Border News Agency
အဘူဒါဘီ၊ ဖေဖော်ဝါရီ ၂၈။
အီရန်နိုင်ငံကပစ်လွှတ်လိုက်တဲ့ ဒုံးကျည်အစအနတွေဟာ ယူအေအီးနိုင်ငံ၊ အဘူဒါဘီမြို့က လူနေရပ်ကွက်အတွင်း ကျရောက်ပေါက်ကွဲခဲ့တာကြောင့် အာရှနွယ်ဖွားအရပ်သားတဦး သေဆုံးသွားခဲ့ရပါတယ်။
ဒါဟာ ဘာရိန်းနိုင်ငံမှာရှိတဲ့ အမေရိကန်စစ်ဘက်ဆိုင်ရာ အခြေခံအဆောက်အအုံတွေကို အီရန်ကဒုံးကျည်တွေနဲ့ ပစ်မှတ်ထားတိုက်ခိုက်ရာကနေ နောက်ဆက်တွဲဖြစ်ပွားခဲ့တာ ဖြစ်ပါတယ်။
အထူးသဖြင့် ဘာရိန်းနိုင်ငံအတွင်းက အမေရိကန်ရေတပ် စစ်ဆင်ရေးတွေနဲ့ ဆက်နွှယ်နေတဲ့ အဓိကဗျူဟာမြောက်နေရာတွေမှာ ပြင်းထန်တဲ့ပေါက်ကွဲမှုတွေ ဖြစ်ပွားခဲ့တယ်လို့ သိရပါတယ်။
တချိန်တည်းမှာပဲ အီရန်ကပစ်လွှတ်လိုက်တဲ့ ဘောလစ်စတစ်ဒုံးကျည် အတော်များများကို ယူအေအီး (UAE) လေကြောင်းရန်ကာကွယ်ရေးစနစ်က ကြားဖြတ်ဟန့်တားနိုင်ခဲ့ပေမယ့် ဒုံးကျည်အစအနတွေကြောင့် အခုလို အရပ်သားသေဆုံးမှုနဲ့ အဆောက်အအုံထိခိုက်ပျက်စီးမှုတွေ ဖြစ်ခဲ့တာပါ။
ဒီတိုက်ခိုက်မှုတွေဟာ အရှေ့အလယ်ပိုင်းဒေသတွင်းမှာရှိတဲ့ အမေရိကန်ရဲ့ စစ်ရေးဗဟိုချက်တွေကို အီရန်ကအကြီးအကျယ် လက်တုံ့ပြန်နေတာလည်း ဖြစ်ပါတယ်။
အဘူဒါဘီမှာရှိတဲ့ ဒေသခံတွေရိုက်ကူးထားတဲ့ မှတ်တမ်းတွေအရ ကောင်းကင်ယံမှာ ဒုံးကျည်တွေကြားဖြတ်တိုက်ခိုက်ခံရတဲ့ပေါက်ကွဲသံတွေဟာ တုန်ခါနေအောင်ထွက်ပေါ်ခဲ့တာကို တွေ့ရပါတယ်။
အခုလို အမေရိကန်အခြေစိုက်စခန်းတွေ ဆက်တိုက်တိုက်ခိုက်ခံနေရတဲ့အပြင် အရပ်သားတွေပါ ထိခိုက်သေဆုံးမှုရှိလာတာကြောင့် ဒေသတွင်းစစ်ပွဲဟာ ပိုပြီးစိုးရိမ်စရာ အခြေအနေကိုရောက်လာပါတယ်။
