Border News Agency
မီဇိုရမ်၊ မတ် ၁၃။
ရခိုင်ကုန်သည်တဦး မေ့ကျန်ခဲ့တဲ့ ရူပီး ၁၅ သိန်း (မြန်မာကျပ်ငွေ သိန်း ၇၅၀ ခန့်) ကို ပြန်လည်အပ်နှံခဲ့သူ မီဇိုရမ်သုံးဘီးဆရာ Pu Henry ကို မီဇိုရမ်ပြည်နယ် ဝန်ကြီးချုပ်က မတ်လ ၁၃ ရက်၊ဒီနေ့မှာဂုဏ်ပြုဆုချီးမြှင့်လိုက်ပါတယ်။
အိုင်ဇောလ်မြို့မှာ ကျင်းပတဲ့ မီဇိုရမ်ရဲ့ အကြီးကျယ်ဆုံး Chapchar Kut ပွဲတော်မှာ ဝန်ကြီးချုပ်ကိုယ်တိုင် ဂုဏ်ပြုမှတ်တမ်းလွှာ၊ ဖလားနဲ့ ဆုငွေ ရူပီး ၁ သိန်းကို ပေးအပ်ခဲ့တာပါ။
လောင်တလိုင်မြို့သား Pu Henry ဟာ ပြီးခဲ့တဲ့ ၂၀၂၅ ခုနှစ်၊ဇွန်လအတွင်းက သူ့ရဲ့သုံးဘီးပေါ်မှာ ရခိုင်ကုန်သည်တဦး မေ့ကျန်ခဲ့တဲ့ အိတ်အမဲရောင်ထဲက ငွေတွေကို ပိုင်ရှင်ထံ ပြန်လည်အပ်နှံခဲ့သူ ဖြစ်ပါတယ်။
သူ့ရဲ့ ရိုးသားဖြောင့်မတ်မှုကြောင့် မီဇိုရမ်ပြည်နယ်အစိုးရက ပြည်နယ်ရဲ့ စံပြပုဂ္ဂိုလ်အဖြစ် ရွေးချယ်ပြီး အခုလို ထိုက်ထိုက်တန်တန် ဂုဏ်ပြုခဲ့တာဖြစ်ပါတယ်။
