Border News Agency
လယ်ဒို၊ ဇန်နဝါရီ ၂၁။
ခလယ်လွီထူခရိုင်၊ လယ်ဒိုမြို့နယ်မှာ စစ်ကော်မရှင်တပ်ဆီ အတင်းအဓမ္မစစ်မှုထမ်းစေခိုင်းခံရသူခုနှစ်ဦး ပြီးခဲ့တဲ့ဇန်နဝါရီလ ၁၈ ရက်နေ့က လက်နက်ချအလင်းဝင်လာတယ်လို့ ကရင်အမျိုးသားအစည်းအရုံးက ထုတ်ပြန်ပါတယ်။
အဲဒီအလင်းဝင်လာသူတွေဟာ လယ်ဒိုမြို့နယ်၊ တုံးတံတားမှာ တာဝန်ကျနေတဲ့ခလရ ၅၃ တပ်ရင်းက တပ်သားတွေဖြစ်ပြီး ကရင်အမျိုးသားကာကွယ်ရေးတပ်ဖွဲ့ (KNDO) တပ်ရင်း ၃ ဆီလာရောက်ပူးပေါင်းလာတာလို့ ဆိုပါတယ်။
အဲဒီအသက်နှစ်ဆယ့်ကိုးနှစ်အရွယ် မောင်သီဟဝင်း၊ အသက်နှစ်ဆယ့်ရှစ်နှစ်အရွယ် မောင်ဆက်နိုင်၊ အသက်နှစ်ဆယ့်ရှစ်နှစ်အရွယ် မောင်မြင့်တင်၊ အသက်သုံးဆယ်ငါးနှစ်အရွယ် မောင်အောင်ကို၊ အသက်သုံးဆယ်အရွယ် မောင်တင်အောင်မိုး၊ အသက်နှစ်ဆယ့်ခြောက်နှစ်အရွယ် မောင်သိန်းဇော်ဝင်းနဲ့ အသက်နှစ်ဆယ့်ကိုးနှစ်အရွယ် မောင်နေမျိုးဦး တို့ဖြစ်ပါတယ်။
အဲဒီအလင်းဝင်လာသူတွေဟာ မိမိတို့ဆန္ဒမပါဘဲ အတင်းအဓမ္မစစ်မှုထမ်းစေခိုင်းခံရသူတွေဖြစ်ပြီး လက်ရှိမှာသူတို့ကို ကောင်းမွန်စွာထိန်းသိမ်းစောင့်ရှောက်ထားတယ်လို့ ဆိုပါတယ်။
အဲဒီအပြင် စစ်ကော်မရှင်တပ်အတွင်း အတင်းအဓမ္မ စစ်မှုထမ်းစေခိုင်းခံနေရသူတွေအနေနဲ့လည်း မိမိတို့နဲ့နီးစပ်ရာ တော်လှန်ရေးတပ်ဖွဲ့တွေဆီ အလင်းဝင်ရောက်ကြဖို့ တိုက်တွန်းထားပါတယ်။
အဲဒါကြောင့် စစ်ကော်မရှင်တပ်အတွင်း အတင်းအဓမ္မစစ်မှုထမ်းဖို့ခေါ်ဆောင်သူတွေဟာ ခုလိုလက်နက်နဲ့တကွ ပြည်သူဘက်ကို ကူးပြောင်းလာတာတွေ ဆက်တိုက်ရှိနေတယ်လို့လည်း ဆိုပါတယ်။
