Border News Agency
ဒူးသထူခရိုင်၊ ဇန်နဝါရီ၂၁။
ကော်သူးလေအုပ်ချုပ်မှုနယ်မြေ၊ ဒူးသထူခရိုင်မှာ စစ်ကော်မရှင်တပ်လက်နက်ကြီးပစ်ခတ်လို့ ဘုန်းကြီးကျောင်းရှိ ဆွမ်းစားဆောင်တလုံးပျက်စီးသွားတယ်လို့ ကရင်အမျိုးသားအစည်းအရုံးက ဇန်နဝါရီလ ၂၁ ရက်၊ ဒီနေ့ ထုတ်ပြန်ပါတယ်။
အဲဒီပဲခူးတိုင်း၊ ဝေါမြို့နယ်၊ လက်ပန်ရွာမှာ အခြေချထားတဲ့စစ်ကော်မရှင်တပ်မှ အရပ်သားပြည်သူနေထိုင်တဲ့ရွာကို ဇန်နဝါရီလ ၁၈ ရက်၊ ည ၈ နာရီဝန်းကျင်အချိန်က လက်နက်ကြီးပစ်ခတ်ခဲ့တာလို့ ဆိုပါတယ်။
အဲဒီအပြင် စစ်ကော်မရှင်တပ်ရဲ့အမှတ် – ၃၁၀ အမြောက်တပ်ရင်းက ၁၂၀ မမ လက်နက်ကြီးခြောက်လုံးကို ရည်ရွယ်ချက်ရှိရှိပစ်ခတ်ခဲ့တာကြောင့် ကျိုက်ထိုမြို့နယ်၊ ခရွဲကျေးရွာအုပ်စုကို ကျရောက်ပေါက်ကွဲခဲ့တယ်လို့ ဆိုပါတယ်။
အဲဒီလိုလက်နက်ကြီးပစ်ခတ်မှုကြောင့် ခရွဲရွာဘုရားကုန်း ဘုန်းကြီးကျောင်းရှိ ဆွမ်းစားဆောင်ခေါင်မိုးပေါ်တလုံး၊ ကျောင်းဝန်းကျင်အပြင်မှာ တလုံးပေါက်ကွဲခဲ့တယ်လို့ ဆိုပါတယ်။
အဲဒီအပြင် သုံးခွရွာအပြင်မလိခ စက်သုံးဆီအရောင်းဆိုင်အနီးမှာနှစ်လုံး၊ အခိုင်ရွာဘေးမှာနှစ်လုံးကျရောက်ပေါက်ကွဲခဲ့ပြီး ဆွမ်းစားဆောင်တလုံးလည်းပျက်စီးသွားတယ်လို့ ဆိုပါတယ်။
