Border News Agency
ရုရှား၊ ဇန်နဝါရီ ၂၁။
ရုရှား၊ တရုတ်၊ ဂျပန်နဲ့ အမေရိကန်နိုင်ငံတွေမှာ ပုံမှန်မဟုတ်တဲ့ရာသီဥတုပြောင်းလဲမှုတွေကြောင့် ဆယ်စုနှစ်အတွင်း အဆိုးရွားဆုံးအအေးလှိုင်းနဲ့ နှင်းမုန်တိုင်းဒဏ်ကို တပြိုင်တည်းဖြစ်နေတယ်လို့ သိရပါတယ်။
အဲဒီဖြစ်စဉ်တွေနဲ့ပတ်သက်ပြီး ဇန်နဝါရီလ တတိယအပတ်အတွင်းမှာ ရုရှား၊ တရုတ်၊ ဂျပန်နဲ့ အမေရိကန်နိုင်ငံလေးနိုင်ငံစလုံးက အရေးပေါ်ကြေညာချက်တွေ ထုတ်ပြန်ထားပါတယ်။
ရုရှားနိုင်ငံရဲ့ ကမ်ချက်ကာကျွန်းဆွယ်မှာ နှစ်ပေါင်း ၆၀ အတွင်း အဆိုးရွားဆုံးနှင်းကျမှုဖြစ်ပွားနေပြီး နှင်းထုအနက် ၂ မီတာကျော်ထိ ရှိနေပါတယ်။
အဲဒီအပြင် လမ်းတွေနဲ့ကားတွေနှင်းဖုံးလွှမ်းကုန်လို့ စစ်တပ်နဲ့အရေးပေါ်ဌာနတွေက ပူးပေါင်းရှင်းလင်းနေရသလို အအေးဒဏ်ကြောင့်လူသေဆုံးမှုတွေလည်း ရှိနေပါတယ်။
နောက်ပြီးတရုတ်နိုင်ငံရဲ့ ဟီနန်ပြည်နယ်နဲ့ ရှန်ဟိုင်းမြို့အပါအဝင် ဒေသအများအပြားမှာ နှင်းတွေထူထပ်စွာ ကျဆင်းနေပါတယ်။
ကျန်းကျိုးမြို့မှာ ကျောင်းအားလုံးကိုပိတ်ထားရပြီး နှင်းရှင်းလင်းဖို့အတွက် ဝန်ထမ်းသုံးသောင်းကျော်နဲ့ စက်ယန္တရားလေးထောင်ကျော် အသုံးပြုနေရပါတယ်။
အဲဒီအပြင် ရှန်ဟိုင်းမှာလည်း ၂၀၁၈ ခုနှစ်နောက်ပိုင်း ပထမဆုံးအကြိမ်နှင်းအပြင်းအထန် ကျဆင်းနေတာ ဖြစ်ပါတယ်။
နောက်ပြီး ဂျပန်နိုင်ငံရဲ့ဟော့ကိုင်းဒိုးနဲ့ မြောက်ပိုင်းဒေသတွေမှာ နှင်းမုန်တိုင်းကြောင့် လေယာဉ်ခရီးစဉ်တရာကျော် ဖျက်သိမ်းခဲ့ရပြီး ခရီးသည်ခြောက်ထောင်ကျော် သောင်တင်နေပါတယ်။
အမြန်ရထားလိုင်းတွေလည်း ပြတ်တောက်နေပြီး အရေးပေါ်သတိပေးချက်တွေ ထုတ်ပြန်ထားပါတယ်။
အဲဒီအပြင် အမေရိကန်နိုင်ငံရဲ့နယူးယောက်ကနေ တက္ကဆက်ပြည်နယ်အထိ နှင်းမုန်တိုင်းသတိပေးချက်တွေ ထုတ်ပြန်ထားပြီး အသက်အန္တရာယ်ရှိတဲ့ အေးစိမ့်လေဒဏ်ကိုသတိထားကြဖို့ နှိုးဆော်ထားပါတယ်။
လေထုပညာရှင်တွေကတော့ ဒါတွေဟာအာတိတ်ဒေသက အေးခဲလေထုတွေတောင်ဘက်ကို လျှံကျလာတဲ့အတွက် အခုလိုပုံမှန်မဟုတ်တဲ့ ရာသီဥတုဒဏ်ကို ခံစားနေရတာဖြစ်တယ်လို့ ထောက်ပြထားပါတယ်။
