Border News Agency
မောင်တော၊ နိုဝင်ဘာ ၂။
မြန်မာနိုင်ငံဟာ ကမ္ဘာပေါ်မှာသတင်းထောက်တွေ ဖမ်းဆီးအကျဉ်းချမှုအများဆုံးထဲမှာ တနိုင်ငံအပါအဝင်ဖြစ်တယ်လို့ ယူကေအစိုးရက ထုတ်ပြန်ပါတယ်။
၂၀၂၁ ခုနှစ်၊ စစ်အာဏာသိမ်းပြီးနောက်ပိုင်း စာနယ်ဇင်းသတင်းသမားခုနှစ်ဦးဟာ စစ်အာဏာရှင်ရဲ့သတ်ဖြတ်တာခံခဲ့ရပြီး သတင်းသမားနှစ်ရာကျော်လည်း ဖမ်းဆီးခံခဲ့ရတယ်လို့ ဆိုပါတယ်။
အဲဒီအပြင် အမျိုးသမီးသတင်းထောက်တွေအပါအဝင် အနည်းဆုံးသတင်းသမားငါးဆယ့်တဦးဟာ ဖမ်းဆီးထိန်းသိမ်းခံထားရဆဲဖြစ်တယ်လို့ ဆိုပါတယ်။
နိုင်ငံတကာသတင်းထောက်တွေအပေါ် ကျူးလွန်တဲ့ပြစ်မှုတွေအတွက် ပြစ်ဒဏ်ကင်းလွတ်တာရှိနေမှုတွေအဆုံးသတ်ရေးနေ့မှာ မြန်မာနိုင်ငံရှိစာနယ်သတင်းသမားတွေအားလုံးရဲ့ ရဲစွမ်းသတ္တိကိုဂုဏ်ပြုတယ်လို့ ယူကေအစိုးရက ဆိုပါတယ်။
အဲဒီနောက် offlineနဲ့ online အခြေအနေနှစ်မျိုးလုံးမှာ နှောက်ယှက်မှု၊ စောင့်ကြည့်မှု၊ အလွဲသုံးစားပြုမှုတွေအပါအဝင် ခြိမ်းခြောက်မှုတွေရင်ဆိုင်နေရတဲ့ အမျိုးသမီးသတင်းထောက်တွေကိုလည်း အမှတ်ရဂုဏ်ပြုတယ်လို့ ဆိုပါတယ်။
ယူကေအစိုးရဟာ မီဒီယာလွတ်လပ်ခွင့်အပေါ်ချိုးဖောက်မှုမှန်သမျှကိုရှုတ်ချပြီး မီဒီယာလွတ်လပ်ခွင့်အားအလွှဲသုံးစားလုပ်တဲ့ (သို့)ကန့်သတ်ချုပ်ချယ်သူ
တွေကို အရေးယူဆောင်ရွက်ရမယ်လို့ ယုံကြည်တယ်လို့ ဆိုပါတယ်။
အဲဒီအပြင် မြန်မာနိုင်ငံနဲ့ကမ္ဘာတဝန်းရှိ သတင်းသမားတွေ၊ လူ့အခွင့်ရေးကာကွယ်စောင့်ရှောက်သူတွေ ဘေးကင်းလုံခြုံစေရေးအတွက် အကူအညီတွေယူကေအစိုးရက ဆက်ထောက်ပံ့သွားမယ်လို့ ဆိုပါတယ်။
