Border News Agency
ယူအေအီး၊ မတ် ၁၂။
ယူအေအီးနိုင်ငံ၊ ဒူဘိုင်းမြို့အနီးက အထပ်မြင့်အဆောက်အအုံတခုရဲ့ အပေါ်ထပ်တိုက်ခန်းကို မတ်လ ၁၁ ရက်၊ မနေ့ညအချိန်က ဒရုန်းတစင်းလာရောက်ထိမှန်ခဲ့တယ်လို့ ယူအေအီးအာဏာပိုင်တွေက အတည်ပြုထုတ်ပြန်ပါတယ်။
အဲဒီဖြစ်စဉ်ဟာ ဒေသတွင်းတင်းမာမှုတွေပြင်းထန်နေချိန်မှာဖြစ်ပွားခဲ့တာဖြစ်ပြီး ဒရုန်းထိမှန်မှုကြောင့် တိုက်ခန်းရဲ့အပေါ်ဆုံးထပ်မှာ ပျက်စီးမှုတွေရှိခဲ့တယ်လို့ဆိုပါတယ်။
အဲဒါကြောင့်လက်ရှိမှာ ယူအေအီးလုံခြုံရေးတပ်ဖွဲ့တွေက နယ်မြေတဝိုက်ကိုပိတ်ဆို့ထားပြီး စုံစမ်းစစ်ဆေးမှုတွေအပြင်းအထန် လုပ်ဆောင်နေတယ်လို့ဆိုပါတယ်။
ဒရုန်းဟာ ဘယ်ကနေလာသလဲဆိုတာနဲ့ ဘယ်လိုအမျိုးအစားလဲဆိုတာကို အသေးစိတ်စစ်ဆေးနေသလို ဒရုန်းပျက်ကျရတဲ့အကြောင်းရင်းနဲ့ပတ်သက်ပြီးတော့လည်း ပတ်ဝန်းကျင်ကအခြေအနေတွေကိုပါ ပြန်လည်သုံးသပ်နေတယ်လို့ဆိုပါတယ်။
အဲဒီဖြစ်စဉ်ကြောင့် လူထိခိုက်ဒဏ်ရာရတာ ဒါမှမဟုတ်သေဆုံးမှု ရှိ၊ မရှိဆိုတဲ့ အသေးစိတ်အချက်အလက်တွေကိုတော့ အာဏာပိုင်တွေဘက်က တရားဝင် ထုတ်ပြန်ထားတာ မရှိသေးပါဘူး။
ဒါပေမယ့် လူမှုကွန်ရက်ပေါ်မှာ ထွက်ပေါ်နေတဲ့ဗီဒီယိုဖိုင်တွေနဲ့ ပုံရိပ်တွေအရတော့အထပ်မြင့်တိုက်ခန်းရဲ့ ပြတင်းပေါက်တွေနဲ့ နံရံအချို့ထိခိုက်ပျက်စီးသွားတာကို မြင်တွေ့နေရပါတယ်။
ပင်လယ်ကွေ့ဒေသတွင်းမှာရှိတဲ့ စီးပွားရေးပစ်မှတ်တွေကိုတိုက်ခိုက်မယ်လို့ အီရန်ဘက်ကနေခြိမ်းခြောက်မှုတွေရှိနေတာကြောင့် အခုဖြစ်စဉ်အပေါ် လုံခြုံရေးတပ်ဖွဲ့တွေက အထူးသတိထားကိုင်တွယ်နေတာပါ။
အာဏာပိုင်တွေအနေနဲ့လည်း နောက်ထပ်ဖြစ်လာနိုင်တဲ့အန္တရာယ်တွေကိုကာကွယ်ဖို့အတွက် မြို့တွင်းလုံခြုံရေးကိုအမြင့်ဆုံးအဆင့်အထိ တိုးမြှင့်ထားတယ်လို့ သိရပါတယ်။
ဒူဘိုင်းရဲတပ်ဖွဲ့နဲ့သက်ဆိုင်ရာ လုံခြုံရေးအဖွဲ့တွေကတော့ ပြည်သူတွေအနေနဲ့စိုးရိမ်ထိတ်လန့်တာမရှိကြဖို့နဲ့ တရားဝင်ထုတ်ပြန်ချက်တွေကိုသာ စောင့်ကြည့်ကြဖို့ တိုက်တွန်းထားပါတယ်။
လက်ရှိမှာတော့ အခင်းဖြစ်ပွားရာနေရာကို သန့်ရှင်းရေးလုပ်ငန်းတွေနဲ့အတူ အပျက်အစီးတွေကိုလိုက်လံစစ်ဆေးနေပြီး စုံစမ်းစစ်ဆေးမှုတွေပြီးစီးတာနဲ့ အခြေအနေအသေးစိတ်ကို ထပ်မံအသိပေးသွားမယ်လို့ သိရပါတယ်။
