Border News Agency
တောင်ကုတ်၊ ဇန်နဝါရီ ၁၇။
အာရက္ခတပ်တော်ထိန်းချုပ်ထားတဲ့ တောင်ကုတ်မြို့နယ်မှာ အမျိုးသားတဦးရေနစ်သေဆုံးနေတဲ့ ရုပ်အလောင်းကို ဇန်နဝါရီလ ၁၆ ရက်၊ ညနေပိုင်းမှာ တွေ့ခဲ့တယ်လို့ ဒေသခံတွေကဆိုကြပါတယ်။
အဲဒီတောင်ရွာက အသက်လေးဆယ်သုံးနှစ်အရွယ် ဦးကိုကိုမျိုးကို ရေနစ်သေဆုံးနေတာကို ဒေသခံတွေတွေ့ခဲ့ကြတာပါ။
သူဟာ ဇန်နဝါရီလ ၁၅ ရက်၊ မနက်ပိုင်းကတည်းက အိမ်ကနေထွက်သွားပြီးနောက် ပြန်မရောက်ပဲ ပျောက်ဆုံးနေခဲ့တယ်လို့ ရွာသားတွေကဆိုကြပါတယ်။
အိမ်ပြန်မလာလို့ မိသားစုနဲ့ ရွာသားတွေ ဝိုင်းဝန်းရှာဖွေခဲ့ကြရာမှာ ဇန်နဝါရီလ ၁၆ ရက်၊ ညနေ ၅ နာရီခွဲအချိန် တောင်ရွာအနီးရှိ ချောင်းကမ်းစပ်မှာ သေဆုံးနေတာကို ရှာတွေ့ခဲ့တာဖြစ်ပါတယ်။
အဲဒီသေဆုံးသွားတဲ့ ဦးကိုကိုမျိုးဟာ စိတ်ဝေဒနာခံစားနေရသူတဦး ဖြစ်တယ်လို့လည်း မိသားစုဝင်တွေကဆိုကြပါတယ်။
အာရက္ခပြည်အတွင်းမှာ အခုလိုရေနစ်သေဆုံးမှုတွေဟာ မကြာခဏဆိုသလို ဖြစ်ပွားနေတာဖြစ်ပြီး ပြီးခဲ့တဲ့ မိုးရာသီကာလအတွင်းမှာလည်း မြို့နယ်အသီးသီးမှာ ရေနစ်သေဆုံးသူ အများအပြားရှိခဲ့ပါတယ်။
အဲဒီလိုဖြစ်စဉ်တွေ များပြားနေတာကြောင့် မိသားစုဝင်တွေအနေနဲ့ မိမိတို့အိမ်က ကလေးငယ်တွေနဲ့ စိတ်ဝေဒနာခံစားနေရသူတွေကို မြစ်၊ ချောင်းကမ်းစပ်တွေမှာအန္တရာယ်မဖြစ်အောင် အရင်ကထက် ပိုပြီး ဂရုစိုက်ကြည့်ရှုကြဖို့ လိုအပ်နေတယ်လို့ ဒေသခံတွေက ဆိုကြပါတယ်။
