Border News Agency
ထိုင်း၊ ဇန်နဝါရီ ၂၈။
ထိုင်းနိုင်ငံ၊ အယုဒ္ဓယမြို့မှာရှိတဲ့ စင်ထိဝါရပ်ကွက်ထဲမှာ ဇန်နဝါရီလ ၁၉ ရက်၊ မနေ့ညနေပိုင်းက ထိုင်းနိုင်ငံသားတဦးနဲ့ မြန်မာလုပ်သားတဦးတို့ ကားတိုက်မှုဖြစ်ပွားခဲ့ပါတယ်။
အဲဒီဖြစ်စဉ်ကြောင့် အဲဒီရပ်ကွက်ထဲမှာရှိတဲ့ မြန်မာအလုပ်သမားအဆောင်တွေကို ဒေသခံ “နှုတ်ခမ်းမွှေးအဖွဲ့” လို့ လူသိများတဲ့ ထိုင်းအမျိုးသားအုပ်စုကဝင်ရောက်စီးနင်းပြီး မြန်မာလုပ်သားတွေကို ကိုယ်ထိလက်ရောက်ရိုက်နှက်တာ၊ ခြိမ်းခြောက်တာတွေ လုပ်ဆောင်ခဲ့တယ်လို့ သိရပါတယ်။
အဲဒီလို ရုတ်ရုတ်သဲသဲ ဖြစ်ပွားနေစဉ်အတွင်းမှာပဲ ထိုင်းအာဏာပိုင်တွေက ဝင်ရောက်စစ်ဆေးခဲ့တာကြောင့် အထောက်အထားမဲ့ မြန်မာလုပ်သားလေးဆယ့်ရှစ်ဦး ဖမ်းဆီးခံခဲ့ရပါတယ်။
“အခုနှစ်ပတ်အတွင်းမှာတင် အဖမ်းခံရတဲ့မြန်မာပေါင်း တစ်ရာကျော်နေပြီ၊ ဘယ်နေရာမှလည်းလုံခြုံမှုမရှိသလို ခံစားရတယ်” လို့ ထိုင်းရောက်မြန်မာလုပ်သားတဦးက Border News Agency ကို ပြောပါတယ်။
အဲဒီလို မြန်မာလုပ်သားတွေ ပစ်မှတ်ထားနှိပ်ကွပ်ခံနေရတာဟာ ပြီးခဲ့တဲ့ရက်ပိုင်းက စမွတ်ပရကန်မှာဖြစ်ပွားခဲ့တဲ့ မြန်မာ – ထိုင်း ပဋိပက္ခရဲ့အကျိုးဆက်တွေ ဖြစ်နိုင်တယ်လို့လည်း အလုပ်သမားအရေးကူညီပေးနေသူတွေက ဆိုကြပါတယ်။
အဲဒီအပြင် ဇန်နဝါရီလ ၁၈ ရက်နေ့က ကန်ချနဘူရီနယ်စပ်ဘက်ကနေ တရားမဝင်ဝင်ရောက်လာတဲ့ မြန်မာနိုင်ငံသား လေးဆယ့်ရှစ်ဦးကိုလည်း ထိုင်းအာဏာပိုင်တွေက ထပ်မံဖမ်းဆီးရမိခဲ့ပါတယ်။
အဲဒီထဲမှာ အမျိုးသားနှစ်ဆယ့်ခြောက်ဦး၊ အမျိုးသမီး ဆယ့်ခုနှစ်ဦးနဲ့ ကလေးငါးဦးပါဝင်ပြီး သူတို့အားလုံးကို နယ်စပ်ကနေတဆင့် မြန်မာပြည်ဘက်ပြန်ပို့ဖို့ စီစဉ်နေတယ်လို့ သိရပါတယ်။
