင်းဇော်၊ သန်းဌေးအောင်၊ ကျော်လင်းထက်၊ ရဲကျော်သူဝင်း၊ တင်မောင်မြင့်နဲ့ ဖိုးသားတို့ဟာ ကရင်အမျိုးသားလွတ်မြောက်ရေးတပ်မတော် (KNLA) တပ်ရင်း ၉ ဆီ ထပ်မံအလင်းဝင်လာတယ်လို့ဆိုပါတယ်။ အဲဒီ အသက် ၂၄ နှစ်ကနေ ၄၈ နှစ်အထိ ပါဝင်တဲ့တပ်သားတွေဟာ စစ်ကော်မရှင်တပ်ရဲ့ ဖိအားပေးစေခိုင်းမှုတွေအောက်မှာ ဆက်လက်မနေလိုတော့တာကြောင့် အခုလိုဆုံးဖြတ်ချက်ချခဲ့ကြတယ်လို့ ဆိုပါတယ်။ အခုလို အလင်းဝင်လာသူတွေနဲ့ပတ်သက်ပြီး ဒီတပ်သားတွေအားလုံးဟာ သူတို့ဆန္ဒမပါဘဲအတင်းအဓမ္မ ဖမ်းဆီးစစ်မှုထမ်းခိုင်းခံရသူတွေဖြစ်လို့ ကေအဲန်ယူအနေနဲ့ လူသားဆန်စွာ ကောင်းမွန်စွာစောင့်ရှောက်ထားပါတယ်လို့ ကေအဲန်ယူဘက်က ပြောဆိုထားပါတယ်။ ဒါ့အပြင် စစ်ကော်မရှင်တပ်ထဲမှာ အဲဒီလိုအခက်အခဲကြုံနေရတဲ့ တခြားသူတွေအနေနဲ့လည်း နီးစပ်ရာတော်လှန်ရေးတပ်ဖွဲ့တွေဆီ အမြန်ဆုံးဆက်သွယ် အလင်းဝင်ကြဖို့ကိုလည်း တိုက်တွန်းထားပါတယ်။

ပုလောစခန်းသိမ်းတိုက်ပွဲမှာ စစ်ကော်မရှင်တပ်ဖွဲ့ဝင်၃ ဦးသေဆုံးပြီး ၃ ဦး ဒဏ်ရာရ

by BNA Author

တနင်္သာရီတိုင်း၊ ပုလောမြို့နယ်မှာရှိတဲ့ စစ်ကော်မရှင်တပ်စခန်းကို တော်လှန်ရေးပူးပေါင်းတပ်ဖွဲ့တွေက ဖေဖော်ဝါရီလ၁၇ ရက်၊မနက်ပိုင်းမှာ တိုက်ခိုက်သိမ်းပိုက်ခဲ့ရာ စစ်ကော်မရှင်တပ်ဖွဲ့ဝင် ၃ ဦး သေဆုံးပြီး ၃ ဦး အပြင်းအထန် ဒဏ်ရာရရှိခဲ့တယ်လို့ သိရပါတယ်။ အဲဒီပုလောမြို့နယ်၊တောင်ခေါင်းလောင်းရွာမှာတပ်စွဲထားတဲ့ စစ်ကော်မရှင်တပ်စခန်းကို တော်လှန်ရေးတပ်ဖွဲ့တွေက ဝင်ရောက်တိုက်ခိုက်ခဲ့တာဖြစ်ပြီး တနာရီခန့်အကြာမှာပဲ စခန်းကို ယာယီသိမ်းပိုက်နိုင်ခဲ့တယ်လို့ဆိုပါတယ်။ အဲဒီတိုက်ပွဲအတွင်းမှာ စစ်ကော်မရှင်တပ်ဖွဲ့ဝင် ၃ ဦးသေဆုံးခဲ့သလို တခြား ၃ ဦးကလည်း အပြင်းအထန် ဒဏ်ရာရသွားခဲ့တယ်လို့ ဓဝယ်အမျိုးသားလွတ်မြောက်ရေးတပ်တော် (DNLA)က ထုတ်ပြန်ထားပါတယ်။ အဲဒီတိုက်ခိုက်မှုအတွင်း စစ်ကော်မရှင်တပ်ဖွဲ့ဝင်တွေဆီကနေ ၆၀ မမ ဗုံးသီး ၁၀ လုံး၊အီနာဂါ ၂ လုံးနဲ့ တခြားစစ်အသုံးအဆောင် ဆက်စပ်ပစ္စည်း အမြောက်အများကိုလည်း သိမ်းဆည်းရမိခဲ့တယ်လို့ ဆိုပါတယ်။ အဲဒီ တပ်စခန်းကိုဓဝယ်အမျိုးသားလွတ်မြောက်ရေးတပ်တော် (DNLA)၊ ကရင်အမျိုးသားလွတ်မြောက်ရေးတပ်မတော် (KNLA) တပ်မဟာ ၄ အထူးတပ်ဖွဲ့၊ ထားဝယ်ပြည်သူ့ကာကွယ်ရေးအဖွဲ့ (DDT) နဲ့ သရက်ချောင်းပြည်သူ့ကာကွယ်ရေးပြောက်ကျားတပ်ဖွဲ့ (TPDGF) တို့က ပူးပေါင်းတိုက်ခိုက်ခဲ့တာလို့ ဆိုပါတယ်။

စစ်ရေးလေ့ကျင့်ဖို့ အမေရိကန်ရဲ့ Apache တိုက်ခိုက်ရေးရဟတ်ယာဉ်နဲ့ စစ်လက်နက်တွေ ထိုင်းကိုရောက်ရှိ

by BNA Author

အာရှ - ပစိဖိတ်ဒေသမှာ အကြီးဆုံးဖြစ်တဲ့ Cobra Gold 2026 ပူးတွဲစစ်ရေးလေ့ကျင့်မှုမှာ ပါဝင်ဖို့အတွက် အမေရိကန်တပ်မတော်ရဲ့ ခေတ်မီတိုက်ခိုက်ရေးရဟတ်ယာဉ်တွေနဲ့ စစ်လက်နက်ကိရိယာတွေဟာ ဖေဖော်ဝါရီလ၂၀ ရက်၊ မနေ့က ထိုင်းနိုင်ငံ၊ ဆာတာဟစ်ရေတပ်အခြေစိုက်စခန်းကို ဆိုက်ရောက်လာခဲ့ပါတယ်။ အခုရောက်ရှိလာတဲ့ စစ်လက်နက်ပစ္စည်းတွေထဲမှာ နာမည်ကျော် AH-64E Apache တိုက်ခိုက်ရေးရဟတ်ယာဉ်တွေ၊ M777 အမြောက်ကြီးတွေအပြင် သံချပ်ကာလူနာတင်ယာဉ်တွေနဲ့ ဘီးတပ်သံချပ်ကာယာဉ် အမျိုးမျိုးလည်း ပါဝင်နေတာကို တွေ့ရပါတယ်။ အဲဒီအပြင် စစ်ဘက်သုံး ထောက်ပံ့ရေးယာဉ်တွေနဲ့ ဆက်သွယ်ရေးကိရိယာ အမြောက်အများကိုလည်း ဆာတာဟစ်ဆိပ်ကမ်းမှာ ချမှတ်ခဲ့ပြီးနောက်၊သတ်မှတ်ထားတဲ့ စစ်ရေးလေ့ကျင့်ရေးကွင်းတွေဆီကို ဆက်လက်ပို့ဆောင်သွားမယ်လို့ နယ်စပ်သတင်းရင်းမြစ်တွေဆီက သိရပါတယ်။ ဒီနှစ်ကျင်းပမယ့် Cobra Gold စစ်ရေးလေ့ကျင့်မှုဟာ ထိုင်းနဲ့ အမေရိကန်တပ်ဖွဲ့ဝင်တွေအပြင် တခြားမဟာမိတ်နိုင်ငံပေါင်းစုံက စစ်သည်တော်တွေလည်း ပါဝင်တက်ရောက်ကြမယ့် နိုင်ငံစုံစစ်ရေးလေ့ကျင့်မှုကြီးတခုလည်း ဖြစ်ပါတယ်။ အဲဒီလေ့ကျင့်မှုမှာ စစ်ရေးဆိုင်ရာ ပူးပေါင်းဆောင်ရွက်မှုတွေသာမက လူသားချင်းစာနာထောက်ထားမှုနဲ့ သဘာဝဘေးအန္တရာယ် ကူညီကယ်ဆယ်ရေး လေ့ကျင့်ခန်းတွေကိုပါ ထည့်သွင်းပြုလုပ်သွားဖို့ ရှိနေတယ်လို့ သိရှိရပါတယ်။

ဗိုလ်နဂါးရဲ့BNRA အဖွဲ့ဝင် ၅ ဦး လက်နက်တွေနဲ့အတူ စစ်ကော်မရှင်ဆီအလင်းဝင်

by BNA Author

စစ်ကိုင်းတိုင်း၊ ပုလဲမြို့နယ်အတွင်းမှာ လှုပ်ရှားနေတဲ့ ဗမာနိုင်ငံလုံးဆိုင်ရာ တော်လှန်ရေးတပ်ဦး (BNRA) အဖွဲ့က ဒုတိယအဖွဲ့ခေါင်းဆောင် အပါအဝင် အဖွဲ့ဝင် ၅ ဦးဟာ ဖေဖော်ဝါရီလ ၂၀ ရက် မွန်းလွဲပိုင်းမှာ လက်နက်ခဲယမ်းတွေနဲ့အတူ အလင်းဝင်လာတယ်လို့ စစ်ကော်မရှင်တပ်ကထုတ်ပြန်ပါတယ်။ အဲဒီအလင်းဝင်လာသူတွေထဲမှာ BNRA ရဲ့ ဒုတိယအဖွဲ့ခေါင်းဆောင်တဦး၊တတိယတာဝန်ခံတဦးနဲ့ အဖွဲ့ဝင် ၃ ဦး ပါဝင်ပြီး သူတို့နဲ့အတူ လက်နက်မျိုးစုံ ၅ လက်နဲ့ ဆက်စပ်ပစ္စည်းတွေကိုပါ ယူဆောင်လာခဲ့တယ်လို့ဆိုပါတယ်။ သူတို့ဟာ ပုလဲမြို့နယ်အတွင်းရှိ လုံခြုံရေးတပ်စခန်းတခုထံ လာရောက်ဆက်သွယ်ခဲ့ကြတာဖြစ်ပြီး အဖွဲ့ခေါင်းဆောင်ဖြစ်သူ ဗိုလ်နဂါး (ခ) နိုင်လင်း အလင်းဝင်သွားပြီးနောက်ပိုင်း အခုလို ထပ်မံဝင်ရောက်လာကြတာလည်း ဖြစ်ပါတယ်။ အဲဒီအဖွဲ့ဝင် ၅ ဦးကို နယ်မြေခံတပ်ဌာနချုပ်က တာဝန်ရှိသူတွေက လက်ခံထားပြီး လိုအပ်တဲ့ စိစစ်မှုတွေနဲ့ ထောက်ပံ့မှုတွေကို လုပ်ထုံးလုပ်နည်းတွေအတိုင်း ဆက်လုပ်သွားမယ်လို့ဆိုပါတယ်။

ထိုင်းစစ်တပ်ကိုနှောင့်ယှက်ဖို့ တောမီးရှို့ရာမှ ကမ္ဘောဒီးယားစခန်းနဲ့တရုတ်ကာစီနိုတန်းလျားပါ မီးလောင်

Border News Agency ကမ္ဘောဒီးယား၊ ဖေဖော်ဝါရီ ၂၀။ ထိုင်း - ကမ္ဘောဒီးယားနယ်စပ်၊ အိုစမတ် (O Smach) ဒေသရှေ့တန်းမျက်နှာစာမှာ ကမ္ဘောဒီးယားစစ်သားတွေက ထိုင်းစစ်တပ်ကိုနှောင့်ယှက်ဖို့ တောမီးတမင်ရှို့ခဲ့ရာကနေ မီးကူးစက်မှုတွေဖြစ်ပြီး သူတို့ရဲ့စောင့်ကြည့်ရေးစခန်းနဲ့ အနီးနားရှိ တရုတ်ကာစီနို အလုပ်သမားတန်းလျားတွေ မီးလောင်ပျက်စီးသွားခဲ့တယ်လို့သိရပါတယ်။ အဲဒီ နယ်စပ်မျဉ်းအနီးရှိ ကမ္ဘောဒီးယားစစ်တပ်ရဲ့ စောင့်ကြည့်ရေးစခန်း (Observation Base) မှာ ဖေဖော်ဝါရီလ ၁၉ ရက်၊ ည ၁၀ နာရီ ၅၀ မိနစ်အချိန်ခန့်က မီးလောင်မှုစတင်ဖြစ်ပွားခဲ့တာ ဖြစ်ပါတယ်။ အဲဒီတောမီးဟာ ကမ္ဘောဒီးယားစစ်တပ်ဘက်ကနေ ရှေ့တန်းမှာရှိနေတဲ့ ထိုင်းစစ်သားတွေကို စိတ်အနှောင့်အယှက်ဖြစ်စေဖို့နဲ့ ခြိမ်းခြောက်ဖို့အတွက် တမင်ရည်ရွယ်ရှို့ခဲ့တာလို့ စစ်ဘက်သတင်းတွေမှာ ဖော်ပြထားပါတယ်။ ဒါပေမယ့် လေကြောင်းအခြေအနေကြောင့် မီးကိုထိန်းချုပ်လို့မရဘဲ ကမ္ဘောဒီးယားစစ်တပ်ရဲ့စောင့်ကြည့်ရေးစခန်းကိုပါ ကူးစက်လောင်ကျွမ်းခဲ့ပြီး စခန်းတခုလုံးပျက်စီးသွားခဲ့တာ ဖြစ်ပါတယ်။ အဲဒီအပြင် မီးဟာဆက်လက်ပြန့်နှံ့သွားခဲ့ရာ အိုစမတ်ဒေသရှိတရုတ်လုပ်ငန်းရှင်တွေရဲ့ ကာစီနိုဆောက်လုပ်ရေးလုပ်ငန်းခွင်က အလုပ်သမားတန်းလျားကိုပါ ကူးစက်လောင်ကျွမ်းခဲ့တယ်လို့ စစ်ဘက်သတင်းက အတည်ပြုထားပါတယ်။ အခုမီးလောင်မှုဟာ ကမ္ဘောဒီးယားစစ်တပ်ဘက်က စတင်ရှို့ခဲ့တာလို့ ခိုင်လုံတဲ့သတင်းတွေကဆိုထားပြီး မီးလောင်မှုကြောင့် လူထိခိုက်ဒဏ်ရာရရှိမှု အခြေအနေကိုတော့ အသေးစိတ်မသိရသေးပါဘူး။ အဲဒီနေရာဟာ ထိုင်းနိုင်ငံ၊ ဆူရင်ခရိုင်၊ ကပ္ပချန်းမြို့နယ်နယ်စပ်နဲ့ မျက်နှာချင်းဆိုင်မှာ ရှိပါတယ်။

လယ်ဒိုမှာအသက်မပြည့်သေးတဲ့ ကလေးတွေကို စစ်ကော်မရှင်တပ်က မူးယစ်ဆေးဝါး ဖြန့်ဖြူးခိုင်းနေ

Border News Agency လယ်ဒို၊ ဖေဖော်ဝါရီ ၂၀။ အာဏာသိမ်းစစ်တပ်ဟာ အသက်မပြည့်သေးတဲ့ ကလေးသူငယ်တွေကိုအသုံးချပြီး လယ်ဒိုမြို့နယ်အတွင်း မူးယစ်ဆေးဝါးဖြန့်ဖြူးနိုင်ဖို့ လုပ်ဆောင်နေတယ်လို့ ကေအဲန်ယူ - ဗဟိုက ဖေဖော်ဝါရီလ ၂၀ ရက်၊ ဒီနေ့ထုတ်ပြန်ပါတယ်။ ကေအဲန်ယူ၊ ခလယ်လွီထူခရိုင်၊ လယ်ဒိုမြို့နယ် စီမံအုပ်ချုပ်မှုနယ်မြေအတွင်းမှာ ဖေဖော်ဝါရီ ၁၆ ရက်နေ့ကမူးယစ်ဆေးဝါး (WY) အပြား ၁၀၀ ခန့် သယ်ဆောင်လာတဲ့ အသက် ၁၆ နှစ်နဲ့ ၁၃ နှစ်အရွယ် ကလေး ၂ ဦးကို ကရင်အမျိုးသားရဲတပ်ဖွဲ့ (KNPF) က ဖမ်းဆီးထိန်းသိမ်းနိုင်ခဲ့တာပါ။ အဲဒီကလေး ၂ ဦးဟာကျောက်တံခါးမြို့ ဈေးပိုင်းမှာနေထိုင်သူတွေဖြစ်ပြီး စစ်ကော်မရှင်တပ်ရဲ့ ခိုင်းစေမှုကြောင့် လယ်ဒိုမြို့နယ်အတွင်း မူးယစ်ဆေးဝါးဖြန့်ဖြူးဖို့ လာရောက်ခဲ့တာဖြစ်တယ်လို့ ဝန်ခံခဲ့ကြပါတယ်။ စစ်ကော်မတရှင်ဟာ တော်လှန်ရေးတပ်ဖွဲ့တွေ အင်အားနည်းလာစေဖို့အတွက် စစ်ရေးနည်းလမ်းတင်မကဘဲ အကျိုးအမြတ်နဲ့ ဆွဲဆောင်တာ၊ တော်လှန်ရေးပုံရိပ်တွေ ညှိုးနွမ်းအောင်သတင်းတု၊ သတင်းမှားတွေထုတ်လွှင့်နေတယ်လို့ဆိုပါတယ်။ အဲဒီအပြင် ဒေသခံလူထုရဲ့ အကျင့်စာရိတ္တပျက်ပြားအောင် နည်းလမ်းမျိုးစုံသုံးပြီး လုပ်ဆောင်လာခဲ့တာဟာ ကရင့်တော်လှန်ရေး အဆက်ဆက်မှာ ရှိခဲ့တယ်လို့လည်းဆိုပါတယ်။

လယ်ဒိုမှာ စစ်ကော်မရှင်တပ်ဒရုန်းနဲ့တိုက်ခိုက်လို့ နေအိမ် ၃လုံး ပျက်စီး

by Saw Shin Nyo

Border News Agency လယ်ဒို၊ ဖေဖော်ဝါရီ ၂၀။ ကေအဲန်ယူ - ခလယ်လွီထူခရိုင်၊ လယ်ဒိုမြို့နယ်အတွင်းကို အာဏာသိမ်းစစ်ကော်မရှင်တပ်က ဒရုန်းနဲ့တိုက်ခိုက်ခဲ့တာကြောင့် ဒေသခံပြည်သူတွေရဲ့ နေအိမ် ၃ လုံး ထိခိုက်ပျက်စီးသွားခဲ့ပါတယ်။ အဲဒီလယ်ဒိုမြို့နယ်၊ တလင်းကျေးရွာထဲကို ဖေဖော်ဝါရီလ ၁၇ ရက်နေ့က ထိန်တောအခြေစိုက်စစ်ကော်မရှင်တပ်က ဖျံဒရုန်းနဲ့ ၂ ကြိမ်တိုင်တိုင် ဗုံးကျဲတိုက်ခိုက်ခဲ့တာပါ။ အဲဒီလိုတိုက်ခိုက်လို့ စောဇော်မင်းနောင်၊ စောဖိုးထက်နဲ့စောမောင်ဆဲတို့ရဲ့ နေအိမ် ၃ လုံးပျက်စီးခဲ့သလို စောဖီးကောက်ရဲ့ နွားတဲတလုံးလည်း ပျက်စီးသွားခဲ့ပါတယ်။ စစ်ကော်မရှင်တပ်ဟာ ခလယ်လွီထူခရိုင်အတွင်းမှာရှိတဲ့ အရပ်သားပြည်သူတွေကို ပစ်မှတ်ထားပြီး လက်နက်ကြီးတွေနဲ့ ပစ်ခတ်တာ၊ လေကြောင်းကနေတိုက်ခိုက်တာတွေကို နေ့စဉ်ရက်ဆက် ကျူးလွန်နေတာပါ။ အဲဒီလိုမျိုး ရည်ရွယ်ချက်ရှိရှိ တိုက်ခိုက်နေတာတွေကြောင့် ဒေသခံပြည်သူတွေရဲ့ အသက်အိုးအိမ်စည်းစိမ်တွေ နေ့စဉ်နဲ့အမျှ ဆုံးရှုံးနေရသလို ပြည်သူတွေဟာလည်း ထိတ်လန့်ကြောက်ရွံ့စွာနဲ့ အသက်ရှင်နေထိုင်နေကြရပါတယ်။

BNRA အဖွဲ့မှ ပြစ်မှုကျူးလွန်သူတွေကိုအရေးယူဖို့ စစ်အင်အားသုံး ရှင်းလင်းခဲ့ရတယ်လို့ NUG ပြော

by Saw Shin Nyo

February 19, 2026

Border News Agency (BNA) ပုလဲ၊ ဖေဖော်ဝါရီ ၁၉။ ဗမာအမျိုးသားတော်လှန်ရေးတပ်မတော် (BNRA) အဖွဲ့ခေါင်းဆောင် ဗိုလ်နဂါးနဲ့အဖွဲ့ဝင်အချို့ဟာ ပြည်သူ့တော်လှန်ရေးနဲ့ တရားဥပဒေစိုးမိုးရေးကို ဆန့်ကျင်တဲ့လုပ်ရပ်တွေ ကျူးလွန်ခဲ့တာကြောင့် စစ်အင်အားအသုံးပြုပြီး မလွှဲမရှောင်သာဖယ်ရှားရှင်းလင်းခဲ့ရတယ်လို့ အမျိုးသားညီညွတ်ရေးအစိုးရ (NUG) ကာကွယ်ရေးဝန်ကြီးဌာနက ဖေဖော်ဝါရီလ ၁၉ ရက် ဒီနေ့မှာထုတ်ပြန်ပါတယ်။ အဲဒီ ဗိုလ်နဂါးနဲ့ သူရဲ့တပ်ဖွဲ့ဝင်တွေဟာ ပြည်သူလူထုအပေါ် ဖိနှိပ်တာ၊ သက်ငယ်မုဒိန်းမှု၊ လူသတ်မှုနဲ့ အလောင်းဖျောက်တာတွေအပြင် တရားမဝင်အခွန်ဂိတ်တွေဖွင့်ပြီး အများပြည်သူသွားလာမှုကို အနှောင့်အယှက်ပေးတာတွေ လုပ်ဆောင်ခဲ့တယ်လို့ ဆိုပါတယ်။ ဒါ့အပြင် အုပ်ချုပ်ရေး၊ ပညာရေးနဲ့ ကျန်းမာရေးလို ပြည်သူ့ဝန်ဆောင်မှု လုပ်ငန်းတွေကို နှောင့်ယှက်တာ၊ NUG တပ်ဖွဲ့ဝင်တွေကို ပစ်ခတ်သတ်ဖြတ်တာနဲ့ အကြမ်းဖက်စစ်တပ်ထံ သတင်းပေးပို့တာတွေအတွက် ယုံကြည်ရလောက်တဲ့ အထောက်အထားတွေ ရှိနေတယ်လို့လည်း ဆိုပါတယ်။ အခုလို အရေးယူဆောင်ရွက်တာဟာ သာမန်တရားဥပဒေစိုးမိုးရေးယန္တရားနဲ့ ဆောင်ရွက်ဖို့မဖြစ်နိုင်တော့တာကြောင့် တော်လှန်ရေးရဲ့ ဆူးညှောင့်တခုကိုဖယ်ရှားဖို့ စစ်အင်အားသုံးဆောင်ရွက်ခဲ့ရတာလို့ NUG က ရှင်းလင်းထားပါတယ်။ ဒီလုပ်ငန်းစဉ်အတွင်း ပြည်သူလူထု ထိတ်လန့်စိုးရိမ်ခဲ့ရတာအတွက် ဝန်ကြီးဌာနအနေနဲ့ စိတ်မကောင်းဖြစ်ရတယ်လို့လည်း ဆိုပါတယ်။ ပြစ်မှုကျူးလွန်ထားတာ မရှိတဲ့ BNRA အဖွဲ့ဝင်တွေအနေနဲ့တော့ မိမိတို့ဆန္ဒရှိပါက ပြည်သူ့ကာကွယ်ရေးတပ်မတော် (PDF) ဒါမှမဟုတ် ပြည်သူ့ကာကွယ်ရေးအဖွဲ့ (ပကဖ) တွေမှာပူးပေါင်းပြီး တော်လှန်ရေးမှာ ဆက်လက်ပါဝင်နိုင်ဖို့ စီစဉ်သွားမယ်လို့ ဆိုပါတယ်။

ယင်းမာပင်ရှိ BNRA ရဲဘော်တွေ လက်နက်လာရောက်အပ်နှံဖို့ ခရိုင်ပကဖ အမိန့်ထုတ်