Border News Agency
ဂန့်ဂေါ၊ ဇန်နဝါရီ ၂၄။
ဂန့်ဂေါမြို့မှာဒရုန်းဗုံးဒဏ်ကြောင့် မြို့မရဲစခန်းက ဒုရဲအုပ်တဦးသေဆုံးသွားတယ်လို့ ယောအလင်းတန်းမှ ဇန်နဝါရီလ ၂၄ရက်၊ ဒီနေ့ထုတ်ပြန်ပါတယ်။
ဂန့်ဂေါမြို့ ခလရ ၅၀ တပ်အနီးလမ်းဆုံရှိ စစ်ကော်မရှင်ဂိတ်တခုကို ပြည်သူ့တော်လှန်ရေးအင်အားစုတွေက ဇန်နဝါရီလ၁၂ ရက်နေ့က ဒရုန်းဗုံးသီးလေးလုံးနဲ့ တိုက်ခိုက်ခဲ့တယ်လို့ ဆိုပါတယ်။
အဲဒီလိုတိုက်ခိုက်ခဲ့တာကြောင့် စစ်ကော်မရှင်ဂိတ်မှာရှိနေကြတဲ့ ပြည်သူ့စစ်မှုထမ်းတပ်သားသစ်နှစ်ဦးနဲ့ ရဲတပ်ဖွဲ့ဝင်နှစ်ဦး ဒဏ်ရာရသွားတယ်လို့ ဆိုပါတယ်။
အဲဒီဂန့်ဂေါမြို့မရဲစခန်းက ဒုရဲအုပ်တဦးဟာ ရရှိထားတဲ့ဒရုန်းဗုံးဒဏ်ရာတွေကြောင့် ဇန်နဝါရီလ ၂၄ ရက်၊ ဒီနေ့သေဆုံးသွားခဲ့ပြီး မိုးကောင်းသင်္ချိုင်းမှာ သင်္ဂြိုဟ်လိုက်ကြတယ်လို့ ဆိုပါတယ်။
အဲဒီအပြင် လာမယ့်ဇန်နဝါရီလ ၂၅ ရက်နေ့ စစ်အုပ်စုရဲ့အပိုင်း ၂ အတုအယောင်ရွေးကောက်ပွဲအတွက် ခလရ ၅၀ တပ်ကတပ်ဖွဲ့ဝင်တွေဟာ ဒီနေ့မနက် ၉ နာရီကစလို့ ဂန့်ဂေါမြို့ပတ်လည်နေရာတွေမှာ ကင်းပုန်းတွေကြိုတင်ချထားတယ်လို့လည်း ဆိုပါတယ်။
အဲဒါကြောင့် လာမယ့်ဖေဖော်ဝါရီလ ၁၂ ရက်နေ့၊ ပြည်ထောင်စုနေ့မှာလည်း အထိမ်းအမှတ်ပွဲကို ခလရ ၅၀ တပ်ကဦးစီးပြီး ဘောလုံး၊ ဘော်လီဘော၊ ခြင်းလုံးပွဲတွေနဲ့ကျင်းပဖို့အတွက်စီစဉ်နေတယ်လို့ ဆိုပါတယ်။
အဲဒီပြိုင်တွေအတွက်ဆုပေးနိုင်ဖို့ ဂန့်ဂေါမြို့ကပြည်သူ့နေအိမ်တွေ၊ စတားလင့်ဆိုင်တွေကို ငွေကြေးလိုက်လံကောက်ခံနေပြီး ထွေအုပ်ရုံးမှာလာရောက်ပေးသွင်းကြဖို့ကိုလည်း ညွှန်ကြားထားတယ်လို့ ဆိုပါတယ်။
နောက်ပြီးဇန်နဝါရီလ ၅ ရက်နေ့က အသစ်ရောက်ရှိလာခဲ့တဲ့ ဂန့်ဂေါခလရ ၅၀ တပ်ကတပ်ရင်းမှူးကို ဒီလကုန်မှာမိခင်တပ်ရင်းဖြစ်တဲ့ တပ်မ ၃၃ တပ်ရင်းကို ပြန်လည်ခေါ်ယူမှာဖြစ်တယ်လို့ ဆိုပါတယ်။
