Border News Agency
မဲဆောက်၊ ဖေဖော်ဝါရီ ၆။
ထိုင်းနိုင်ငံ၊ တာ့ခ်ခရိုင်၊ မဲဆောက်မြို့နယ်အုပ်ချုပ်ရေးမှူးနဲ့ လဝကတပ်ဖွဲ့တွေဦးဆောင်ပြီး ဖေဖော်ဝါရီလ ၆ ရက်၊ ဒီနေ့မနက်ပိုင်းမှာ မဲဆောက်မြို့ကအလုပ်သမားတည်းခိုရာတွေနဲ့ အလုပ်ရုံတွေကို ကွင်းဆင်းစစ်ဆေးခဲ့ပါတယ်။
အဲဒီစစ်ဆေးမှုကို မဲဆောက်စည်ပင်နယ်နိမိတ်ထဲက ပါကျရင်ဈေး (Pha Charoen Market) နဲ့ အနီးဝန်းကျင်မှာရှိတဲ့ အလုပ်သမားတည်းခိုရာနေရာတွေမှာ လုပ်ဆောင်ခဲ့တာဖြစ်ပြီး လုံခြုံရေးတပ်ဖွဲ့တွေနဲ့ အလုပ်သမားဝန်ကြီးဌာန တာဝန်ရှိသူတွေလည်း ပါဝင်ခဲ့ပါတယ်။
အဲဒီစစ်ဆေးမှုအတွင်း ရွှေ့ပြောင်းလုပ်သားတွေရဲ့ Passport / CI နဲ့ အလုပ်လုပ်ကိုင်ခွင့် (Work Permit) ရှိ၊ မရှိကို အဓိကထားစစ်ဆေးခဲ့တာဖြစ်ပြီး တရားမဝင် ဝင်ရောက်လာသူတွေကို ဖမ်းဆီးဖို့လုပ်ဆောင်ခဲ့တာလို့ ဆိုပါတယ်။
အဲဒီလိုကွင်းဆင်းစစ်ဆေးပြီးနောက် ခွင့်ပြုချက်မရှိဘဲအလုပ်လုပ်နေသူ ဒါမှမဟုတ် သတ်မှတ်ထားတဲ့အလုပ်ရှင်မဟုတ်ဘဲ အလုပ်လုပ်နေတဲ့ ရွှေ့ပြောင်းလုပ်သား အမျိုးသားနှစ်ဦးနဲ့ အမျိုးသမီးလေးဦး၊ စုစုပေါင်းခြောက်ဦးကို ဖမ်းဆီးရမိခဲ့ပါတယ်။
အဲဒီဖမ်းဆီးရမိသူတွေကို ဥပဒေအရအရေးယူနိုင်ဖို့ မဲဆောက်မြို့နယ်ရဲစခန်းမှာ အမှုဖွင့်လှစ်ထားတယ်လို့ သိရပါတယ်။
