Border News Agency
အမေရိကန်၊ ဖေဖော်ဝါရီ ၂၈။
အမေရိကန်နဲ့ အစ္စရေးတို့ရဲ့ တိုက်ခိုက်မှုတွေကို တုံ့ပြန်တဲ့အနေနဲ့ အီရန်နိုင်ငံဟာ ဘာရိန်း (Bahrain) နိုင်ငံမှာရှိတဲ့ အမေရိကန်ပဉ္စမမြောက်ရေတပ်ဖွဲ့ဌာနချုပ် (U.S. 5th Fleet) တည်ရှိရာ အယ်လ် – ဂျူဖဲ (Al-Juffair) ရေတပ်အခြေစိုက်စခန်းကို ဒုတိယလှိုင်း (2nd Wave) အဖြစ် ဒုံးကျည်အမြောက်အမြားနဲ့ ပစ်ခတ်တိုက်ခိုက်လိုက်ပြီ ဖြစ်ပါတယ်။
ဒီတိုက်ခိုက်မှုဟာ အမေရိကန်ရဲ့ အရှေ့အလယ်ပိုင်းဒေသတွင်း အရေးအပါဆုံး ရေတပ်ဗဟိုချက်ကို တိုက်ရိုက်ပစ်မှတ်ထားတာဖြစ်ပြီး အီရန်ဘက်ကပစ်လွှတ်လိုက်တဲ့ ဒုံးကျည်တွေကြောင့် အခြေစိုက်စခန်းအတွင်း ပေါက်ကွဲမှုတွေ ဖြစ်ပေါ်နေတယ်လို့ မြေပြင်သတင်းအချို့အရ သိရပါတယ်။
အမေရိကန် ပဉ္စမမြောက်ရေတပ်ဖွဲ့ဟာ ပင်လယ်ကွေ့ဒေသရဲ့ လုံခြုံရေးနဲ့ ရေကြောင်းသွားလာမှုကိုထိန်းချုပ်ထားတဲ့ အဓိကတပ်ဖွဲ့ဖြစ်တာကြောင့် အခုလိုတိုက်ခိုက်ခံရမှုဟာ အမေရိကန်စစ်တပ်အတွက် ကြီးမားတဲ့စိန်ခေါ်မှုတစ်ခု ဖြစ်လာပါတယ်။
ဘာရိန်းနိုင်ငံတစ်ဝှမ်းမှာလည်း လေကြောင်းရန် သတိပေးချက်တွေ ထုတ်ပြန်ထားရသလို အခြေစိုက်စခန်းအတွင်းရှိ အမေရိကန်စစ်သည်တွေဟာ အရေးပေါ်အခြေအနေအဖြစ် တုံ့ပြန်ဆောင်ရွက်နေရတယ်လို့ သိရပါတယ်။
အီရန်က အမေရိကန်ရဲ့ ဒေသတွင်းအခြေစိုက်စခန်းတွေကိုပါ တရားဝင်စတင်လက်တုံ့ပြန်လာတာကြောင့် စစ်ပွဲဟာ အီရန် – အစ္စရေး ပဋိပက္ခကနေ အမေရိကန်နဲ့ တိုက်ရိုက်စစ်ပွဲအဆင့်ကို ကူးစက်သွားပြီဖြစ်ပါတယ်။
