Border News Agency
မကွေး၊ မတ် ၂။
မကွေးတိုင်း၊ မင်းတုန်းမြို့နယ်၊ ပြောင်းကျေးရွာရှိ ကုန်တင်ကားရပ်နားတဲ့နေရာကို မတ်လ ၁ ရက်နေ့၊ မနက်ပိုင်းမှာ စစ်ကော်မရှင်တပ်က တိုက်လေယာဥ်နှစ်စီးနဲ့ ရည်ရွယ်ချက်ရှိရှိလေကြောင်းတိုက်ခိုက်ခဲ့ပါတယ်။
အဲဒီပြောင်းကျေးရွာကို ပေါင် ၅၀၀၊ ပေါင် ၃၀၀ ဗုံးတွေ၊ ရော့ကက်တွေအသုံးပြုပြီး တိုက်ခိုက်ခဲ့တာကြောင့် ကားသမားတွေနဲ့ အလုပ်သမားတွေအနားယူနေချိန်မှာ အစုလိုက်အပြုံလိုက် ထိခိုက်သေဆုံးခဲ့ရတာပါ။
အဲဒီလိုတိုက်ခိုက်ခဲ့တာကြောင့် ရက္ခိုင်လူမျိုးတွေအပါအဝင် အရပ်သားပြည်သူ ၂၅ ဦး သေဆုံးခဲ့ပြီး ၂၀ ကျော်ဒဏ်ရာရရှိခဲ့ပါတယ်။
သေဆုံးသူတွေထဲမှာ အမျိုးသား ၁၄ ဦး၊ အမျိုးသမီး ၂ ဦးနဲ့ ရုပ်ပျက်ဆင်းပျက်ဖြစ်နေတဲ့ အလောင်း ၉ လောင်းပါဝင်ပါတယ်။
အဲဒီအမ်းမြို့နယ်နဲ့ တပ်တောင်မြို့တို့က ရက္ခိုင်လူမျိုး ၈ ဦးရဲ့ အမည်စာရင်းတွေကိုလည်း အတည်ပြုနိုင်ခဲ့ပါတယ်။
အဲဒီလေကြောင်းတိုက်ခိုက်ခံရတဲ့နေရာဟာ ရခိုင်ဒေသကိုကုန်စည်ပို့ဆောင်တဲ့ အဓိကကုန်တင်ကားကွင်းဖြစ်ပြီး ကား ၁၄ စီးနဲ့ ကုန်ပစ္စည်းအများအပြား မီးလောင်ပျက်စီးခဲ့ပါတယ်။
စစ်ကော်မရှင်တပ်ဟာ အာရက္ခတပ်တော်ထိန်းချုပ်နယ်မြေတွေအပါအဝင် တော်လှန်ရေးတပ်တွေထိန်းချုပ်နယ်မြေတွေရှိ အရပ်သားပြည်သူတွေကို လေကြောင်းတိုက်ခိုက်တာ၊ လက်နက်ကြီးပစ်ခတ်တာတွေ နေ့စဥ်ပြုလုပ်နေတာကြောင့် အရပ်သားတွေနေ့စဥ်နဲ့အမျှ အစုလိုက်အပြုံလိုက် သေဆုံး၊ ဒဏ်ရာရနေကြရပါတယ်။
