Border News Agency  ပုဏ္ဏားကျွန်း၊ ဖေဖော်ဝါရီ ၂၄။ အာရက္ခတပ်တော် (AA) ထိန်းချုပ်ထားတဲ့ ပုဏ္ဏားကျွန်းမြို့နယ်၊ ယိုးငူရွာရှိ စျေးနဲ့ စာသင်ကျောင်းအနီးကို ဖေဖော်ဝါရီလ ၂၄ ရက်၊ ဒီနေ့ နေ့လည် ၂ နာရီကျော်အချိန်ခန့်က စစ်ကော်မရှင်တပ် လေကြောင်းတိုက်ခိုက်ခဲ့တယ်လို့ သိရပါတယ်။ အဲဒီလို လေ​ကြောင်းတိုက်ခိုက်ခဲ့တာကြောင့် ကလေးငယ်တွေအပါအဝင် အပြစ်မဲ့ပြည်သူ ၃၀ ကျော်သေဆုံးသွားပြီးဒဏ်ရာရသူတွေ အများအပြားရှိနေတယ်လို့ သိရပါတယ်။ အဲဒီယိုးငူကျေးရွာရှိ ဈေးအနီးနဲ့ စာသင်ကျောင်းအနီးကို စစ်ကော်မရှင်တပ်ဟာ ပေါင် ၅၀၀ ဗုံးတွေနဲ့ ရည်ရွယ်ချက်ရှိရှိတိုက်ခိုက်ခဲ့တာကြောင့် ကလေးငယ်တွေအပါအဝင် အပြစ်မဲ့ပြည်သူ ၃၀ ကျော်သေဆုံးပြီးထိခိုက်ဒဏ်ရာရတာတွေလည်းရှိတယ်လို့ ဒေသခံတွေကဆိုကြပါတယ်။  အဲဒီဒဏ်ရာရသူတွေထဲမှာ ဒဏ်ရာပြင်းထန်သူတွေပါဝင်တာကြောင့် သေဆုံးသူထပ်တိုးလာနိုင်တယ်လို့ သိရပါတယ်။

​Border News Agency မဲဆောက်၊ ဖေဖော်ဝါရီ ၂၄။ ​မြန်မာနိုင်ငံဘက်ခြမ်းကနေ ပြန်လည်လွှဲပြောင်းပေးလိုက်တဲ့ နိုင်ငံခြားသားတွေကို ထိုင်း - မြန်မာ အမှတ် ၂ ချစ်ကြည်ရေးတံတားမှာ ထိုင်းလူဝင်မှုကြီးကြပ်ရေးဌာနက ဖေဖော်ဝါရီလ ၂၄ ရက်၊ မနက်ပိုင်းမှာ လက်ခံစစ်ဆေးမှုတွေ ပြုလုပ်ခဲ့တယ်လို့ သိရပါတယ်။ ​အဲဒီလိုလက်ခံရာမှာ တာ့ခ်ခရိုင်လူဝင်မှုကြီးကြပ်ရေးမှူးရဲ့ ညွှန်ကြားချက်နဲ့ တာဝန်ရှိသူတွေက မဲဆောက်မြို့၊ သာ့ဆဲလော့ဒ်ကျေးရွာရှိ အမှတ် ၂ ချစ်ကြည်ရေးတံတားရဲ့ဆိုက်ရောက်ခန်းမမှာ စောင့်ကြိုလက်ခံခဲ့တာလို့ ဆိုပါတယ်။ ​အဲဒီ ပြန်လည်လွှဲပြောင်းလာသူတွေကို ထိုင်းအာဏာပိုင်တွေက ကိုယ်ရေးအချက်အလက်တွေကောက်ယူတာ၊ ဇီဝအချက်အလက် (Identity) စစ်ဆေးတာတွေအပြင် စောင့်ကြည့်လူစာရင်း (Watchlist) ထဲမှာပါဝင်တာ ရှိ၊ မရှိကိုပါ သေသေချာချာစစ်ဆေးခဲ့တယ်လို့ ဆိုပါတယ်။ ​ဒါ့အပြင် အဲဒီနိုင်ငံခြားသားတွေဟာ လူကုန်ကူးခံရသူတွေဟုတ်၊ မဟုတ်နဲ့ပတ်သက်ပြီး အမျိုးသားအဆင့်ကာကွယ်စောင့်ရှောက်ရေး ယန္တရား (NRM) အရ သက်ဆိုင်ရာဌာနစုံအဖွဲ့ဝင်တွေကပါ အသေးစိတ်စစ်ဆေးမေးမြန်းမှုတွေ ပြုလုပ်ခဲ့တယ်လို့ သိရပါတယ်။ ​အဲဒီပြန်လည်ရောက်ရှိလာသူတွေကို သက်ဆိုင်ရာလုပ်ထုံးလုပ်နည်းတွေနဲ့အညီ ဆက်လက်ဆောင်ရွက်နိုင်ဖို့အတွက် မဲဆောက်လူဝင်မှုကြီးကြပ်ရေးဌာနမှာ ထိန်းသိမ်းထားကြောင်း သိရပါတယ်။

​Border News Agency ချင်းမိုင်၊ ဖေဖော်ဝါရီ ၂၄။ ​ထိုင်းနိုင်ငံ၊ ချင်းမိုင်ခရိုင်၊ မဲအေးမြို့နယ်အတွင်းမှာ စိတ်ကြွဆေးပြား ၁ ဒသမ ၆ သန်း (၁,၆၀၀,၀၀၀ ပြား) ကို သယ်ဆောင်လာတဲ့ကားတစီးနဲ့အတူ တရားခံတဦးကို ဖမ်းဆီးရမိခဲ့တယ်လို့ ထိုင်းတော်ဝင်တပ်ဖွဲ့ (ဖာမိူင်းတပ်ဖွဲ့) က ဖေဖော်ဝါရီလ ၂၄ ရက် ၊ဒီနေ့ ထုတ်ပြန်ပါတယ်။ အဲဒီ မဲဆောင်းကျေးရွာအုပ်စုရှိ စစ်ဆေးရေးဂိတ်မှာ ဒီနေ့မနက် ၄ နာရီခွဲအချိန်ခန့်က ကင်းလှည့်နေတဲ့ နယ်ခြားစောင့်ရဲတပ်ဖွဲ့က မသင်္ကာဖွယ်ရာပစ်ကပ်ကားတစီးကို တွေ့ရှိခဲ့တာလို့ ဆိုပါတယ်။ ​အဲဒီကားဟာ စစ်ဆေးရေးအဖွဲ့ကိုမြင်တာနဲ့ ရပ်တန့်တာမရှိဘဲ အရှိန်ပြင်းစွာမောင်းပြေးခဲ့တာကြောင့် တပ်ဖွဲ့ဝင်တွေက လိုက်လံပိတ်ဆို့ခဲ့ရပြီး၊ မောင်းပြေးတဲ့ကားဟာ လမ်းဘေးရှိလျှပ်စစ်မီးတိုင်ကိုတိုက်မိကာ တိမ်းမှောက်သွားခဲ့တာဖြစ်ပါတယ်။ ​အဲဒီတိမ်းမှောက်သွားတဲ့ ကားအတွင်းကို ဝင်ရောက်စစ်ဆေးရာမှာတော့ ကားနောက်ခန်းထဲမှာ သယ်ဆောင်လာတဲ့ ဆာလာအိတ် ၈ အိတ်အတွင်းကနေ စိတ်ကြွဆေးပြားစုစုပေါင်း ၁,၆၀၀,၀၀၀ ပြားကို ရှာဖွေတွေ့ရှိခဲ့တယ်လို့ ဆိုပါတယ်။ အဲဒီ ကားမောင်းသူ အသက် ၂၆ အရွယ်ရှိအမျိုးသားကို ဖမ်းဆီးရမိထားပြီး သိမ်းဆည်းရမိတဲ့ မူးယစ်ဆေးဝါးတွေနဲ့အတူ ဥပဒေအရထိရောက်စွာ အရေးယူနိုင်ဖို့အတွက် မဲအေးရဲစခန်းကို လွှဲပြောင်းပေးအပ်ထားတယ် သိရပါတယ်။

​Border News Agency လဲချား၊ ဖေဖော်ဝါရီ ၂၃။ ​ရှမ်းပြည်တောင်ပိုင်း၊ လဲချားမြို့နယ်အတွင်းမှာ အွန်လိုင်းလိမ်လည်မှု (Scam) လုပ်ငန်းလုပ်ကိုင်နေတဲ့ တရုတ်နိုင်ငံသား ၂၅ ဦးကို လုပ်ငန်းသုံးဆက်စပ်ပစ္စည်းတွေနဲ့အတူ ဖမ်းဆီးရမိခဲ့တယ်လို့ စစ်ကော်မရှင်ကထုတ်ပြန်ထားပါတယ်။  အဲဒီလဲချားမြို့နယ်၊ နောင်လုံကျေးရွာအနီးရှိ ဖေဖော်ဝါရီလ ၂၂ ရက်နေ့က မသင်္ကာဖွယ်အဆောက်အအုံတွေကို ဝင်ရောက်စစ်ဆေးရာမှာ အွန်လိုင်းလိမ်လည်မှုလုပ်ကိုင်နေတဲ့ တရုတ်နိုင်ငံသား ၂၀ ဦးနဲ့အတူ STARLINK ဗန်း ၂ ခုအပါအဝင် ဆက်စပ်ပစ္စည်းတွေကို ဖမ်းဆီးရမိခဲ့တာလို့ ဆိုပါတယ်။ ​အဲဒီနောက် နယ်မြေအတွင်းဆက်လက်စစ်ဆေးရာမှာ တပ်မောကကျေးရွာအနီးမှာ နောက်ထပ်တရုတ်နိုင်ငံသား ၅ ဦးကို ထပ်မံဖမ်းဆီးရမိခဲ့တာကြောင့် စုစုပေါင်း ၂၅ ဦးအထိ ရှိလာခဲ့တာဖြစ်တယ်လို့ ဆိုပါတယ်။ ​အဲဒီဖမ်းဆီးရမိသူတွေရဲ့ ထွက်ဆိုချက်အရ သူတို့ဟာတရုတ်နိုင်ငံကနေ We Chat ကတဆင့် အလုပ်ကောင်းရမယ်ဆိုပြီးစည်းရုံးခံရကာ မိုင်းလား၊ ပန်ဆန်းနဲ့ မိုင်းရယ်မြို့တွေကနေတဆင့် တရားမဝင်ဝင်ရောက်လာခဲ့ကြသူတွေ ဖြစ်တယ်လို့ ဆိုပါတယ်။ ​အဲဒီ တရုတ်နိုင်ငံသားတွေဟာ ပြီးခဲ့တဲ့ ၂၀၂၅ ခုနှစ်၊ ဒီဇင်ဘာလပိုင်းကတည်းက လဲချားမြို့နယ်အတွင်းကို ရောက်ရှိနေတာဖြစ်ပြီး လက်ရှိမှာတော့ သူတို့ကို ဥပဒေအရအရေးယူနိုင်ဖို့နဲ့ သက်ဆိုင်ရာနိုင်ငံဆီ ပြန်လည်လွှဲပြောင်းပေးနိုင်ဖို့ စီစဉ်နေတယ်လို့ ဆိုပါတယ်။

​Border News Agency ထိုင်း၊ ဖေဖော်ဝါရီ ၂၄။ ​ထိုင်း - လာအိုနယ်စပ်လဲယခရိုင်၊ ထားလီမြို့နယ်အတွင်းမှာ စိတ်ကြွဆေးပြား ၁၁,၈၀၀ ပြားနဲ့အတူ တရားခံတဦးကို ဖမ်းဆီးရမိခဲ့တယ်လို့ ထိုင်းတော်ဝင်တပ်ဖွဲ့က ဖေဖော်ဝါရီလ ၂၄ ရက်၊ ဒီနေ့မှာ ထုတ်ပြန်ထားပါတယ်။ ​အဲဒီနယ်စပ်တစ်လျှောက် မူးယစ်ဆေးဝါးတွေ ခိုးယူသယ်ဆောင်လာမယ်ဆိုတဲ့သတင်းအရ အမှတ် ၂၁၀၂ ခြေလျင်တပ်ရင်းက စောင့်ကြည့်စစ်ဆေးနေစဉ်မှာ ဆိုင်ကယ်နဲ့မသင်္ကာဖွယ်မောင်းနှင်လာတဲ့ အမျိုးသားတဦးကို တွေ့ရှိခဲ့တာလို့ဆိုပါတယ်။ ​အဲဒီမသင်္ကာဖွယ်အမျိုးသားဟာ စစ်ဆေးရေးအဖွဲ့ကိုမြင်တာနဲ့ သူသယ်လာတဲ့အထုပ်တွေကိုလွှင့်ပစ်ပြီး ဆိုင်ကယ်နဲ့ အရှိန်ပြင်းစွာ မောင်းပြေးခဲ့တာကြောင့် တပ်ဖွဲ့ဝင်တွေက အဲဒီနောက်ကိုထပ်ကြပ်မကွာ လိုက်လံပိတ်ဆို့ခဲ့ရတာဖြစ်တယ်လို့ ဆိုပါတယ်။ ​အဲဒီ လိုလိုက်လံရှာဖွေရာမှာတော့ တရားခံစွန့်ပစ်ခဲ့တဲ့ အထုပ်တွေထဲကနေစိတ်ကြွဆေးပြား ၁၁,၈၀၀ ပြားနဲ့အတူ အသုံးပြုခဲ့တဲ့ ဟွန်ဒါဝေ့ဖ် ဆိုင်ကယ်တစီးကိုပါ သက်သေခံအဖြစ် သိမ်းဆည်းရမိခဲ့တယ်လို့ ဆိုပါတယ်။ ​အဲဒီ သက်သေအထောက်အထားတွေအရ အသက် ၂၀ အရွယ်ရှိတဲ့တရားခံ အမျိုးသားကိုဖမ်းဆီးရမိထားပြီးဖြစ်ကာ မူးယစ်ဆေးဝါးဥပဒေနဲ့အညီ ထိရောက်စွာအရေးယူနိုင်ဖို့အတွက် ဖုန်းထောင်ရဲစခန်းကို လွှဲပြောင်းပေးအပ်ထားတယ်လို့  သိရပါတယ်။

​Border News Agency ထိုင်း၊ ဖေဖော်ဝါရီ ၂၄။ ​ထိုင်းမှာ မြန်မာနိုင်ငံဘက်သို့ခိုးထုတ်မယ့် ကား ၂ စီးကို ဖာမိူင်းတပ်ဖွဲ့က ဖမ်းဆီးခဲ့တယ်လို့ ထိုင်းတော်ဝင်တပ်ဖွဲ့က ဖေဖော်ဝါရီလ ၂၄ ရက်၊ ဒီနေ့ထုတ်ပြန်ပါတယ်။  အဲဒီ ဖာမှိုင်းတပ်ဖွဲ့ဟာ ချင်းရိုင်ခရိုင်၊ မယ်ဆိုင်မြို့နယ်အတွင်း ကင်းလှည့်စစ်ဆေးနေချိန်မှာ သံသယဖြစ်ဖွယ်အရှိန်ပြင်းစွာ မောင်းနှင်လာတဲ့ ကား ၂ စီးကို လိုက်လံတားဆီးရာကနေ ဖမ်းဆီးရမိခဲ့တာလို့ဆိုပါတယ်။  အဲဒီ စစ်ဆေးရေးဂိတ်ကိုမရပ်ဘဲ မောင်းပြေးတဲ့ကား ၂ စီးနောက်ကို တပ်ဖွဲ့ဝင်တွေကထပ်ကြပ်မကွာ လိုက်လံပိတ်ဆို့ခဲ့ရတာဖြစ်ပြီး နယ်စပ်နဲ့နီးတဲ့ ဖာဟီးကျေးရွာအနီးမှာမှ တရားခံတွေနဲ့အတူဖမ်းဆီးနိုင်ခဲ့တယ်လို့ ဆိုပါတယ်။ အဲဒီကားတွေကို မယ်ဆိုင်မြို့ပေါ်ကနေ ယူဆောင်လာတာဖြစ်ပြီး နယ်စပ်ကဖာဟီးကျေးရွာကားပါကင်မှာ ခေတ္တရပ်နားကာ မြန်မာနိုင်ငံဘက်ခြမ်းကို တရားမဝင်ခိုးထုတ်ဖို့ စီစဉ်ထားတာလို့ ဖမ်းဆီးရမိသူတွေကထွက်ဆိုထားပါတယ်။ အဲ​ဒီလို ကားတွေကို နယ်စပ်ကျော်ပြီးပို့ဆောင်ပေးဖို့အတွက် တဦးကိုထိုင်းဘတ်ငွေ ၅,၀၀၀ စီနဲ့ ငှားရမ်းခိုင်းစေခံရတာ ဖြစ်တယ်လို့လည်း ဖမ်းဆီးရမိတဲ့ တရားခံတွေက ဝန်ခံပြောဆိုထားကြပါတယ်။ ​အဲဒီ ဖမ်းဆီးရမိတဲ့ တရားခံတွေနဲ့အတူ သက်သေခံကားတွေကို ထိုင်းနိုင်ငံရဲ့ အကောက်ခွန်ဥပဒေအရ ထိရောက်စွာ အရေးယူနိုင်ဖို့အတွက် မယ်ဆိုင်ရဲစခန်းကို လွှဲပြောင်းပေးအပ်ထားတယ်လို့ ဆိုပါတယ်။