Border News Agency
မောင်တော၊ ဒီဇင်ဘာ ၁၁။

အာရက္ခတပ်တော်(AA)ထိန်းချုပ်ထားတဲ့ မြောက်ဦးမြို့၊ ဆေးရုံကြီးကို စစ်ကော်မရှင်တပ်ကလေကြောင်းတိုက်ခိုက်မှုကို မောင်တောခရိုင်မူဆလင်ရေးရာကောင်စီ ကန့်ကွက်ရှုပ်ချလိုက်ပါတယ်။

စစ်ကော်မရှင်တပ်ဟာ မြန်မာနိုင်ငံအနှံ့ အပြစ်မဲ့ပြည်သူတွေရဲ့မြို့၊ ရွာ၊ နေအိမ်၊ စာသင်ကျောင်း၊ ဆေးရုံ၊ သာသနိကအဆောက်အဦးတွေကို နေ့စဉ်ရက်ဆက် လက်နက်ကြီးပစ်ခတ်တာ၊ လေကြောင်းဗုံးကြဲတိုက်ခိုက်တာ စတဲ့စစ်ရာဇဝတ်မှုတွေကို ကောက်ကျစ်ယုတ်မာလူမဆန်စွာကျူးလွန်နေတယ်လို့ ဆိုပါတယ်။

အဲဒီမြောက်ဦးမြို့ပြည်သူ့ဆေးရုံကြီးကို ဒီဇင်ဘာလ ၁၀ ရက်၊ မနေ့ည ၉ နာရီအချိန်က ရည်ရွယ်ချက်ရှိရှိလေကြောင်းတိုက်ခိုက်ခဲ့ပါတယ်။

အဲဒီလိုတိုက်ခိုက်ခဲ့တာကြောင့် ဆေးရုံမှာဆေးကုသမှုခံယူနေကြတဲ့ မူဆလင်လေးဦးအပါအဝင် လူနာစုစုပေါင်းသုံးဆယ်သုံးဦးအစုလိုက်အပြုံလိုက် သေဆုံးခဲ့ပြီး ခုနှစ်ဆယ်ခြောက်ဦးဒဏ်ရာရသွားခဲ့ပါတယ်။

အဲဒီဒဏ်ရာရသူတွေထဲမှာ ဒဏ်ရာပြင်းထန်တာကြောင့် သေဆုံးသူတွေထပ်ထိုးလာနိုင်သလို ကလေးသူငယ်တွေ၊ ကိုယ်ဝန်ဆောင်မိခင်တွေလည်း ပါဝင်ပါတယ်။

မြောက်ဦးမြို့ပြည်သူ့ဆေးရုံကြီးဟာ လူမျိုးဘာသာမရွေး အာရက္ခပြည်သူအားကိုးမှီခိုတက်ရောက်ဆေးကုသနေကြတဲ့ ပြည်သူ့ဆေးရုံကြီးဖြစ်တယ်လို့ဆိုပါတယ်။

အဲဒီစစ်ရေးပစ်မှတ်မဟုတ်နေရာကို ရည်ရွယ်ချက်ရှိရှိရက်စက်စွာ လေကြောင်းတိုက်ခိုက်တာတွေကြောင့် လူပေါင်းများစွာသေကြေဒဏ်ရာရမှုအပေါ်မှာ မောင်တောခရိုင်၊ မူဆလင်ရေးရာကောင်စီအနေနဲ့ များစွာဝမ်းနည်းကြေကွဲရတယ်လို့ဆိုပါတယ်။

စစ်ကော်မရှင်တပ်ဟာ မြောက်ဦးမြို့၊ ပြည်သူ့ဆေးရုံမှာ ဆေးကုသလျှက်ရှိနေတဲ့ လူနာတွေနဲ့မိသားစုတွေကို လူမဆန်စွာရက်စက်တဲ့ အကြမ်းဖက်သတ်ဖြတ်မှုဟာ စစ်ရာဇဝတ်မှုဖြစ်ပြီး ပြင်းထန်စွာ ကန့်ကွက်ရှုတ်ချတယ်လို့ဆိုပါတယ်။

အဲဒါကြောင့် ကမ္ဘာ့ကုလသမဂ္ဂအပါအဝင် ကမ္ဘာ့မိသားစုဝင်နိုင်ငံတွေ၊ နိုင်ငံတကာအဖွဲ့အစည်းတွေဟာ အပြစ်မဲ့ပြည်သူတွေကို နေ့စဉ်နဲ့အမျှပြောင်ပြောင်တင်းတင်းသတ်ဖြတ်နေတဲ့ စစ်ရာဇဝတ်မှုကို ကျူးလွန်နေတဲ့ စစ်ကော်မရှင်တပ်ကို လိုအပ်သလိုအရေးယူပေးပြီး ပြည်သူတွေရဲ့အသက်အိုးအိမ်တွေကို တားဆီးကာကွယ်ပေးဖို့ လိုအပ်နေတယ်လို့ ဆိုပါတယ်။