Border News Agency
အီရန်၊မတ် ၂။
အီရန်နိုင်ငံကနေ ဒေသတွင်းနိုင်ငံတွေဖြစ်တဲ့ ဘာရိန်း၊အီရတ်၊ဂျော်ဒန်၊ကူဝိတ်၊အိုမန်၊ဂါတာ၊ဆော်ဒီနဲ့ယူအေအီးနိုင်ငံတွေကို ဒရုန်းတွေ၊ဒုံးကျည်တွေနဲ့ရမ်းသန်းတိုက်ခိုက်ခဲ့တာနဲ့ပတ်သက်ပြီး အမေရိကန်ပြည်ထောင်စုနဲ့မဟာမိတ် ၇ နိုင်ငံက မတ်လ ၁ ရက်နေ့မှာ ပြင်းပြင်းထန်ထန်ပူးတွဲကန့်ကွက်လိုက်ပါတယ်။
အခုလိုအီရန်ရဲ့လုပ်ရပ်ဟာ အချုပ်အခြာအာဏာပိုင်နယ်မြေတွေကိုကျူးကျော်စော်ကားတာဖြစ်သလို ဒေသတွင်း တည်ငြိမ်မှုကိုလည်း တမင်ဖျက်ဆီးလိုက်တာဖြစ်တယ်လို့ ဆိုပါတယ်။
အဲဒီတိုက်ခိုက်မှုတွေဟာ ဘာကြောင့်မှလုပ်သင့်လုပ်ထိုက်တဲ့လုပ်ရပ်မဟုတ်ဘဲအရပ်သားပြည်သူတွေကို အန္တရာယ်ဖြစ်စေသလို၊လူထုအခြေပြုအခြေခံအဆောက်အအုံတွေကိုပါ ပျက်စီးစေခဲ့တယ်လို့ဆိုပါတယ်။
အဲဒါကြောင့်လည်း အီရန်ရဲ့လုပ်ရပ်ဟာ အလွန်မိုက်မဲပြီး အခြေအနေတွေကို ပိုမိုဆိုးရွားအောင် တွန်းပို့လိုက်တဲ့ အပြုအမူဖြစ်တယ်လို့ မဟာမိတ်နိုင်ငံတွေပူးတွဲကြေညာချက်မှာ ထည့်သွင်းပြောဆိုထားပါတယ်။
အခုလို အကျပ်အတည်းကာလမှာ မိမိတို့ရဲ့ နိုင်ငံသားတွေ၊အချုပ်အခြာအာဏာနဲ့ နယ်မြေတွေကို ကာကွယ်ဖို့အတွက် အားလုံးတညီတညွတ်တည်းရပ်တည်နေကြတယ်လို့ဆိုပါတယ်။
ဒါ့အပြင် အီရန်ရဲ့တိုက်ခိုက်မှုတွေကို တုံ့ပြန်ရာမှာ မိမိကိုယ်မိမိခုခံကာကွယ်ပိုင်ခွင့်ရှိတယ်ဆိုတာကိုလည်း အမေရိကန်နဲ့မဟာမိတ်နိုင်ငံတွေထပ်လောင်းအတည်ပြုတယ်လို့ဆိုပါတယ်။
ဒေသတွင်းလုံခြုံရေးအတွက်လည်း ဆက်လက်ပူးပေါင်းဆောင်ရွက်သွားမှာဖြစ်ပြီး အခုလို တိုက်ခိုက်မှုတွေကြောင့် လူအသက်ပေါင်းများစွာ ဆုံးရှုံးရမှာကို တားဆီးပေးနိုင်ခဲ့တဲ့ လေကြောင်းကာကွယ်ရေးစနစ်တွေရဲ့ ထိရောက်မှုကိုလည်း ချီးကျူးခဲ့ကြပါတယ်။
မဟာမိတ်အဖွဲ့တွေအနေနဲ့နောက်ထပ်ဖြစ်လာမယ့် ဘယ်လိုခြိမ်းခြောက်မှုကိုမဆို စုပေါင်းခုခံသွားဖို့ အသင့်ရှိနေတယ်လို့ ဆိုပါတယ်။
