Border News Agency
နယ်သာလန်၊ ဇန်နဝါရီ ၁၃။
နယ်သာလန်နိုင်ငံ၊ ICJ တရားရုံးမှာ ရင်ဆိုင်နေရတဲ့အမှုနဲ့ပတ်သက်ပြီး နိုင်ငံနဲ့ ပြည်သူအတွက် တဖွဲ့လုံးက အစွမ်းကုန် ကြိုးစားကာကွယ်သွားမယ်လို့ စစ်ကော်မရှင်ရဲ့ပြည်ထောင်စုဝန်ကြီး ဦးကိုကိုလှိုင်ကဆိုပါတယ်။
ICJ တရားရုံးမှာရင်ဆိုင်နေရတဲ့အမှုနဲ့ပတ်သက်ပြီး ကိုကိုလှိုင်က ဇန်နဝါရီ ၁၂ ရက်၊ မနေ့က ပြောကြားလိုက်တာပါ။
ဒီအမှုဟာ ၂၀၁၆-၂၀၁၇ ခုနှစ် ရခိုင်ပြည်မြောက်ပိုင်း ဖြစ်စဉ်တွေအပေါ် ဂမ်ဘီယာနိုင်ငံက စွဲဆိုထားတာဖြစ်ပြီး မနေ့ကစလို့ နှစ်ဖက်နှုတ်နဲ့ လျှောက်လဲချက်ပေးရမယ့်ပထမဆုံးရုံးချိန်းကို စတင်လိုက်တာပါ။
စစ်ကော်မရှင်ဝန်ကြီးကတော့ မြန်မာကိုယ်စားပြုအဖွဲ့အပေါ် သတင်းမှားတွေထွက်နေပေမယ့် မိမိတို့အဖွဲ့ဟာ တာဝန်ကို ကျေပွန်စွာ ထမ်းဆောင်နေတယ်လို့ ဆိုပါတယ်။
အဲဒီအမှုစစ်ဆေးမှုအစီအစဉ်အရ ဂမ်ဘီယာဘက်က စတင်လျှောက်လဲမှာဖြစ်ပြီး မြန်မာနိုင်ငံဘက်ကတော့ လာမယ့် ဇန်နဝါရီ ၁၆ ရက်မှာ ပြန်လည်လျှောက်လဲသွားမှာပါ။
အဲဒီနောက်ပိုင်းမှာတော့ နှစ်ဖက်သက်သေတွေကို တရားရုံးမှာ ဆက်လက်စစ်ဆေးသွားဖို့ ရှိနေပါတယ်လို့ဆိုပါတယ်။
တရားရင်ဆိုင်နေရတဲ့ ကာလအတွင်းမှာ ကိုဗစ်-၁၉ ကပ်ရောဂါ၊ဆိုင်ကလုန်းမိုခါနဲ့ သဘာဝဘေးအန္တရာယ် အခက်အခဲတွေ အများကြီး ကြုံခဲ့ရပေမယ့် အဖွဲ့ဝင်တွေ စည်းလုံးစွာ ကြိုးပမ်းခဲ့ကြသလို ပြည်သူလူထုရဲ့ ထောက်ခံမှုကိုလည်း အထူးတန်ဖိုးထားတယ်လို့ စစ်ကော်မရှင်ဝန်ကြီးကဆိုပါတယ်။
အဲဒီအပြင် နိုင်ငံတကာမျက်နှာစာမှာ မြန်မာနိုင်ငံရဲ့ ဂုဏ်သိက္ခာနဲ့အချုပ်အခြာအာဏာကို ထိပါးလာမယ့် စွပ်စွဲချက်တွေကို ဥပဒေကြောင်းအရခိုင်ခိုင်မာမာ တုံ့ပြန်နိုင်ဖို့ ပြည်တွင်းပြည်ပကျွမ်းကျင်ပညာရှင်တွေနဲ့ ပူးပေါင်းဆောင်ရွက်နေတယ်လို့လည်း ဆိုပါတယ်။
အဲဒီတရားရုံးရဲ့ ဆုံးဖြတ်ချက်တွေဟာ နိုင်ငံရဲ့ရှေ့လုပ်ငန်းစဉ်တွေအပေါ်သက်ရောက်မှုရှိနိုင်တာကြောင့် အမှုသွားအမှုလာ အဆင့်တိုင်းကို အနီးကပ်စောင့်ကြည့်ပြီး နိုင်ငံတော်အကျိုးစီးပွားအကာအကွယ်ရဖို့ အလေးထားဆောင်ရွက်သွားမယ်လို့လည်းဆိုပါတယ်။
