Border News Agency
တီဟီရန်၊ ဧပြီ ၄ ။
အီရန်နိုင်ငံအပေါ် အမေရိကန်နဲ့ အစ္စရေးတို့ရဲ့ တိုက်ခိုက်မှု ၃၆ ရက်မြောက်နေ့မှာ အမေရိကန် တိုက်လေယာဉ်နှစ်စီး (F-15E နဲ့ A-10) ပစ်ချခံခဲ့ရတယ်လို့ အီရန်ဘက်က ထုတ်ပြန်လိုက်ပါတယ်။
လက်ရှိမှာပျောက်ဆုံးနေတဲ့ အမေရိကန် လေသူရဲတဦးကို လိုက်လံရှာဖွေနေရသလို ကယ်ဆယ်ရေး ရဟတ်ယာဉ်တစီးလည်း အီရန်ဘက်ကပစ်ခတ်မှုကြောင့် ထိမှန်ခဲ့တယ်လို့ သိရပါတယ်။
အီရန်အာဏာပိုင်တွေကတော့ သူတို့မှာ အဆင့်မြင့် လေကြောင်းကာကွယ်ရေးစနစ်သစ် ရှိနေသေးတာကို ဒါက သက်သေပြလိုက်တာပဲလို့ ဆိုပါတယ်။
စစ်ပွဲစတင်ခဲ့တဲ့ ဖေဖော်ဝါရီ ၂၈ ကနေ ဒီနေ့အထိ အီရန်နိုင်ငံအတွင်း သေဆုံးသူ ၂,၀၀၀ ကျော်နဲ့ ဒဏ်ရာရသူ ၂၆,၀၀၀ ကျော် ရှိလာပြီဖြစ်ကြောင်း အီရန်ဘက်က အတည်ပြုထားပါတယ်။
စစ်ရေးအပြင် သံတမန်ရေးအရလည်း တင်းမာနေပြီး ၄၈ နာရီ အပစ်ရပ်စဲဖို့ အမေရိကန်ရဲ့ ကမ်းလှမ်းချက်ကို အီရန်က ပယ်ချခဲ့ပါတယ်။
အမေရိကန်သမ္မတ ထရန့်က အီရန်ကို ကျောက်ခေတ်ရောက်အောင် ဗုံးကြဲမယ်လို့ ခြိမ်းခြောက်နေတာဟာ စစ်ရာဇဝတ်မှု ကျူးလွန်ဖို့ ဝန်ခံလိုက်တာပဲလို့ အီရန်သမ္မတက နိုင်ငံတကာကို သတိပေးလိုက်ပါတယ်။
အဲဒီစစ်ပွဲရဲ့ ရိုက်ခတ်မှုကြောင့် အိမ်နီးချင်း ပင်လယ်ကွေ့နိုင်ငံတွေဖြစ်တဲ့ ယူအေအီး၊ကူဝိတ်နဲ့ ဘရိန်းနိုင်ငံတွေမှာလည်း ပေါက်ကွဲမှုနဲ့ ဒုံးကျည်အစအနတွေကြောင့် ထိခိုက်သေဆုံးမှုတွေ ရှိနေပါတယ်။
အစ္စရေးနိုင်ငံမှာလည်း စစ်စရိတ် ဒေါ်လာ ၁၁၂ ဘီလီယံကျော် သုံးစွဲထားရတာကြောင့် စီးပွားရေး ထိခိုက်နေပြီး စာသင်ကျောင်းတွေကိုလည်း ဆက်လက်ပိတ်ထားရဆဲ ဖြစ်ပါတယ်။
ကမ္ဘာတစ်ဝှမ်းမှာလည်း စစ်ပွဲဒဏ်ကြောင့် စားသောက်ကုန်ဈေးနှုန်းတွေ ၂.၄ ရာခိုင်နှုန်း မြင့်တက်လာသလို သြစတြေးလျနိုင်ငံမှာစက်သုံးဆီ ပြတ်လပ်မှုတွေနဲ့ ရင်ဆိုင်နေရပါတယ်။
သမ္မတထရန့်ကတော့ စစ်ပွဲကုန်ကျစရိတ်တွေကြောင့် ၂၀၂၇ ခုနှစ်အတွက် ဒေါ်လာ ၁.၅ ထရီလီယံအထိရှိမယ့် သမိုင်းဝင် စစ်သုံးစရိတ်ဘတ်ဂျက်ကို ကွန်ဂရက်လွှတ်တော်ဆီ တောင်းခံထားပါတယ်။
