Border News Agency
ပုဏ္ဏားကျွန်း၊ မေ ၂၆။
အာရက္ခတပ်တော်ထိန်းချုပ်နယ်မြေက စစ်ဘေးရှောင်တွေဟာ မိုးရာသီမရောက်ခင် အမိုးအကာတွေလိုအပ်နေတယ်လို့ စစ်ဘေးရှောင်တွေက ဆိုကြပါတယ်။
အာရက္ခဒေသမှာ နေ့စဥ်ရက်ဆက် အချိန်ကျမိုးတွေရွာသွန်းနေတာမို့ အမိုးအကာတွေမရှိတာကြောင့် လမ်းဘေးတွေနဲ့ ကွင်းပြင်နေရာတွေမှာ အဆင်ပြေသလို တဲအိမ်ထိုးပြီးနေကြရတယ်လို့ စစ်ဘေးရှောင်တွေကဆိုကြပါတယ်။
“အမိုးအကာက အရေးတကြီးလိုအပ်နေပါတယ်။မိုးရွာရင် ဟိုနားကပြို၊ ဒီနားကပြိုနဲ့ နေထိုင်ဖို့ လုံးဝအဆင်မပြေတော့ပါဘူး။ အခက်အခဲတွေ အများကြီးရှိနေပါတယ်။ ဒါတွေကို ကူညီပေးကြဖို့ တောင်ဆိုချင်ပါတယ်။” လို့ စစ်ဘေးရှောင်အမျိုးသားတဦး Border News Agency ကိုပြောပါတယ်။
လက်ရှိမှာ မိုးသက်လေပြင်းတိုက်ခတ်တာတွေရှိနေတာမို့ တာပေါ်လင်တွေမကောင်းတော့တာတွေ၊ ဓနိဟောင်းတွေလည်းပျက်စီးသွားတယ်လို့ စစ်ဘေးရှောင်တွေကဆိုကြပါတယ်။
အဲဒါကြောင့် မိုးရာသီမရောက်ခင် နေအိမ်တွေကိုပြုပြင်ဖို့ ဝါးတွေ၊ အမိုးအကာတွေ၊ တာပေါ်လင် တွေလိုအပ်နေတယ်လို့ စစ်ဘေးရှောင်တွေက ဆိုကြပါတယ်။
“မိုးရာသီ လုံလုံခြုံခြုံ နေနိုင်ဖို့ အမိုးအကာတွေဖြစ်တဲ့တာပေါ်လင်စနဲ့ ဓနိတွေလိုအပ်တယ်။စခန်းတွေလည်း ဟောင်းနေတော့ ပြန်ပြုပြင်ဖို့ ဝါးလည်းလိုအပ်တယ်။အခက်အခဲကတော့ ငွေရေး၊ ကြေးရေးအဆင်မပြေကြဘူး။ခုလည်း မိုးတွေရွာနေလို့ အဟောင်းတွေနဲ့ မိုးယိုတဲ့နေရာတွေကို ဖာထေးပြီးနေနေရတယ်။ တတ်နိုင်မယ်ဆိုရင် စခန်းတိုင်းမှာအမိုးအကာတွေ လုံလုံခြုံခြုံရချင်ပါတယ်” လို့ ပုဏ္ဏားကျွန်းမြို့နယ်၊ဂဏန်းတောင်စစ်ဘေးရှောင်စခန်းက စစ်ဘေးရှောင် ဦးမောင်နီသာက Border News Agency ကိုပြောပါတယ်။
ဒီနှစ်မိုးရာသီမှာ အမိုးအကာတွေမလုံခြုပဲနေရရင် အသက်ရှင်သန်နေထိုင်ဖို့အတွက် အခက်အခဲအများကြီးဖြစ်သွားမယ်လို့ သူကဆိုပါတယ်။
အဲဒီအပြင် စစ်ဘေးရှောင်စခန်းတွေဟာလည်း ပြီးခဲ့တဲ့နှစ်ကတည်းက ဝါးထရံ၊ဓနီနဲ့ တာပေါ်လင်တွေအသုံးပြုဆောက်လုပ်ထားတာ ဖြစ်တာကြောင့် တာရှည်မခံတဲ့အတွက် အကူအညီတွေလိုအပ်နေတာဖြစ်တယ်လို့ဆိုကြပါတယ်။
အာရက္ခဒေသမှာ ကုန်ပစွည်းတွေစျေးအဆမတန်မြင့်တက်နေသလို အမိုးအကာတွေဟာလည်း ဆယ့်ရှစ်ပေပတ်လည်ကို တစ်သိန်း၊ သုံးဆယ်ပေပတ်လည်ကို နှစ်သိန်းကျော်အထိ ဈေးရှိနေပါတယ်။
အဲဒီအပြင် ဓနိချပ် နှစ်တောင်ရှည်တဲ့ အချပ်ရေတစ်ရာကို လေးသောင်းကျပ်၊ ဝါးအလုံးရေတစ်ရာကို ကျပ်တစ်သိန်းအထိဈေးနှုန်းတွေ မြင့်တက်နေတာကြောင့် စစ်ဘေးရှောင်တွေအနေနဲ့ ဝယ်ယူပြုပြင်ဖို့ အခက်အခဲတွေအများကြီးရှိနေတယ်လို့ ဆိုကြပါတယ်။
“မိုးရာသီနီးကပ်လာနေပေမယ့် စစ်ဘေးရှောင်တွေရဲ့ နေ့စဥ်လိုအပ်ချက် စားသောက်ရေးတွေကိုသာ ဦးစားပေးဆောင်ရွက်နေရတယ်။အမိုးအကာတွေကတော့ လက်လှမ်းမီသလောက် အရမ်းအခက်အခဲဖြစ်နေကြတဲ့ အရေးကြီးတဲ့နေရာတချို့လောက်ကိုသာ ကူညီပေးနေရတာရှိတယ်။ စစ်ဘေးရှောင်တိုင်း အမိုးအကာတွေနဲ့လုံလုံခြုံခြုံနေဖို့ ပြည်ပရောက်ရခိုင်တွေနဲ့ နိုင်ငံတကာကအကူညီတွေလိုအပ်နေပါတယ်။ တတ်နိုင်သလောက်ဝိုင်းဝန်းကူကြဖို့လည်း မေတ္တာရပ်ခံပါတယ်လို့” လူမှုကူညီကယ်ဆယ်ရေးလုပ်နေသူတစ်ဦးက Border News Agency ကို ပြောပါတယ်။
အဲဒီအပြင် စစ်ကောင်စီထိန်းချုပ်ထားဆဲဖြစ်တဲ့ ကျောက်ဖြူ၊ စစ်တွေ၊ မာန်အောင်မြို့နယ်တွေမှာလည်း စစ်ဘေးရှောင် ခြောက်သောင်းခန့် မိုးရာသီအတွက် အမိုးအကာတွေလိုအပ်နေတယ်လို့ လူမူကူညီရေးလုပ်ကိုင်နေသူတွေကဆိုကြပါတယ်။
အာရက္ခတပ်တော်ထိန်းချုပ်နယ်မြေတွေမှာ စစ်ဘေးရှောင်လူဦးရေ ခြောက်သိန်းကျော်အထိရှိနေတယ်လို့ ရက္ခိုင်အမျိုးသားအဖွဲ့ချုပ်(ULA)ရဲ့လူသားချင်းစာနာထောက်ထားရေးနဲ့ ဖွံ့ဖြိုးရေးဆိုင်ရာ ပူးပေါင်းဆောင်ရွက်ရေးရုံး(HDCO) စာရင်းအရသိရပါတယ်။
အရင်က ရခိုင်ကစစ်ဘေးရှောင်တွေကို ICRC ကနေ အမိုးအကာတွေ ထောက်ပံ့ပေးခဲ့ပေမယ့် ပြီးခဲ့တဲ့ ၂၀၂၄ ခုနှစ်၊ နိုဝင်ဘာလကနေစပြီး အခုချိန်ထိ နိုင်ငံတကာလူသားချင်းစာနာထောက်ထားမူဆိုင်ရာ ကူညီထောက်ပံ့တာတွေမရတော့တာမို့ အကူအညီတွေလိုအပ်နေကြတယ်လို့ စစ်ဘေးရှောင်တွေကဆိုကြပါတယ်။
