Border News Agency
ရန်ကုန်၊ ဖေဖော်ဝါရီ ၂၈။
မြန်မာနိုင်ငံမှာ စစ်တပ်အာဏာသိမ်းပြီးနောက်ပိုင်း အကျဉ်းဦးစီးဌာနရဲ့ စီမံခန့်ခွဲမှုညံ့ဖျင်းတာကြောင့် နိုင်ငံရေးအကျဉ်းသား ၂၇၄ ဦးထက်မနည်း အသက်ဆုံးရှုံးခဲ့ရတယ်လို့ မြန်မာနိုင်ငံလုံးဆိုင်ရာ နိုင်ငံရေးအကျဉ်းသားများကွန်ရက် (PPNM) က ဖေဖော်ဝါရီလ ၂၈ ရက်၊ ဒီနေ့ထုတ်ပြန်ပါတယ်။
PPNM နဲ့ မြန်မာ့အကျဉ်းထောင်သက်သေ (MPW) တို့ ပူးတွဲလုပ်ဆောင်တဲ့ သုတေသနအရ အဲဒီအကျဉ်းသားတွေဟာ ထောင်တွင်းသတ်ဖြတ်ခံရတာ၊ ဆေးဝါးစောင့်ရှောက်မှုမလုံလောက်တာနဲ့ သဘာဝဘေးအန္တရာယ်တွေကြုံရချိန်မှာ စနစ်တကျစီမံခန့်ခွဲမှုမရှိတာတွေကြောင့် သေဆုံးခဲ့ရတာလို့ ထောက်ပြထားပါတယ်။
အာဏာသိမ်းပြီးချိန်ကစလို့ နိုင်ငံတော်ခေါင်းဆောင်တွေအပါအဝင် တက်ကြွလှုပ်ရှားသူတွေ၊ သတင်းသမားတွေနဲ့ CDMer တွေကို မတရားဖမ်းဆီးကာ အကျဉ်းထောင်တွေမှာလူမဆန်စွာ ညှဉ်းပန်းနှိပ်စက်တာ၊ လိင်ပိုင်းဆိုင်ရာအမြတ်ထုတ်တာနဲ့ ဥပဒေမဲ့သတ်ဖြတ်တာတွေကို ကျူးလွန်ခဲ့တယ်လို့ ဆိုပါတယ်။
စစ်အုပ်စုအနေနဲ့ အသက်ရှင်သန်ပိုင်ခွင့်အပါအဝင် အခြေခံလူ့အခွင့်အရေးတွေကိုနည်းမျိုးစုံနဲ့ ဖောက်ဖျက်ကျူးလွန်နေပေမယ့် လက်ရှိအချိန်အထိ အပြစ်ပေးအရေးယူခံရတာမရှိဘဲ ကင်းလွတ်ခွင့်ရနေတာကိုလည်း PPNM က ဝေဖန်ထောက်ပြထားပါတယ်။
အဲဒါကြောင့် နိုင်ငံတကာအစိုးရတွေအနေနဲ့ ထောင်တွင်းသေဆုံးမှုတွေအတွက် တာဝန်ခံမှုရှိလာအောင် ဝိုင်းဝန်းဖော်ဆောင်ပေးဖို့နဲ့ ဒေါ်အောင်ဆန်းစုကြည်အပါအဝင် နိုင်ငံရေးအကျဉ်းသားအားလုံး ချွင်းချက်မရှိလွတ်မြောက်ရေးအတွက် ထိရောက်တဲ့ဖိအားပေးမှုတွေလုပ်ဖို့ PPNM က တောင်းဆိုထားပါတယ်။
