Border News Agency
ထိုင်း၊ စက်တင်ဘာ ၂၅။
ထိုင်းနိုင်ငံ၊နွန်းသဘူရီခရိုင်၊ချောင်းဝတ္ထန-ပက်ဂရက်ဒေသမှာ မိုးသည်းထန်းစွာဆက်တိုက်ရွာသွန်းတာကြောင့် လမ်းမပေါ် ရေကြီးရေလျှံမှုတွေဖြစ်ပေါ်နေပြီး ထိုင်းကြည်းတပ်မတော် အမှတ် (၁၁) ခြေလျင်တပ်ရင်း ကယ်ဆယ်ရေးအဖွဲ့တွေက သွားရောက်ကူညီပေးနေပါတယ်။
ထိုင်းတပ်မတော်ကယ်ဆယ်ရေးအဖွဲ့ဟာ တပ်ရင်းအနီးဝန်းကျင်ရှိ ရေကြီးနိုင်ခြေရှိတဲ့ စိုးရိမ်ရနေရာတွေနဲ့ ရေနှုတ်မြောင်း အခြေအနေတွေကို ကွင်းဆင်းစစ်ဆေးနေပါတယ်။
အဲဒီအပြင် ခရီးသွားပြည်သူတွေ ယာဉ်ကြောပိတ်ဆို့မှုမရှိစေဖို့ လမ်းကြောင်းရှင်းလင်းပေးတာနဲ့ ဘေးကင်းလုံခြုံရေးအတွက် သတိပေးနှိုးဆော်ချက်တွေထုတ်ပြန်ထားတာပါ။
အရေးပေါ် ကူညီကယ်ဆယ်ရေးလုပ်ငန်းတွေကိုလည်း အချိန်နဲ့တပြေးညီ ကူညီပေးနိုင်ဖို့ ၂၄ နာရီပတ်လုံး ပြင်ဆင်ထားကြောင်း ထိုင်းကြည်းတပ်မတော် သတင်းထုတ်ပြန်ရေးဗဟိုကဆိုပါတယ်။
