Border News Agency
မြိုင်၊ ဇန်နဝါရီ ၂၅။
မကွေးတိုင်း၊ မြိုင်မြို့နယ်၊ ကန်နီပျူစောထီးကျေးရွာမှာ စစ်ကော်မရှင်တပ်နဲ့ တော်လှန်ရေးတပ်တွေတိုက်ပွဲဖြစ်ပွားလို့ တော်လှန်ရေးတပ်ဖွဲ့သုံးဦးကျဆုံးခဲ့တယ်လို့ မြိုင်မြို့နယ် ပကဖ က ဇန်နဝါရီလ ၂၄ ရက်၊ မနေ့ကထုတ်ပြန်ပါတယ်။
အဲဒီကန်နီရွာအနီးမှာ ဇန်နဝါရီလ ၂၂ ရက်နေ့က ရိက္ခာရှာနေတဲ့စစ်ကော်မရှင်တပ်ဖွဲ့ဝင်တွေကို တော်လှန်ရေးရဲဘော်တွေကတိုက်ခိုက်လို့ တနာရီနီးပါးထိတွေ့တိုက်ပွဲဖြစ်ပွားခဲ့တယ်လို့ ဆိုပါတယ်။
အဲဒီတိုက်ပွဲအတွင်း စစ်ကော်မရှင်ဘက်က အပြင်းအထန်ခုခံတာကြောင့် တော်လှန်ရေးတပ်ဖွဲ့ဝင်တွေ ပြန်လည်ဆုတ်ခွာခဲ့ရပြီး တော်လှန်ရေးရဲဘော်သုံးဦးကျဆုံးကာ တဦးအရှင်ဖမ်းဆီးခံခဲ့ရတယ်လို့ ဆိုပါတယ်။
အဲဒီစစ်ကော်မရှင်တပ်ဖွဲ့ဝင်တွေဟာ ဇန်နဝါရီလ ၁၅ ရက်နေ့က ရိက္ခာရှာဖွေနေတာကို ကင်းထောက်ဒရုန်းတွေနဲ့တွေ့ရှိခဲ့လို့ တော်လှန်ရေးအဖွဲ့တွေက ချဉ်းကပ်တိုက်ခိုက်ခဲ့တာလို့ ဆိုပါတယ်။
စစ်ကော်မရှင်တပ်တွေ အင်အားသုံးလှုပ်ရှာလာတာမို့ တော်လှန်ရေးခေါင်းဆောင်ငယ်တွေအနေနဲ့ ရန်သူ့သတင်းကို စနစ်တကျထောက်လှမ်းပြီးမှ စစ်ရေးလှုပ်ရှားကြဖို့ မြိုင်ပကဖ က အထူးသတိပေးထားပါတယ်။
