Border News Agency
ယင်းမာပင်၊ ဖေဖော်ဝါရီ ၁၉။
ယင်းမာပင်ခရိုင်အတွင်းရှိ BNRA အဖွဲ့ဝင်တွေအနေနဲ့ မိမိတို့ထံရှိလက်နက်ခဲယမ်းတွေကို လာရောက်အပ်နှံဖို့ ယင်းမာပင်ခရိုင် ပြည်သူ့ကာကွယ်ရေးအဖွဲ့ (ပကဖ) က ဖေဖော်ဝါရီလ ၁၉ ရက်၊ ဒီနေ့မှာ အမိန့်ကြော်ငြာစာထုတ်ပြန်လိုက်ပါတယ်။
အဲဒီ ယင်းမာပင်ခရိုင်အတွင်းနေထိုင်ပြီး BNRA အဖွဲ့က ထုတ်ပေးထားတဲ့ လက်နက်ကိုင်ဆောင်ထားသူ ရဲဘော်တွေအနေနဲ့ မိမိတို့နေထိုင်ရာ ခရိုင် သို့မဟုတ် မြို့နယ် ပကဖ အဖွဲ့တွေထံသို့ အမြန်ဆုံးဆက်သွယ်ကာ လက်နက်နဲ့ ဆက်စပ်ပစ္စည်းတွေကို လာရောက်အပ်နှံရမှာ ဖြစ်ပါတယ်။
ဒါ့အပြင် BNRA အဖွဲ့က ထုတ်ပေးထားတဲ့ လက်နက်ခဲယမ်းတွေကို ရောင်းချတာ၊ ပေါင်နှံတာ၊ ဖျောက်ဖျက်တာနဲ့ ဖျက်ဆီးတာတွေ လုံးဝမပြုလုပ်ကြဖို့ တားမြစ်ထားပြီး၊ အကယ်လို့ စစ်ဆေးပေါ်ပေါက်လာပါက ပြင်းထန်စွာအရေးယူသွားမယ်လို့လည်း သတိပေးထားပါတယ်။
နောက်ပြီး သက်ဆိုင်ရာရပ်ကျေးနဲ့ တိုက်နယ်အဆင့် ပကဖ၊ ပအဖ အဖွဲ့တွေအနေနဲ့လည်း မိမိတို့နယ်မြေအတွင်း အခြေချနေထိုင်တဲ့ BNRA ရဲဘော်တွေရှိပါက သတင်းစကားပါးပေးဖို့နဲ့ ခရိုင်၊ မြို့နယ် ပကဖ တာဝန်ခံတွေဆီသို့ ချိတ်ဆက်ပေးကြဖို့ ညွှန်ကြားထားပါတယ်။
