Border News Agency
အမေရိကန်၊ မတ် ၁၀။
ဆော်ဒီအာရေးဗီးယားမှာရှိတဲ့ အမေရိကန်စစ်အခြေစိုက်စခန်းကို အီရန်က ဒုံးကျည်နဲ့တိုက်ခိုက်ခဲ့တုန်းက ပြင်းပြင်းထန်ထန် ဒဏ်ရာရခဲ့တဲ့ အသက် ၂၆ နှစ်အရွယ် တပ်ကြပ်ကြီး ဘင်ဂျမင် အန် ပန်နင်တန် (Sgt. Benjamin N. Pennington) ဟာ မတ်လ ၈ ရက်နေ့ကထပ်မံသေဆုံးသွားပြီလို့ အမေရိကန်စစ်ဌာနချုပ်က ထုတ်ပြန်ပါတယ်။
သူဟာ ဒုံးကျည်ရန်ကာကွယ်ရေးအတွက် ကြိုတင်သတိပေးစနစ်တွေကို ပံ့ပိုးပေးရတဲ့ မဟာဗျူဟာမြောက်ရေဒါစခန်းမှာ တာဝန်ထမ်းဆောင်နေသူတဦး ဖြစ်ပါတယ်။
အဲဒီမတိုင်ခင် ပြီးခဲ့တဲ့ မတ်လ ၁ ရက်နေ့တုန်းကလည်းကူဝိတ်နိုင်ငံ၊ ရွှေအီဘာဆိပ်ကမ်းမှာ အီရန်ဒရုန်းနဲ့ တိုက်ခိုက်ခံရတာကြောင့် မေဂျာဂျက်ဖရီ အိုဘရိုင်ယန်၊အရာရှိ ရောဘတ် မာဇန်နဲ့ ဗိုလ်ကြီး ကိုဒီအေကော့ခ် အပါအဝင် အရန်တပ်ဖွဲ့ဝင် ၄ ဦး သေဆုံးခဲ့ရပါသေးတယ်။
အဲဒါကြောင့် လက်ရှိအရှေ့အလယ်ပိုင်းမှာ အီရန်နဲ့ ဖြစ်ပွားနေတဲ့ စစ်ပွဲအတွင်း အမေရိကန်စစ်သည် သေဆုံးသူစုစုပေါင်းဟာ အခုဆိုရင် ၇ ဦးအထိ ရှိလာခဲ့ပြီ ဖြစ်ပါတယ်။
အမေရိကန်ဗဟိုစစ်ဌာနချုပ် (CENTCOM) အနေနဲ့ အီရန်ရဲ့ဒရုန်းနဲ့ ဒုံးကျည်တိုက်ခိုက်မှုတွေကြောင့် ရှေ့လျှောက် အသေအပျောက်တွေ ထပ်ရှိလာနိုင်တယ်လို့လည်း သတိပေးထားပါတယ်။
